News Continuous Bureau | Mumbai
Hapur Gas Hoarding Case ઉત્તર પ્રદેશના હાપુડમાં અત્યારે ગેસની ભારે અછત વચ્ચે એક ચોંકાવનારો કિસ્સો સામે આવ્યો છે. સામાન્ય જનતા જ્યારે રસોઈ ગેસ માટે એજન્સીઓના ધક્કા ખાઈ રહી છે, ત્યારે વહીવટીતંત્રએ બાતમીના આધારે નેતા અબ્દુલ રેહાનના ઘરે દરોડા પાડ્યા હતા. આ સર્ચ ઓપરેશન દરમિયાન નેતાના ઘરેથી 55 ભરેલા એલપીજી (LPG) ગેસ સિલિન્ડર મળી આવ્યા છે. આટલી મોટી સંખ્યામાં સિલિન્ડરોનો જથ્થો પકડાતા સમગ્ર વિસ્તારમાં હડકંપ મચી ગયો છે.છેલ્લા કેટલાક દિવસોથી હાપુડ અને આસપાસના વિસ્તારોમાં ગેસની અછત અને કાળાબજારની ફરિયાદો મળી રહી હતી. એવું જાણવા મળ્યું હતું કે ગેસ એજન્સીઓ પર સિલિન્ડર ઉપલબ્ધ નથી, પરંતુ કેટલાક લોકો ઊંચા ભાવે ગેરકાયદેસર રીતે ગેસ વેચી રહ્યા છે. આ માહિતીના આધારે વહીવટીતંત્ર અને સંબંધિત વિભાગની ટીમે સંયુક્ત રીતે અબ્દુલ રેહાનના ઘરે છાપો માર્યો હતો. જ્યાં સ્ટોર જેવી જગ્યાએ છુપાવીને રાખેલા 55 ભરેલા સિલિન્ડર જપ્ત કરવામાં આવ્યા છે.
જમાખોરી પાછળના નેટવર્કની તપાસ તેજ
વહીવટીતંત્રના જણાવ્યા અનુસાર, પ્રાથમિક તપાસમાં આ મામલો ગેરકાયદેસર જમાખોરી નો જણાય છે. અત્યારે એ તપાસ કરવામાં આવી રહી છે કે આટલી મોટી સંખ્યામાં સિલિન્ડર નેતાના ઘરે પહોંચ્યા કેવી રીતે. ગેસ એજન્સીઓના રેકોર્ડ પણ તપાસવામાં આવી રહ્યા છે જેથી જાણી શકાય કે આ સિલિન્ડર કયા નામે અને કઈ એજન્સીમાંથી ઈસ્યુ કરવામાં આવ્યા હતા. આ પાછળ કોઈ મોટું નેટવર્ક સક્રિય છે કે કેમ તેની પણ ઊંડી તપાસ કરવામાં આવી રહી છે.
સ્થાનિક લોકોમાં ભારે રોષ અને સવાલો
આ ઘટના સામે આવ્યા બાદ સ્થાનિક લોકોમાં ભારે રોષ જોવા મળી રહ્યો છે. રહેવાસીઓનું કહેવું છે કે તેઓ દિવસોથી ગેસ માટે એજન્સીઓના ચક્કર કાપી રહ્યા હતા અને તેમને ખાલી હાથે પરત ફરવું પડતું હતું. લોકોએ સવાલ ઉઠાવ્યો છે કે જો કોઈ નેતાના ઘરે આટલો મોટો જથ્થો સુરક્ષિત હોય, તો સામાન્ય માણસને ગેસ કેવી રીતે મળે? સ્થાનિકોએ આ કાળાબજારી રોકવા માટે દોષિતો સામે કડક પગલાં લેવાની માંગ કરી છે.
આ સમાચાર પણ વાંચો : Iran Navy Strait of Hormuz: હોર્મુઝ સામુદ્રધુની પર ઈરાનનો કડક મિજાજ: ‘અમારી નૌસેના સાથે વાત કરો અને જહાજ લઈ જાઓ, પણ…’, જાણો ઈરાને દુનિયા સામે કઈ શરત મૂકી?
યોગી સરકારના આદેશ અને કાયદાકીય કાર્યવાહી
નોંધનીય છે કે મુખ્યમંત્રી યોગી આદિત્યનાથે તાજેતરમાં જ અધિકારીઓને નિર્દેશ આપ્યા હતા કે જરૂરી વસ્તુઓની જમાખોરી કરનારાઓ સામે કડક કાર્યવાહી કરવામાં આવે. હાપુડ દેહાત પોલીસ સ્ટેશનના પ્રભારી નીરજે જણાવ્યું છે કે રેહાન વિરુદ્ધ ‘આવશ્યક વસ્તુ અધિનિયમ’ હેઠળ ગુનો નોંધવામાં આવ્યો છે. જોકે, 7 વર્ષથી ઓછી સજાની જોગવાઈ હોવાથી પોલીસ સ્ટેશનમાંથી જામીન આપવામાં આવ્યા છે, પરંતુ ટૂંક સમયમાં ચાર્જશીટ કોર્ટમાં મોકલવામાં આવશે.
