News Continuous Bureau | Mumbai
Russia Cuba Oil Tanker રશિયા અને અમેરિકા વચ્ચે ફરી એકવાર ‘શીત યુદ્ધ’ જેવો માહોલ સર્જાયો છે. અમેરિકાએ જાન્યુઆરી મહિનાથી ક્યુબાની ચારેબાજુ તેલના પુરવઠા પર કડક પ્રતિબંધો લાદ્યા હતા, જેના કારણે ક્યુબામાં અંધારપટ છવાયો છે. જોકે, રશિયાના રાષ્ટ્રપતિ પુતિને આ પ્રતિબંધોને ફગાવીને ક્યુબાની મદદ માટે તેલનું વિશાળ ટેન્કર રવાના કર્યું છે, જે હવે મંજિલની નજીક પહોંચી ગયું છે. રશિયન ધ્વજ ધરાવતું આ ટેન્કર આશરે 7,30,000 બેરલ કાચું તેલ લઈને ક્યુબાના માતાન્ઝાસ બંદર તરફ આગળ વધી રહ્યું છે. અગાઉ પણ એક રશિયન જહાજ 6.50 લાખ બેરલ તેલ લઈને ક્યુબાના દરિયાઈ વિસ્તારમાં પ્રવેશ્યું હતું. મીડિયા રિપોર્ટ મુજબ, આ જહાજ ગમે તે ક્ષણે બંદર પર લાંગરી શકે છે.
અમેરિકાએ કેમ ન રોક્યું રશિયન ટેન્કર?
નિષ્ણાતોનું માનવું છે કે ડોનાલ્ડ ટ્રમ્પ પ્રશાસન અત્યારે રશિયા સાથે સીધો સંઘર્ષ ઈચ્છતું નથી. આના મુખ્ય કારણો નીચે મુજબ છે:
ઈરાન સાથેનું યુદ્ધ: અમેરિકા અત્યારે ઈરાન સાથેની લડાઈમાં ખરાબ રીતે ફસાયેલું છે અને મોટું નુકસાન વેઠી રહ્યું છે.
યુક્રેન મોરચો: રશિયા પહેલાથી જ યુક્રેન મુદ્દે અમેરિકા સામે આક્રમક છે.
સીધો ટકરાવ ટાળવાની નીતિ: અમેરિકી કોસ્ટ ગાર્ડ પાસે તક હોવા છતાં, ઉપરથી કોઈ આદેશ ન મળતા તેમણે રશિયન ટેન્કરને આગળ વધવા દીધું હતું.
ક્યુબામાં માનવીય સંકટ અને રશિયાનો સાથ
ટ્રમ્પના પ્રતિબંધોને કારણે ક્યુબામાં વીજળી, ઈંધણ અને દવાઓની ભારે અછત સર્જાઈ છે. લોકો અંધારામાં જીવવા મજબૂર બન્યા છે. રશિયાએ સ્પષ્ટ કર્યું છે કે તે ક્યુબાની પડખે ઊભું છે. મેક્સિકો સ્થિત રશિયન દૂતાવાસે નિવેદન આપ્યું છે કે ક્યુબા પરના તમામ પ્રતિબંધો ગેરકાયદેસર છે અને રશિયા દરેક રીતે મદદ કરવા તૈયાર છે.
આ સમાચાર પણ વાંચો : North India Weather Alert: પહાડો પર બરફની આફત અને મેદાનોમાં માવઠું! કાશ્મીરમાં ૨ મુખ્ય હાઈવે બંધ, હિમાચલ પ્રદેશમાં આગામી ૪૮ કલાક ભારે, તંત્ર એલર્ટ મોડ પર.
નિષ્ણાતોનો મત
ઉર્જા નિષ્ણાત જ્યોર્જ પિનોનના જણાવ્યા મુજબ, આ તેલના જથ્થાથી ક્યુબાને થોડા અઠવાડિયાની રાહત ચોક્કસ મળશે, પરંતુ તે કાયમી ઉકેલ નથી. જોકે, આ ઘટનાએ સાબિત કરી દીધું છે કે વૈશ્વિક રાજનીતિમાં હવે અમેરિકાનો એકહથ્થુ દબદબો ઓછો થઈ રહ્યો છે અને રશિયા નવા મોરચા ખોલી રહ્યું છે.
