News Continuous Bureau | Mumbai
રોહિત શેટ્ટી બાદ હવે અભિનેતા રણવીર સિંહ પણ ખંડણીખોરોના નિશાને આવ્યા છે. એક અજાણ્યા વ્યક્તિ એ વોટ્સએપ પર વોઈસ નોટ મોકલીને અભિનેતા પાસે કરોડો રૂપિયાની માંગણી કરી છે. આ ધમકીને ગંભીરતાથી લઈને મુંબઈ પોલીસે રણવીર સિંહના ઘરની સુરક્ષા વધારી દીધી છે. જોકે, રણવીર અને દીપિકા પાદુકોણ જ્યાં રહે છે તે ‘Beau Monde’ એપાર્ટમેન્ટમાં સશસ્ત્ર જવાનોની હાજરીને કારણે સોસાયટીના અન્ય રહીશોમાં ભારે અસંતોષ જોવા મળી રહ્યો છે.
સશસ્ત્ર ગાર્ડ્સ જોઈ સોસાયટીના સભ્યો ચિંતામાં
સોસાયટી કમિટીએ સ્થાનિક પોલીસ સ્ટેશનમાં લેખિત ફરિયાદ આપીને સ્પષ્ટતા માંગી છે. રહીશોનું કહેવું છે કે બિલ્ડિંગના જિમ અને કોમન એરિયામાં હથિયાર સાથે ૬ ખાનગી ગાર્ડ્સ અને પોલીસ તૈનાત છે, જેની સોસાયટી પાસેથી કોઈ પૂર્વ પરવાનગી લેવામાં આવી નથી. રહેણાંક વિસ્તારમાં હથિયારો સાથેના ગાર્ડ્સ જોઈને સભ્યોમાં ડરનો માહોલ ઉભો થયો છે.
આ સમાચાર પણ વાંચો : Ritu Tawde: મુંબઈમાં આજે ‘કેસરિયો’ લહેરાશે: રિતુ તાવડે બનશે BMC ના પ્રથમ મહિલા ભાજપ મેયર, ૨૫ વર્ષ બાદ શિવસેનાના ગઢમાં ગાબડું
સોસાયટીએ પોલીસને પૂછ્યા ૩ મહત્વના સવાલ
સોસાયટી મેનેજમેન્ટે પોલીસને સોંપેલા જ્ઞાપનમાં ત્રણ મુખ્ય મુદ્દાઓ પર જવાબ માંગ્યો છે: ૧. શું આ ખાનગી સુરક્ષા ગાર્ડ્સ પાસે રહેણાંક સંકુલમાં લાયસન્સવાળા હથિયારો લઈ જવાની મંજૂરી છે? ૨. શું દાદર પોલીસ સ્ટેશને આ માટે કોઈ સત્તાવાર પરવાનગી આપી છે? ૩. રણવીર સિંહના ફ્લેટમાં તૈનાત પોલીસકર્મીઓની વિગતો અને તેમની ડ્યુટીનું સ્વરૂપ શું છે?
વોટ્સએપ વોઈસ નોટ દ્વારા મળી હતી ધમકી
પ્રાથમિક તપાસ મુજબ, રણવીર સિંહના આસિસ્ટન્ટને એક વોટ્સએપ વોઈસ નોટ મોકલવામાં આવી હતી. અભિનેતાએ અજાણ્યા નંબરો બ્લોક કર્યા હોવાથી આરોપીએ ઓડિયો મેસેજ દ્વારા ધમકી આપી હતી. પોલીસને શંકા છે કે રણવીર ઉપરાંત ફિલ્મ જગતની અન્ય ૮ થી ૧૦ હસ્તીઓને પણ આવી ધમકીઓ મળી હોઈ શકે છે. ઉલ્લેખનીય છે કે, તાજેતરમાં જ ડિરેક્ટર રોહિત શેટ્ટીના ઘરની બહાર ફાયરિંગની ઘટના બની હતી, જેમાં પોલીસે ૫ લોકોની ધરપકડ કરી છે.
