News Continuous Bureau | Mumbai
ભારત અને મોરિશિયસ વચ્ચેના દાયકાઓ જૂના વ્યૂહાત્મક અને સાંસ્કૃતિક સંબંધોને વધુ ગાઢ બનાવતા ભારતીય નૌસેનાના યુદ્ધ જહાજ INS ત્રિકંડની મોરિશિયસની સફળ મુલાકાત સંપન્ન થઈ છે.
ભારત સરકારના ‘મહાસાગર’ વિઝન અંતર્ગત આયોજિત આ પ્રવાસ દરમિયાન દરિયાઈ સુરક્ષા અને સંયુક્ત તાલીમ દ્વારા હિંદ મહાસાગર ક્ષેત્રમાં સહયોગ વધારવા પર વિશેષ ભાર મૂકવામાં આવ્યો હતો.આ મુલાકાત દરમિયાન પોર્ટ લુઈસ ખાતે ભારતીય નૌસેનાની માર્ચિંગ ટુકડી અને બેન્ડે પોતાની પ્રભાવશાળી પ્રસ્તુતિ દ્વારા સૌનું ધ્યાન ખેંચ્યું હતું. આ પ્રવાસ બંને દેશો વચ્ચેના સંરક્ષણ સહયોગને નવી ઊંચાઈએ લઈ જનારો સાબિત થયો છે.
ભવ્ય પરેડ અને ઉચ્ચ સ્તરીય બેઠકો
પોર્ટ લુઈસના ચેમ્પ ડી માર્સ ખાતે આયોજિત ભવ્ય પરેડમાં INS ત્રિકંડની માર્ચિંગ ટુકડી અને નૌસેનાના બેન્ડે આકર્ષણ જમાવ્યું હતું. આ સાથે જ ભારતીય હેલિકોપ્ટરે આકાશમાં ફ્લાયપાસ્ટ કરીને પરેડની શાન વધારી હતી. આ અવસરે જહાજના કમાન્ડિંગ ઓફિસરે મોરિશિયસના પોલીસ કમિશનર અને ભારતીય હાઈ કમિશનર સાથે ઉચ્ચ સ્તરીય બેઠકો યોજીને ક્ષેત્રીય સુરક્ષાના મહત્વના મુદ્દાઓ પર ચર્ચા કરી હતી.
આ સમાચાર પણ વાંચો : De-dollarization Move: ઈરાનનો ‘યુઆન’ દાવ! ડોલરને ફેંકી દેશે બહાર? હોર્મુઝની સામુદ્રધુનીમાં તેલના વેપાર માટે ઈરાને બદલ્યા નિયમો.
સંયુક્ત સૈન્ય તાલીમ અને પેસેજ એક્સરસાઇઝ
મુલાકાત દરમિયાન મોરિશિયસ નેશનલ કોસ્ટ ગાર્ડના કર્મચારીઓ માટે INS ત્રિકંડ પર વિશેષ તાલીમ સત્રો યોજાયા હતા. જેમાં ફાયરફાઈટીંગ, ડેમેજ કંટ્રોલ અને સી વોચકીપિંગ જેવા મહત્વના વિષયો પર માર્ગદર્શન આપવામાં આવ્યું હતું. જહાજ રવાના થતી વખતે મોરિશિયસના જહાજ ‘CGS વેલિયન્ટ’ સાથે સંયુક્ત પેસેજ એક્સરસાઇઝ (PASSEX) કરવામાં આવી હતી અને સંયુક્ત એક્સક્લુઝિવ ઇકોનોમિક ઝોન (EEZ) ની કડક દેખરેખ પણ હાથ ધરવામાં આવી હતી.
સામુદાયિક આઉટરીચ અને સાંસ્કૃતિક સાંજ
સૈન્ય પ્રવૃત્તિઓની સાથે સાથે સામુદાયિક જોડાણ પર પણ ભાર મૂકવામાં આવ્યો હતો. ૧૨ માર્ચના રોજ જહાજને જાહેર જનતા માટે ખુલ્લું રાખવામાં આવતા ૫૦૦થી વધુ પ્રવાસીઓએ તેની મુલાકાત લીધી હતી. જહાજ પર આયોજિત એક સાંસ્કૃતિક સાંજે બંને દેશોના મૈત્રીપૂર્ણ સંબંધોની ઝલક રજૂ કરી હતી, જેમાં મોરિશિયસના શિક્ષણ મંત્રી મુખ્ય અતિથિ તરીકે ઉપસ્થિત રહ્યા હતા.
