News Continuous Bureau | Mumbai
IPL Honeytrap Alert। ઈન્ડિયન પ્રીમિયર લીગ (IPL) 2026 ની સીઝન વચ્ચે ભારતીય ક્રિકેટ કંટ્રોલ બોર્ડ (BCCI) એ તમામ ફ્રેન્ચાઈઝીઓ માટે એક અત્યંત મહત્વપૂર્ણ અને કડક એડવાઈઝરી જારી કરી છે. બોર્ડે ખેલાડીઓ અને સપોર્ટ સ્ટાફની સુરક્ષાને ધ્યાનમાં રાખીને હોટલમાં મુલાકાતીઓના પ્રવેશ અંગેના નિયમોમાં મોટો ફેરફાર કર્યો છે. હનીટ્રેપ, સુરક્ષા જોખમો અને જાતીય સતામણી જેવા ગંભીર કાનૂની વિવાદોથી બચવા માટે આ પગલું ભરવામાં આવ્યું છે.
મેનેજરની લેખિત મંજૂરી વગર એન્ટ્રી નહીં
BCCI સચિવ દેવજીત સૈકિયાએ ફ્રેન્ચાઈઝીઓને મોકલેલા સંદેશમાં સ્પષ્ટ કર્યું છે કે કોઈપણ ખેલાડી કે સ્ટાફ સભ્ય ટીમ મેનેજરની પૂર્વ જાણકારી અને લેખિત મંજૂરી વગર કોઈ પણ વ્યક્તિને પોતાના હોટલ રૂમમાં બોલાવી શકશે નહીં. બોર્ડના ધ્યાને આવ્યું હતું કે કેટલાક કિસ્સાઓમાં ખેલાડીઓએ મેનેજરને જાણ કર્યા વગર બહારના લોકોને રૂમ સુધી પહોંચ આપી હતી, જેને હવે તાત્કાલિક અસરથી પ્રતિબંધિત કરી દેવામાં આવી છે.
માત્ર લોબી કે લાઉન્જમાં જ મળી શકાશે
નવી માર્ગદર્શિકા મુજબ, ખેલાડીઓ કે સ્ટાફને મળવા આવતા મહેમાનો માત્ર હોટલની જાહેર જગ્યાઓ જેમ કે લોબી અથવા રિસેપ્શન લાઉન્જમાં જ મળી શકશે. જો કોઈ મહેમાનને ખાનગી હોટલ રૂમમાં લઈ જવો હોય તો તે માટે ટીમ મેનેજરની સત્તાવાર પરવાનગી ફરજિયાત છે. મેનેજરોને પણ તમામ મુલાકાતીઓનો સંપૂર્ણ રેકોર્ડ રાખવા અને હોટલ મૂવમેન્ટ પર નજર રાખવા સૂચના આપવામાં આવી છે.
હનીટ્રેપ અને કાનૂની વિવાદોનો ખતરો
બોર્ડે ચેતવણી આપી છે કે હાઈ-પ્રોફાઈલ સ્પોર્ટ્સ ઈવેન્ટ્સમાં ખેલાડીઓને ટાર્ગેટ કરવા માટે હનીટ્રેપ જેવી ઘટનાઓનો ભય રહે છે. આ સિવાય, ખોટા કાનૂની આરોપો કે સુરક્ષામાં ખામીને કારણે વિવાદો ઉભા થઈ શકે છે. IPL ઓપરેશન્સ ટીમ સમયાંતરે તપાસ કરશે કે તમામ ફ્રેન્ચાઈઝીઓ આ એડવાઈઝરીનું પાલન કરી રહી છે કે નહીં. ખેલાડીઓને પણ સતર્ક રહેવા અને કોઈપણ શંકાસ્પદ ગતિવિધિ અંગે તાત્કાલિક જાણ કરવા જણાવાયું છે.
👉 આ સમાચાર વાચો:
Share Market Today| હોર્મુઝ સંકટની શેરબજાર પર ‘સ્ટ્રાઈક’! સેન્સેક્સનિફ્ટીમાં ભયાનક કડાકો, રોકાણકારોના લાખો કરોડ સ્વાહા
