News Continuous Bureau | Mumbai
Madagascar મેડાગાસ્કર દેશમાં રાજકીય અને સામાજિક અશાંતિ ચરમસીમા પર પહોંચી ગઈ છે. નેપાળ બાદ હવે આ આફ્રિકન ટાપુ રાષ્ટ્રમાં જન-ઝેડ પેઢીના યુવાનો રસ્તા પર ઉતરી આવ્યા છે. એક વિશેષ લશ્કરી ટુકડીએ સરકાર વિરુદ્ધની ભૂમિકા લીધી છે, જેના કારણે આ બળવો વધુ ઉગ્ર બન્યો છે. આ બળવાને કારણે સત્તાપલટા ના ડરથી મેડાગાસ્કરના રાષ્ટ્રપતિ એન્ડ્રી રાજોએલિના દેશ છોડીને ભાગી ગયા હોવાનો વિરોધ પક્ષે દાવો કર્યો છે. છેલ્લા ત્રણ અઠવાડિયાથી ચાલી રહેલા વિરોધ પ્રદર્શનો બાદ આ બળવો થયો છે.
વિરોધ પ્રદર્શનોનું કારણ અને જન-ઝેડની ભૂમિકા
મેડાગાસ્કરની લગભગ 30 મિલિયન વસ્તીમાંથી ત્રણ-ચતુર્થાંશ લોકો ગરીબી રેખા નીચે જીવે છે. વિશ્વ બેંકના જણાવ્યા મુજબ, 1960 થી 2020 દરમિયાન દેશના માથાદીઠ જીડીપીમાં 45% નો ઘટાડો થયો છે. આ વિરોધ પ્રદર્શનો 25 સપ્ટેમ્બરના રોજ પાણી અને વીજળીની તીવ્ર અછતને કારણે શરૂ થયા હતા અને જન-ઝેડ યુવાનોએ આ આંદોલનને “જનરલ ઝેડ મેડાગાસ્કર” નામ આપ્યું છે. ધીમે ધીમે, આ ચળવળ ભ્રષ્ટાચાર અને અસમાનતા વિરુદ્ધના દેશવ્યાપી વિરોધમાં ફેરવાઈ ગઈ. સંયુક્ત રાષ્ટ્રના મતે, અત્યાર સુધીમાં ઓછામાં ઓછા 22 લોકો માર્યા ગયા છે, જોકે સરકારે આ આંકડો સ્વીકાર્યો નથી.
રાષ્ટ્રપતિના ભાગી જવાનો વિરોધ પક્ષનો દાવો
ત્રણ અઠવાડિયાથી ચાલી રહેલા યુવાનોના વિરોધ પ્રદર્શનો વચ્ચે, વિપક્ષે દાવો કર્યો છે કે રાષ્ટ્રપતિ એન્ડ્રી રાજોએલિના દેશ છોડીને ભાગી ગયા છે. રાષ્ટ્રપતિ કાર્યાલયે સોમવારે સાંજે રાષ્ટ્રને સંબોધવાનું જાહેર કર્યું હતું, પરંતુ સૈનિકોએ રાજ્ય પ્રસારક પર હુમલો કર્યા બાદ તેને મુલતવી રાખવામાં આવ્યું. ત્યારબાદ વિરોધ પક્ષના નેતા સિટીયન રૅન્ડ્રિયાનાસોલોનીકોએ દાવો કર્યો કે મળેલી માહિતી મુજબ, રાજોએલિના રવિવારે ફ્રેન્ચ લશ્કરી વિમાનમાં દેશ છોડીને ભાગી ગયા છે. જોકે, રાષ્ટ્રપતિ કાર્યાલયે આ અંગે કોઈ પ્રતિક્રિયા આપી નથી.
આ સમાચાર પણ વાંચો : Donald Trump: પાકિસ્તાન ના વડાપ્રધાન શરીફની હાજરીમાં ટ્રમ્પે કર્યા પીએમ મોદીના ભરપૂર વખાણ, વિડીયો થયો વાયરલ!
વિશેષ સૈન્ય યુનિટનો બળવો અને પરિસ્થિતિની ગંભીરતા
CAPSAT (કેપસૅટ) નામના વિશેષ લશ્કરી યુનિટે તમામ સશસ્ત્ર દળોનો કબજો લીધો હોવાનો દાવો કર્યો છે. આ તે જ યુનિટ છે જેણે 2009 માં રાજોએલિનાને સત્તામાં લાવવામાં મદદ કરી હતી. CAPSAT ના કમાન્ડર કર્નલ માયકલ રૅન્ડ્રિયાનિરિનાએ જણાવ્યું કે સંઘર્ષમાં એક સૈનિક માર્યો ગયો છે, પરંતુ તેમણે બળવો કર્યાનું નકારી કાઢ્યું. તેમણે કહ્યું કે સેના લોકોની માંગણીને પ્રતિસાદ આપી રહી છે. આ તમામ ઘટનાક્રમોને કારણે મેડાગાસ્કરમાં રાજકીય સંકટ વધુ ઘેરું બનવાની અને સત્તાપલટો થવાની શક્યતા વધી ગઈ છે.
