News Continuous Bureau | Mumbai
Ranveer Singh Fees Hike| બોલિવૂડ સુપરસ્ટાર રણવીર સિંહ ની મુખ્ય ભૂમિકા ધરાવતી ફિલ્મ ‘ધુરંધર’ ફ્રેન્ચાઈઝીએ બોક્સ ઓફિસ પર કમાણીના તમામ જૂના રેકોર્ડ તોડીને એક નવો ઈતિહાસ રચી દીધો છે. આદિત્ય ધરના નિર્દેશનમાં બનેલી આ બ્લોકબસ્ટર ફ્રેન્ચાઈઝીનો પ્રથમ ભાગ ડિસેમ્બર ૨૦૨૫ માં રિલીઝ થયો હતો, જ્યારે તેનો બીજો ભાગ ‘ધુરંધર ૨’ તાજેતરમાં ૧૯ માર્ચ ૨૦૨૬ ના રોજ સિનેમાઘરોમાં આવ્યો છે. બોલિવૂડની અત્યાર સુધીની સૌથી વધુ કમાણી કરનારી આ ફ્રેન્ચાઈઝીએ વિશ્વભરમાં ૩,૧૦૦ કરોડ રૂપિયાથી વધુનો બિઝનેસ કરી લીધો છે. આવી સ્થિતિમાં, ચાહકો એ જાણવા માટે ઉત્સુક છે કે આ મહાકાય પ્રોજેક્ટ માટે રણવીર સિંહે કેટલી ફી લીધી છે.
બંને ભાગના શૂટિંગ માટે રણવીરે લીધા ૫૦ કરોડ
મીડિયા રિપોર્ટ્સ અને ફિલ્મ ઇન્ડસ્ટ્રીના આંતરિક સૂત્રો પાસેથી મળતી વિગતો અનુસાર, ‘ધુરંધર’ ફ્રેન્ચાઈઝીના બંને ભાગોનું શૂટિંગ એકસાથે જ કરવામાં આવ્યું હતું. શરૂઆતમાં આ એક જ ફિલ્મ તરીકે રિલીઝ થવાની હતી, પરંતુ બાદમાં તેની લંબાઈ જોઈને નિર્માતાઓએ તેને બે ભાગમાં રિલીઝ કરવાનો નિર્ણય કર્યો હતો. આ આખી ફ્રેન્ચાઈઝી માટે રણવીર સિંહે કુલ ૫૦ કરોડ રૂપિયાની તગડી ફી વસૂલી છે, જેની સાથે તે આ ફિલ્મોનો સૌથી મોંઘો કલાકાર સાબિત થયો છે. આ ફિલ્મમાં રણવીરે ડબલ રોલ જેવા શેડ્સ ધરાવતા જાસૂસ ‘હમઝા અલી મઝારી’ અને ‘જસકિરસિંહ રંગી’ ના યાદગાર પાત્રો ભજવ્યા છે.
‘રોકી ઔર રાની…’ ની સરખામણીએ ફી ડબલ થઈ
‘ધુરંધર’ ફ્રેન્ચાઈઝી પહેલાં રણવીર સિંહ આલિયા ભટ્ટ સાથે કરણ જોહરની ફિલ્મ ‘રોકી ઔર રાની કી પ્રેમ કહાની’ માં જોવા મળ્યો હતો.મીડિયા રિપોર્ટ મુજબ, તે રોમેન્ટિક-કોમેડી ડ્રામા માટે રણવીરે ૨૫ કરોડ રૂપિયા ફી લીધી હતી. આ હિસાબે જોઈએ તો ‘ધુરંધર’ માટે રણવીરની સેલરીમાં સીધો ૧૦૦ ટકાનો વધારો થયો છે. નિર્માતાઓ માટે રણવીરને આટલી મોટી રકમ ચૂકવવાનું રિસ્ક એકદમ ફાયદાકારક સાબિત થયું, કારણ કે આ ફિલ્મે ભારત અને વિશ્વભરના બોક્સ ઓફિસ પર કમાણીના નવા કીર્તિમાન સ્થાપિત કર્યા છે.
૩,૧૦૦ કરોડ પાર પહોંચ્યું ‘ધુરંધર’ નું કુલ કલેક્શન
એક વેબસાઈટ ના સત્તાવાર આંકડા અનુસાર, વર્ષ ૨૦૨૫ માં રિલીઝ થયેલી ‘ધુરંધર’ ના પ્રથમ ભાગે ભારતમાં ૮૪.૨૦ કરોડ રૂપિયાનું નેટ કલેક્શન અને વિશ્વભરમાં ૧૩૦૭.૩૫ કરોડ રૂપિયાની કમાણી કરી હતી. બીજી તરફ, ‘ધુરંધર ૨’ એ રિલીઝના માત્ર ૬૮ દિવસમાં જ ભારતમાં ૧૧૪૭.૭૦ કરોડ રૂપિયાનું ઐતિહાસિક નેટ કલેક્શન કરી લીધું છે, જ્યારે તેનું વૈશ્વિક કલેક્શન ૧૮00.૨૩ કરોડ રૂપિયા પર પહોંચી ગયું છે. ‘ધુરંધર ૨’ હજુ પણ થિયેટરોમાં સફળતાપૂર્વક ચાલી રહી છે અને તેનું કુલ ફ્રેન્ચાઈઝી કલેક્શન ૩,૧૦૦ કરોડ રૂપિયાને પાર થઈ ગયું છે.
