News Continuous Bureau | Mumbai
બાંગ્લાદેશમાં યોજાયેલી ૧૩મી સંસદીય ચૂંટણીમાં બાંગ્લાદેશ નેશનલિસ્ટ પાર્ટી (BNP) એ પ્રચંડ વિજય મેળવ્યો છે. આ જીત બાદ ભારતના વડાપ્રધાન નરેન્દ્ર મોદીએ સોશિયલ મીડિયા (X) દ્વારા તારિક રહેમાનને ગરમજોશીથી અભિનંદન પાઠવ્યા હતા. પીએમ મોદીએ આ જીતને બાંગ્લાદેશની જનતાનો તારિક રહેમાનના નેતૃત્વ પરનો અતૂટ વિશ્વાસ ગણાવ્યો હતો.
પીએમ મોદીનો ખાસ સંદેશ
વડાપ્રધાન મોદીએ પોતાના સંદેશમાં લખ્યું, “સંસદીય ચૂંટણીમાં બીએનપીને નિર્ણાયક જીત અપાવવા બદલ હું તારિક રહેમાનને હાર્દિક અભિનંદન પાઠવું છું. ભારત એક લોકશાહી, પ્રગતિશીલ અને સમાવેશી (Inclusive) બાંગ્લાદેશના સમર્થનમાં ઉભું રહેશે.” તેમણે બંને દેશોના સહિયારા વિકાસલક્ષી લક્ષ્યોને મજબૂત કરવા માટે સાથે મળીને કામ કરવાની ઉત્સુકતા પણ દર્શાવી હતી. આ સંદેશ દ્વારા ભારતે સ્પષ્ટ કર્યું છે કે તે ઢાકામાં નવી સરકાર સાથે મજબૂત દ્વિપક્ષીય સંબંધોને પ્રાથમિકતા આપશે.
I convey my warm congratulations to Mr. Tarique Rahman on leading BNP to a decisive victory in the Parliamentary elections in Bangladesh.
This victory shows the trust of the people of Bangladesh in your leadership.
India will continue to stand in support of a democratic,…
— Narendra Modi (@narendramodi) February 13, 2026
આ સમાચાર પણ વાંચો : Tu Yaa Main Movie Review: ‘તુ યા મૈં’ રિવ્યુ: નબળો ફર્સ્ટ હાફ અને લોજિક વગરની વાર્તા, આદર્શ-શનાયાની મહેનત પર સ્ક્રિપ્ટે ફેરવ્યું પાણી – જાણો કેવી છે ફિલ્મ
૧૭ વર્ષ બાદ BNPનો વનવાસ પૂરો
ગુરુવારે યોજાયેલી આ ચૂંટણીના અત્યાર સુધીના પરિણામો મુજબ, તારિક રહેમાનની આગેવાની હેઠળના ગઠબંધને ૩૦૦ સભ્યોની જાતીય સંસદમાં ૨૦૦થી વધુ બેઠકો જીતીને બે-તૃતીયાંશ બહુમતી હાંસલ કરી લીધી છે. ૨૦૨૪ના જનઆંદોલન બાદ શેખ હસીનાએ દેશ છોડવો પડ્યો હતો, ત્યારબાદ આ પ્રથમ લોકશાહી ચૂંટણી હતી. તારિક રહેમાન પોતે ઢાકા-૧૭ અને બોગુરા-૬ બંને બેઠકો પરથી વિજેતા થયા છે.
જીત છતાં ઉજવણી નહીં કરવાની અપીલ
ઐતિહાસિક જીત છતાં BNP એ દેશભરમાં વિજય સરઘસ કે ઉજવણી ન કરવાની અપીલ કરી છે. પાર્ટીએ જણાવ્યું છે કે આ વિજય ઉત્સવ મનાવવાને બદલે શુક્રવારની નમાઝ અદા કરવામાં આવે અને પૂર્વ વડાપ્રધાન ખાલિદા ઝિયાને યાદ કરવામાં આવે. ૧૮ વર્ષના લાંબા વિદેશ પ્રવાસ બાદ પરત ફરેલા તારિક રહેમાન હવે બાંગ્લાદેશના આગામી વડાપ્રધાન બનવા માટે તૈયાર છે, જે દક્ષિણ એશિયાની રાજનીતિ માટે એક મોટું ‘ટર્નિંગ પોઈન્ટ’ સાબિત થઈ શકે છે.
