News Continuous Bureau | Mumbai
Donald Trump| ઈરાન અને અમેરિકા વચ્ચેના તણાવના માહોલમાં હવે પશ્ચિમી દેશોના સંબંધોમાં પણ તિરાડ જોવા મળી રહી છે. જર્મનીના ચાન્સેલર ફ્રેડરિક મર્ઝે ઈરાન સાથેના વિવાદને હેન્ડલ કરવાના અમેરિકાના અભિગમની ટીકા કરી હતી, જેના જવાબમાં ડોનાલ્ડ ટ્રમ્પે મર્ઝ પર આકરા પ્રહાર કર્યા છે.
ટ્રમ્પનો વળતો પ્રહાર
ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ પર લખ્યું કે, “જર્મનીના ચાન્સેલરને લાગે છે કે ઈરાન પાસે પરમાણુ હથિયાર હોય તો ચાલે, તેમને આ બાબતની કોઈ ગંભીરતા સમજાતી નથી.” ટ્રમ્પે ચેતવણી આપી કે જો ઈરાન પરમાણુ શક્તિ ધરાવતું રાષ્ટ્ર બની જશે, તો આખી દુનિયા બંધક બની જશે. ટ્રમ્પે વ્યંગાત્મક રીતે એમ પણ કહ્યું કે, આમાં કોઈ નવાઈ નથી કે જર્મનીનું આર્થિક પ્રદર્શન આટલું નબળું કેમ છે.
ચાન્સેલર મર્ઝે શું વાંધો ઉઠાવ્યો હતો?
જર્મનીના ચાન્સેલર ફ્રેડરિક મર્ઝે અમેરિકાની વ્યૂહરચના પર સવાલ ઉઠાવતા કહ્યું હતું કે ઈરાન સાથેની વાતચીતમાં અમેરિકાને ‘બેઈજ્જત’ થવું પડી રહ્યું છે. તેમણે કહ્યું કે ઈરાન અપેક્ષા કરતાં વધુ મજબૂત સાબિત થઈ રહ્યું છે. મર્ઝના મતે, ઈરાન સાથેના વિવાદમાંથી બહાર નીકળવા માટે અમેરિકા પાસે કોઈ સ્પષ્ટ પ્લાન નથી, જે વાશિંગ્ટન અને તેના નાટો (NATO) સહયોગીઓ વચ્ચેના વધતા તણાવને સ્પષ્ટ કરે છે.
હોર્મુઝ સ્ટ્રેટ અને વૈશ્વિક અસર
ચાન્સેલરે હોર્મુઝ સ્ટ્રેટમાં થઈ રહેલા ઘટનાક્રમ પર ચિંતા વ્યક્ત કરી હતી. આ શિપિંગ રૂટ તેલના પુરવઠા માટે વિશ્વનો સૌથી મહત્વનો માર્ગ છે અને ત્યાં થયેલી કોઈ પણ અવરોધ વૈશ્વિક ઊર્જા બજારને હચમચાવી શકે છે. ટ્રમ્પ અને મર્ઝ વચ્ચેનો આ વાદ-વિવાદ એ દર્શાવે છે કે રશિયા-યુક્રેન યુદ્ધ અને અન્ય ભૌગોલિક રાજકીય મુદ્દાઓ પર પહેલાથી જ તણાવમાં રહેલા પાશ્ચાત્ય દેશોમાં હવે ઈરાન મુદ્દે પણ મતભેદો વધી રહ્યા છે.
👉 આ સમાચાર વાચો:
Today’s Horoscope : આજનો દિવસ:૨૯ એપ્રિલ ૨૦૨૬, બુધવાર, જાણો આપનું રાશિફળ
