News Continuous Bureau | Mumbai
Sergio Gor Trump Envoy India। અમેરિકાના રાષ્ટ્રપ્રમુખ ડોનાલ્ડ ટ્રમ્પના વહીવટી તંત્ર અને ભારત વચ્ચેના સંબંધોમાં તાજેતરમાં જોવા મળેલા ઉતારચઢાવ વચ્ચે એક ખૂબ જ મહત્વનું અને હકારાત્મક નિવેદન સામે આવ્યું છે. ટ્રમ્પના અત્યંત નજીકના સહયોગી અને વિશેષ રાજદૂત સર્જિયો ગોરે (Sergio Gor) સત્તાવાર રીતે જણાવ્યું છે કે ટ્રમ્પ વહીવટી તંત્ર ભારતને એક અગ્રણી અને મજબૂત વૈશ્વિક શક્તિ (ગ્લોબલ પાવર) તરીકે જુએ છે. ગોરે ભારતને વિશ્વના એવા નવા ‘પાવર સેન્ટર્સ’ (શક્તિના કેન્દ્રો) માંનું એક ગણાવ્યું છે, જેની સાથે વોશિંગ્ટન પોતાના વ્યૂહાત્મક સંબંધોને વધુ ગાઢ અને મજબૂત કરવા માટે સક્રિયપણે કામ કરી રહ્યું છે.
સંબંધો સુધારવા માટે અમેરિકી વિદેશ મંત્રી માર્કો રુબિયોએ તાજેતરમાં જ લીધી હતી ભારતની મુલાકાત
રાજદૂત સર્જિયો ગોરે ભારતની પ્રચંડ ક્ષમતાઓ અને વિકાસની ગતિના ભારોભાર વખાણ કરતા કહ્યું કે, “અમારું વહીવટી તંત્ર દુનિયામાં સત્તાના નવા ઉભરતા કેન્દ્રોની ઓળખ કરી રહ્યું છે. અમે ભારતની અપાર સંભાવનાઓ અને આર્થિક તાકાતને સારી રીતે સમજીએ છીએ, તેથી જ અમે આ ભાગીદારીને વધારવા અને તેને વધુ લોખંડી બનાવવા કટિબદ્ધ છીએ.” ઉલ્લેખનીય છે કે, આ જ સપ્તાહની શરૂઆતમાં અમેરિકાના વિદેશ મંત્રી માર્કો રુબિયોએ (Marco Rubio) ભારતીય નેતૃત્વ સાથે મુલાકાત કરી હતી. તાજેતરના મહિનાઓમાં બંને દેશો વચ્ચે કેટલાક નીતિવિષયક મુદ્દાઓ પર બગડેલા રાજદ્વારી સંબંધોને સુધારવાના મજબૂત પ્રયાસરૂપે આ ઉચ્ચ સ્તરીય ભારત મુલાકાત યોજાઈ હતી.
ટ્રમ્પના ભારત વિરોધી આકરા નિર્ણયો અને નિવેદનોથી અગાઉ નવી દિલ્હી થયું હતું હેરાન
જોકે, વિતેલા સમયમાં ડોનાલ્ડ ટ્રમ્પના કેટલાક એકતરફી નિર્ણયો અને આકરા વલણે નવી દિલ્હીના રાજદ્વારીઓને વારંવાર ચિંતામાં મૂક્યા છે. ટ્રમ્પ પ્રશાસને ભારતીય ચીજવસ્તુઓની આયાત પર ૫૦ ટકા જેટલો તોતિંગ ટેરિફ (આયાત ડ્યુટી) ઝીંકી દીધો હતો. આ ઉપરાંત, ‘ઓપરેશન સિંદૂર’ દરમિયાન અમેરિકાએ જાહેર મંચ પરથી પાકિસ્તાનનો પક્ષ લીધો હતો, કાશ્મીરના આંતરિક મુદ્દામાં બિનજરૂરી હસ્તક્ષેપ કરવાનો પ્રયાસ કર્યો હતો અને ચીન સામેના વૈશ્વિક ટ્રેડ વોરમાં પોતાનું વલણ અચાનક નરમ કરી દીધું હતું. એટલું જ નહીં, અમેરિકામાં ભારત વિરોધી રેટરિક (બયાનબાજી) ને પ્રોત્સાહન આપવા બદલ પણ ટ્રમ્પ વહીવટી તંત્રની આંતરરાષ્ટ્રીય સ્તરે ભારે ટીકા થઈ ચૂકી છે.
iCET પહેલ, સેમિકન્ડક્ટર અને ફાર્મા ક્ષેત્રે મોટો સહયોગ
આ તમામ રાજકીય તણાવ છતાં, સર્જિયો ગોરે એવા મહત્વના ક્ષેત્રો પર વિશેષ ભાર મૂક્યો હતો જ્યાં બંને દેશો વચ્ચેનો વેપાર સતત નવી ઊંચાઈઓ સર કરી રહ્યો છે. તેમણે બંને દેશો વચ્ચેની મહત્વકાંક્ષી iCET (ક્રિટિકલ એન્ડ ઇમર્જિંગ ટેક્નોલોજી) પહેલના વિસ્તરણ તરફ ઈશારો કર્યો, જે મુખ્યત્વે સેમિકન્ડક્ટર ઉત્પાદન, આર્ટિફિશિયલ ઇન્ટેલિજન્સ (AI), ક્વોન્ટમ ટેકનોલોજી, ક્રિટિકલ મિનરલ્સ સપ્લાય ચેઈન, ગ્રીન એનર્જી અને સ્પેસ ટેકનોલોજી પર કેન્દ્રિત છે. ગોરના જણાવ્યા અનુસાર, અમેઝોન જેવી વૈશ્વિક અમેરિકી કંપનીઓ ભારતમાં થઈ રહેલા આશરે ૩૫ અબજ ડોલરના રોકાણનો હિસ્સો છે, જ્યારે સામે પક્ષે ભારતીય કંપનીઓએ પણ અમેરિકાના અર્થતંત્રમાં આશરે ૨૦ અબજ ડોલરનું મોટું રોકાણ કર્યું છે. હેલ્થકેર અને ફાર્માસ્યુટિકલ સેક્ટર અંગે મોટો ખુલાસો કરતા તેમણે ઉમેર્યું કે અમેરિકામાં વેચાતી કુલ જેનરિક દવાઓમાંથી આશરે ૪૦ ટકા દવાઓ એકલું ભારત સપ્લાય કરે છે, તેથી વૈશ્વિક બજારમાં ભારત સુરક્ષિત અને ભરોસાપાત્ર હબ છે.
