News Continuous Bureau | Mumbai
Iran Navy Strait of Hormuz પશ્ચિમ એશિયામાં ચાલી રહેલા યુદ્ધ વચ્ચે ઈરાનના વિદેશ મંત્રાલય તરફથી એક અત્યંત મહત્વનું નિવેદન સામે આવ્યું છે. ઈરાને સ્પષ્ટ કર્યું છે કે જો કોઈ દેશે હોર્મુઝની સામુદ્રધુની માંથી પોતાનું જહાજ પસાર કરવું હોય, તો તેમણે ઈરાનની નૌસેના સાથે સંપર્ક સાધવો પડશે અને તેમની સાથે તાલમેલ બેસાડવો પડશે. ભારત સહિત અનેક દેશો તેલ અને ગેસના પુરવઠા માટે આ માર્ગ પર નિર્ભર છે, ત્યારે ઈરાનનું આ નિવેદન વૈશ્વિક સ્તરે ચર્ચાનો વિષય બન્યું છે.રોયટર્સના અહેવાલ મુજબ, ઈરાની વિદેશ મંત્રાલયના પ્રવક્તાએ જણાવ્યું હતું કે હોર્મુઝમાંથી પસાર થતા જહાજો પર ઈરાન પૂરેપૂરી નજર રાખી રહ્યું છે. આ નિવેદનથી સ્પષ્ટ થાય છે કે આ વ્યૂહાત્મક માર્ગ પર અત્યારે ઈરાનની નૌસેનાનું સંપૂર્ણ નિયંત્રણ છે. ઈરાન તે જ દેશોને છૂટ આપશે જેઓ તેના દુશ્મન દેશોના સમર્થનમાં નથી.
હુમલો કરનાર દેશો માટે કોઈ છૂટછાટ નહીં
ઈરાનના નાયબ વિદેશ મંત્રીએ વધુમાં સ્પષ્ટતા કરી છે કે જે દેશોએ ઈરાન વિરુદ્ધના આક્રમણમાં ભાગ લીધો છે અથવા સહકાર આપ્યો છે, તેમને હોર્મુઝમાંથી સુરક્ષિત રીતે પસાર થવાનો લાભ નહીં મળે. જોકે, કેટલાક દેશોએ સુરક્ષિત અવરજવર માટે ઈરાન સાથે વાતચીત કરી છે અને ઈરાને તેમની સાથે સહયોગ પણ કર્યો છે. આ સંકેત ખાસ કરીને ભારત જેવા દેશો માટે સકારાત્મક હોઈ શકે છે, જેઓ સતત ઈરાન સાથે સંપર્કમાં છે.
સર્વોચ્ચ નેતા મૌજતબા ખામેનીનો આકરો મિજાજ
ઈરાનના નવા સર્વોચ્ચ નેતા મૌજતબા ખામેનીએ તેમના પિતાના નિધન બાદ પ્રથમવાર જાહેરમાં નિવેદન આપતા જણાવ્યું હતું કે, ઈરાન આ જંગ હારશે નહીં. તેમણે અમેરિકા અને ઈઝરાયેલ વિરુદ્ધ દબાણ બનાવવાના ભાગરૂપે હોર્મુઝની સામુદ્રધુનીને બંધ રાખવાની અને લડાઈ ચાલુ રાખવાની જાહેરાત કરી છે. બીજી તરફ, અમેરિકી રાષ્ટ્રપતિ ટ્રમ્પનો દાવો છે કે તેઓ ગમે ત્યારે યુદ્ધનો અંત લાવી શકે છે, પરંતુ અત્યારે અમેરિકન જહાજો પણ આ જોખમી માર્ગે જવાનું ટાળી રહ્યા છે.
આ સમાચાર પણ વાંચો : Maharashtra Weather Alert: મહારાષ્ટ્રમાં કુદરતની બેવડી તલવાર એકબાજુ ૪૦ ડિગ્રીને પાર પારો અને બીજી બાજુ કમોસમી વરસાદનું એલર્ટ; રાજ્યમાં ગરમી અને ગર્જનાનો ખેલ શરૂ
કાચું તેલ 100 ડોલરને પાર, મોંઘવારીનો ભય
સપ્લાય ચેઈન ખોરવાઈ જવાના કારણે આંતરરાષ્ટ્રીય બજારમાં તેલના ભાવમાં જોરદાર ઉછાળો આવ્યો છે. બ્રેન્ટ ક્રૂડ ઓઈલ અત્યારે 100 ડોલર પ્રતિ બેરલને પાર કરી ગયું છે, જ્યારે WTI ક્રૂડ ઓઈલ પણ 95 ડોલરની ઉપર ટ્રેડ કરી રહ્યું છે. એલએનજી (LNG) ના ભાવમાં પણ સતત વધારો થઈ રહ્યો છે. ઈરાને તો ત્યાં સુધી ચેતવણી આપી છે કે તેઓ તેલના ભાવને 200 ડોલર પ્રતિ બેરલ સુધી લઈ જશે અને અત્યારે યુદ્ધ વિરામ કરવાની તેમની કોઈ યોજના નથી.
