News Continuous Bureau | Mumbai
Ranveer Singh Ban FWICE| બોલિવૂડ સુપરસ્ટાર રણવીર સિંહને લઈને મનોરંજન જગતમાંથી એક ખૂબ જ આઘાતજનક સમાચાર સામે આવ્યા છે. ‘ફેડરેશન ઓફ વેસ્ટર્ન ઇન્ડિયા સિને એમ્પ્લોઇઝ’ (FWICE) દ્વારા અભિનેતા વિરુદ્ધ અસહકારનો આદેશ (NonCooperation Directive) જારી કરવામાં આવ્યો છે અને સમગ્ર ફિલ્મ ઇન્ડસ્ટ્રીને તેની સાથે કામ ન કરવા માટે કહેવામાં આવ્યું છે. આ કડક નિર્ણય ડિરેક્ટર ફરહાન અખ્તરની આગામી મોસ્ટ અવેટેડ ફિલ્મ ‘ડોન ૩’ (Don 3) ના શૂટિંગના ગણતરીના દિવસો પહેલાં જ રણવીરે અચાનક ફિલ્મ છોડી દેવાના કારણે લેવામાં આવ્યો છે. અભિનેતાના આ નિર્ણયથી ફિલ્મ નિર્માતાઓને મોટું આર્થિક નુકસાન સહન કરવું પડ્યું છે.
ક્રિએટિવ મતભેદોના કારણે રણવીર સિંહે છોડી ફિલ્મ
મળતી માહિતી મુજબ, રણવીર સિંહ અને ફિલ્મના ડિરેક્ટર ફરહાન અખ્તર વચ્ચે પાત્રના આઉટલુકને લઈને છેલ્લા કેટલાક સમયથી ક્રિએટિવ મતભેદો ચાલી રહ્યા હતા. રણવીર સિંહ ‘ડોન’ ના પાત્રને પડદા પર વધુ ડાર્ક, આક્રમક અને ગંભીર અંદાજમાં રજૂ કરવા માંગતો હતો, પરંતુ ફરહાન અખ્તરનો દ્રષ્ટિકોણ અલગ હોવાથી બંને વચ્ચે એકમતી સધાઈ શકી નહોતી. અમિતાભ બચ્ચન અને શાહરૂખ ખાન જેવા સુપરસ્ટાર્સ બાદ રણવીર આ આઇકોનિક ફ્રેન્ચાઇઝી સંભાળવાનો હોવાથી ચાહકોમાં ભારે ઉત્સાહ હતો, પરંતુ હવે તેના બહાર નીકળ્યા બાદ મેકર્સ નવા અભિનેતાની શોધ શરૂ કરે તેવી શક્યતા છે.
પ્રી-પ્રોડક્શન પર ૪૫ કરોડથી વધુનો ખર્ચ થયો બેકાર
ફિલ્મ ‘ડોન ૩’ ના પ્રોડ્યુસર ફરહાન અખ્તર અને રિતેશ સિધવાનીએ આ મામલે પહેલા ‘ઇન્ડિયન ફિલ્મ એન્ડ ટેલિવિઝન ડાયરેક્ટર્સ એસોસિએશન’ માં ફરિયાદ નોંધાવી હતી, જે બાદમાં આગળની કાર્યવાહી માટે ફેડરેશન (FWICE) ને સોંપવામાં આવી હતી. ફેડરેશનના મુખ્ય સલાહકાર અશોક પંડિતે આ બાબતને અત્યંત ગંભીર ગણાવી છે. મેકર્સના દાવા મુજબ, ફિલ્મ શરૂ થાય તે પહેલાં જ પ્રી-પ્રોડક્શન, વિદેશ પ્રવાસ, ૨૦૦ થી વધુ કર્મચારીઓ માટે હોટેલ બુકિંગ અને લોકેશન રેકી પાછળ ૪૫ કરોડ રૂપિયાથી વધુનો ખર્ચ થઈ ચૂક્યો હતો. ફેડરેશને રણવીરને તેની બાજુ રજૂ કરવા માટે ત્રણ વખત યાદ અપાવી હોવા છતાં તેની તરફથી કોઈ સંતોષકારક પ્રતિસાદ મળ્યો ન હતો.
કોઈપણ સુપરસ્ટાર કાયદાથી મોટો નથી
ફેડરેશનના પ્રમુખ બી. એન. તિવારીએ સ્પષ્ટ શબ્દોમાં જણાવ્યું છે કે, “અમે ઇન્ડસ્ટ્રીને એ સંદેશ આપવા માંગીએ છીએ કે કોઈ પણ સુપરસ્ટાર કાયદા અને સિસ્ટમથી મોટો નથી. જ્યાં સુધી તે પોતે આવીને આ મામલે અમારી સાથે ચર્ચા નહીં કરે, ત્યાં સુધી આ અસહકારનો આદેશ યથાવત રહેશે.” બીજી તરફ, આ વિવાદ પર પહેલીવાર મૌન તોડતા રણવીર સિંહે એક સત્તાવાર નિવેદન જારી કર્યું છે. રણવીરે જણાવ્યું કે, “મને ‘ડોન’ ફ્રેન્ચાઇઝી સાથે જોડાયેલા પ્રત્યેક વ્યક્તિ પ્રત્યે ખૂબ જ સન્માન છે. પરંતુ મારું માનવું છે કે વ્યાવસાયિક ચર્ચાઓ અને વ્યક્તિગત સંબંધો હંમેશાં ગરિમા, પરસ્પર સમજણ અને આદર સાથે હેન્ડલ થવા જોઈએ.” હાલમાં તે પોતાના ભવિષ્યના અન્ય પ્રોજેક્ટ્સ પર ધ્યાન કેન્દ્રિત કરી રહ્યો હોવાનું તેણે ઉમેર્યું છે.
👉 આ સમાચાર વાચો:
Petrol Diesel Price Today| જનતા પર મોંઘવારીનો ડબલ માર આજે કેટલું મોંઘું થયું પેટ્રોલડીઝલ? મુંબઈ, દિલ્હી ના લેટેસ્ટ રેટ પર કરો એક નજર
