News Continuous Bureau | Mumbai
PM Modi Assam Visit 2026 વડાપ્રધાન નરેન્દ્ર મોદી આજે આસામના પ્રવાસે છે, જ્યાં તેઓ ઉત્તર-પૂર્વ ભારતની વ્યૂહાત્મક મજબૂતી માટે એક નવા અધ્યાયની શરૂઆત કરશે. પીએમ મોદી ડિબ્રૂગઢ જિલ્લામાં નેશનલ હાઈવે-37 (NH-37) પર બનેલી નોર્થ-ઈસ્ટની પ્રથમ ઈમરજન્સી લેન્ડિંગ ફેસિલિટીનું (ELF) ઉદ્ઘાટન કરશે. આ પ્રસંગે પીએમ મોદીનું વિશેષ વિમાન (IAF C-130) પોતે હાઈવે પર લેન્ડ થશે, જે ભારતની વધતી જતી સંરક્ષણ તૈયારીઓનો પુરાવો આપશે.આસામના મુખ્યમંત્રી એ આ અંગે માહિતી આપતા જણાવ્યું કે, મોરાન ખાતે બનેલી આ ઈમરજન્સી લેન્ડિંગ ફેસિલિટી ભારતીય વાયુસેનાના (IAF) સમન્વયથી તૈયાર કરવામાં આવી છે. આ હાઈવે એરસ્ટ્રિપનો ઉપયોગ યુદ્ધ જેવી કટોકટીની સ્થિતિમાં લડાકુ વિમાનો અને હેલિકોપ્ટર્સના લેન્ડિંગ અને ટેક-ઓફ માટે કરી શકાશે. આ સુવિધા ચીન સરહદ નજીક હોવાથી વ્યૂહાત્મક દ્રષ્ટિએ અત્યંત મહત્વની માનવામાં આવે છે.
વાયુસેનાના 16 વિમાનોનું શક્તિ પ્રદર્શન
ઉદ્ઘાટન સમારોહ દરમિયાન પીએમ મોદી ભારતીય વાયુસેનાના પરાક્રમના સાક્ષી બનશે. હાઈવે પર આશરે 16 વિમાનોનું હવાઈ પ્રદર્શન (Fly-past) યોજાશે, જેમાં લડાકુ વિમાનો, ટ્રાન્સપોર્ટ એરક્રાફ્ટ અને હેલિકોપ્ટર્સ સામેલ હશે. 4.2 કિલોમીટર લાંબી આ એરસ્ટ્રિપ રિઇનફોર્સ્ડ કોંક્રિટથી બનાવવામાં આવી છે, જે ભારે વિમાનોનું વજન સહન કરવા સક્ષમ છે.
₹5,450 કરોડથી વધુના વિકાસલક્ષી પ્રોજેક્ટ્સ
વડાપ્રધાન મોદી આસામ પ્રવાસ દરમિયાન કુલ 5,450 કરોડ રૂપિયાથી વધુના પ્રોજેક્ટ્સનું લોકાર્પણ અને શિલાન્યાસ કરશે. મોરાન કાર્યક્રમ બાદ તેઓ ગુવાહાટી જશે, જ્યાં તેઓ બ્રહ્મપુત્રા નદી પર બનેલા નવા કુમાર ભાસ્કર વર્મા સેતુનું નિરીક્ષણ કરશે. આ ઉપરાંત, અમીનગાંવમાં ઉત્તર-પૂર્વીય ક્ષેત્ર માટે નેશનલ ડેટા સેન્ટરનું ઉદ્ઘાટન અને IIM ગુવાહાટીનું ઉદ્ઘાટન પણ પીએમ મોદીના હસ્તે થશે.
આ સમાચાર પણ વાંચો : US-Iran Tension: વિશ્વ પર ત્રીજા વિશ્વયુદ્ધનું જોખમ? ડોનાલ્ડ ટ્રમ્પનો ઈરાન પર હુમલાનો સંકેત- ‘સત્તા પરિવર્તન’ જ અંતિમ રસ્તો, મિડલ ઈસ્ટમાં યુદ્ધ જહાજો રવાના.
કનેક્ટિવિટી અને ઇકો-ફ્રેન્ડલી ટ્રાન્સપોર્ટ પર ભાર
પીએમ મોદી આસામમાં પરિવહન ક્ષેત્રે પરિવર્તન લાવવા માટે ‘પીએમ-ઈબસ સેવા યોજના’ હેઠળ 225 ઈલેક્ટ્રિક બસોને લીલી ઝંડી બતાવશે. આનાથી આસામમાં જાહેર પરિવહન વધુ સુવિધાજનક અને પ્રદૂષણ મુક્ત બનશે. આ પ્રવાસ આસામના ઈન્ફ્રાસ્ટ્રક્ચર અને સંરક્ષણ ક્ષેત્રમાં એક મોટો સીમાચિહ્ન સાબિત થશે.
