News Continuous Bureau | Mumbai
Historic Move: અમેરિકાના ટ્રેઝરી વિભાગે એક એવી જાહેરાત કરી છે જેણે સમગ્ર વિશ્વનું ધ્યાન ખેંચ્યું છે. અમેરિકાના ઈતિહાસમાં પ્રથમ વખત કોઈ વર્તમાન રાષ્ટ્રપતિની સહી યુએસ પેપર કરન્સી એટલે કે ડોલરની નોટો પર છાપવામાં આવશે. રાષ્ટ્રપતિ ડોનાલ્ડ ટ્રમ્પની સહી હવે તમામ નવી બહાર પાડવામાં આવતી અમેરિકી નોટો પર જોવા મળશે, જે અત્યાર સુધીની વર્ષો જૂની પરંપરામાં મોટો ફેરફાર છે.પરંપરાગત રીતે, અમેરિકન પેપર કરન્સી પર માત્ર ટ્રેઝરી સેક્રેટરી અને યુએસ ટ્રેઝરરની જ સહી હોય છે, રાષ્ટ્રપતિની નહીં. વેનિટી ફેર દ્વારા સૌપ્રથમ અહેવાલ આપવામાં આવ્યો હતો કે, આ પગલું ટ્રમ્પના નામ અને પ્રતિમાને રાષ્ટ્રીય સંસ્થાઓ અને સ્મારક વસ્તુઓ પર અંકિત કરવાના વ્યાપક પ્રયાસોનો એક ભાગ છે.
અમેરિકાના 250મા વર્ષની ઉજવણી નિમિત્તે ફેરફાર
ટ્રેઝરી વિભાગના જણાવ્યા અનુસાર, આ પહેલ આગામી 4 જુલાઈના રોજ ઉજવવામાં આવનારા અમેરિકાના 250મા જન્મદિવસ ની ઉજવણીનો એક ભાગ છે. ટ્રેઝરી સેક્રેટરી સ્કોટ બેસેન્ટે જણાવ્યું હતું કે, “આપણા મહાન દેશની ઐતિહાસિક સિદ્ધિઓને ઓળખવા માટે યુએસ ડોલર પર ટ્રમ્પનું નામ હોવું એનાથી વધુ શક્તિશાળી બીજો કોઈ રસ્તો નથી.”
પરંપરાગત ફોર્મેટમાં મોટો ભંગ
દાયકાઓથી અમેરિકી બેંકનોટો એક નિશ્ચિત ફોર્મેટને અનુસરે છે. નવી યોજના હેઠળ, ટ્રેઝરી સેક્રેટરી સ્કોટ બેસેન્ટની સહીની સાથે ટ્રમ્પની સહી પણ નોટો પર રહેશે. યુએસ ટ્રેઝરર બ્રાન્ડોન બીચે પણ આ નિર્ણયને સમર્થન આપતા કહ્યું છે કે, અમેરિકન કરન્સી પર ટ્રમ્પની સહી છાપવી એ માત્ર યોગ્ય જ નહીં પણ ‘સંપૂર્ણ હકદાર’ પણ છે.
આ સમાચાર પણ વાંચો: Major Relief: મોટી રાહત! પેટ્રોલ-ડીઝલના ભાવમાં આટલા રૂપિયા સુધીનો કડાકો, આજથી જ જનતાને મળશે ફાયદો.
ટ્રમ્પ બ્રાન્ડિંગના વધતા પગલાં
આ નિર્ણય ટ્રમ્પની અમેરિકન જાહેર અને સાંસ્કૃતિક સંસ્થાઓ પર વધતી જતી છાપનું લેટેસ્ટ ઉદાહરણ છે. આ પહેલા યુએસ ઇન્સ્ટિટ્યૂટ ઓફ પીસ અને કેનેડી સેન્ટર જેવી સંસ્થાઓના પુનઃનામકરણ તેમજ યુદ્ધ જહાજોની નવી શ્રેણીનું નામ પણ ટ્રમ્પ સાથે જોડવામાં આવ્યું છે. આ ઉપરાંત, અમેરિકાના 250મા જન્મદિવસ નિમિત્તે ટ્રમ્પના ચહેરાવાળો 24 કેરેટ સોનાનો સ્મારક સિક્કો પણ મંજૂર કરવામાં આવ્યો છે.
બ્યુરો ઓફ એન્ગ્રેવિંગ એન્ડ પ્રિન્ટિંગ સંભાળશે કામગીરી
યુએસ બ્યુરો ઓફ એન્ગ્રેવિંગ એન્ડ પ્રિન્ટિંગ, જે તમામ અમેરિકન પેપર કરન્સીના ઉત્પાદન માટે જવાબદાર છે, તે આ નવી નોટો બહાર પાડવાની દેખરેખ રાખશે. જ્યારે યુએસ મિન્ટ સિક્કાઓના ઉત્પાદનની જવાબદારી સંભાળશે. હવે ટૂંક સમયમાં ટ્રમ્પનું નામ અમેરિકાના રોજિંદા રોકડ વ્યવહારોનો કાયમી હિસ્સો બની જશે.
