News Continuous Bureau | Mumbai
Mirzapur The Film: પ્રખ્યાત વેબ સિરીઝ ‘મિર્ઝાપુર’ના ચાહકો માટે મોટા સમાચાર છે. મેકર્સ હવે તેને ફિલ્મના રૂપમાં મોટા પડદા પર રજૂ કરવા જઈ રહ્યા છે. જોકે, આ ફિલ્મ વેબ સિરીઝનો આગળનો ભાગ (સીઝન 4) નથી. પ્રોડક્શન સાથે જોડાયેલા સૂત્રોના જણાવ્યા મુજબ, આ એક સ્વતંત્ર ફીચર ફિલ્મ છે, જેની વાર્તા ભલે મિર્ઝાપુરની દુનિયાની હોય, પણ તેની રજૂઆત સિનેમાઘરોના દર્શકોને ધ્યાનમાં રાખીને કરવામાં આવી છે.
બનારસથી જેસલમેર સુધીનું શૂટિંગ અને લોકેશન
ફિલ્મનું શૂટિંગ ઓક્ટોબર 2025માં બનારસથી શરૂ થયું હતું. બનારસની ઓળખ, ત્યાંની ભાષા અને માહોલને ફિલ્મમાં મુખ્યતાથી બતાવવામાં આવ્યા છે. ત્યારબાદ ડિસેમ્બરમાં યુનિટ જેસલમેર પહોંચ્યું હતું, જ્યાં મોટા પાયે એવા દ્રશ્યો શૂટ કરવામાં આવ્યા છે જે ફિલ્મને વિઝ્યુઅલી વેબ સિરીઝ કરતા અલગ અને ભવ્ય બનાવે છે. હાલમાં મુંબઈમાં ફિલ્મનું અંતિમ શેડ્યૂલ ચાલી રહ્યું છે અને જાન્યુઆરી 2026 ના અંત સુધીમાં શૂટિંગ પૂર્ણ થવાની આશા છે.
વેબ સિરીઝ અને ફિલ્મમાં સૌથી મોટો તફાવત સેન્સરશીપનો હશે. ઓટીટી (OTT) પર ભાષા અને હિંસા માટે ઘણી છૂટછાટ હોય છે, પરંતુ આ ફિલ્મ સેન્સર બોર્ડ (CBFC) ની કસોટીમાંથી પસાર થશે. મેકર્સે ફિલ્મમાં અપશબ્દો અને વધુ પડતી હિંસાને મર્યાદિત રાખી છે. આથી, થિયેટરના દર્શકોને એક અલગ જ અનુભવ મળશે.ફિલ્મમાં કેટલાક નવા પાત્રોની એન્ટ્રી થઈ છે. જીતેન્દ્ર કુમાર (પંચાયત ફેમ) એક નવા પાત્રમાં જોવા મળશે, જેનું ઈમોશનલ સ્પેસ વેબ સિરીઝના ‘બબલુ પંડિત’ (વિક્રાંત મેસી) જેવું હશે. આ ઉપરાંત મોહિત મલિક નેગેટિવ રોલમાં જોવા મળશે. વેબ સિરીઝની વાત કરીએ તો, ‘મિર્ઝાપુર સીઝન 4’ હાલમાં લખાઈ રહી છે અને તે આ ફ્રેન્ચાઈઝીની છેલ્લી સીઝન હશે. હાલમાં મેકર્સનું પૂરું ધ્યાન ફિલ્મને સફળ બનાવવા પર છે.
