News Continuous Bureau | Mumbai
પશ્ચિમ એશિયાના સંકટને કારણે વિશ્વભરમાં કાચા તેલ અને ગેસની અછત સર્જાઈ છે, ત્યારે ભારતે પોતાની કૂટનીતિક શક્તિનો પરિચય આપ્યો છે. રવિવારે અમેરિકાનું કાર્ગો જહાજ ‘પિક્સિસ પાયોનિયર’ (Pyxis Pioneer) ૧૬,૭૧૪ મેટ્રિક ટન એલપીજી ગેસ લઈને મંગલૂરુ બંદર પર પહોંચ્યું હતું. ખાસ વાત એ છે કે આના એક દિવસ પહેલા જ રશિયાનું જહાજ પણ લાખો બેરલ કાચું તેલ લઈને ભારત આવ્યું હતું.
રશિયા અને અમેરિકા બંને ભારતની વહારે
અમેરિકી એલપીજી જહાજ પિક્સિસ પાયોનિયરે ૧૪ ફેબ્રુઆરીએ ટેક્સાસથી પોતાની યાત્રા શરૂ કરી હતી. આ જહાજ ભારત પહોંચ્યું તેના એક દિવસ પહેલા જ રશિયન ઓઈલ ટેન્કર ‘એક્વા ટાઈટન’ ૧ લાખ ટનથી વધુ ક્રૂડ ઓઈલ (આશરે ૭.૭ લાખ બેરલ) લઈને મંગલૂરુ પહોંચ્યું હતું. આ રશિયન ટેન્કર પહેલા ચીન જઈ રહ્યું હતું, પરંતુ તેને ભારત તરફ વાળી દેવામાં આવ્યું હતું. આ બંને દેશોની સપ્લાય ભારત માટે વર્તમાન સંકટમાં ખૂબ જ મહત્વની સાબિત થશે.
આ સમાચાર પણ વાંચો : Gold & Silver Prices Crash Today: સોનું-ચાંદી સસ્તું થયું! કિંમતોમાં મોટો કડાકો બોલાતા ગ્રાહકોમાં ખુશી; જાણો તમારા શહેરમાં ૧૦ ગ્રામ સોનાનો તાજો ભાવ.
હોર્મુઝમાં ૭૦૦ જહાજો ફસાયા, મંગલૂરુ પોર્ટ બન્યું આશાનું કિરણ
ઈરાન યુદ્ધને કારણે હોર્મુઝની સામુદ્રધુની આસપાસ વિશ્વના આશરે ૭૦૦ જહાજો છેલ્લા કેટલાક દિવસોથી ફસાયેલા છે. આના કારણે વિશ્વબજારમાં સપ્લાય થતું ૨૦% કાચું તેલ અટકી પડ્યું છે અને કિંમતો સતત વધી રહી છે. આવી સ્થિતિમાં મંગલૂરુ પોર્ટ ભારત માટે ખાસ છે, કારણ કે અહીં ભારતની સૌથી મોટી ભૂગર્ભ એલપીજી સ્ટોરેજ (Underground LPG Storage) સુવિધા છે, જે સમુદ્રની સપાટીથી ૨૨૫ મીટર નીચે આવેલી છે અને તેની ક્ષમતા ૮૦,૦૦૦ મેટ્રિક ટન છે.
ભારતની ઉર્જા સુરક્ષા અને કૂટનીતિ
નિષ્ણાતોનું માનવું છે કે અમેરિકા અને રશિયા પાસેથી મળી રહેલી આ સતત સપ્લાય ભારતની ઉર્જા સુરક્ષાને મજબૂત બનાવશે. વૈશ્વિક કટોકટી વચ્ચે પણ ભારત પોતાની જરૂરિયાતો પૂરી કરવા માટે પશ્ચિમ અને પૂર્વ બંને બાજુથી સંતુલન જાળવી રહ્યું છે. એક તરફ હોર્મુઝમાં ફસાયેલા જહાજોને કારણે એલપીજીની અછતનો ડર હતો, ત્યાં અમેરિકી ગેસના આગમનથી ઘરેલું સ્ટોક જાળવવામાં ઘણી સરળતા રહેશે.
Join Our WhatsApp Community
