News Continuous Bureau | Mumbai
ફ્રાન્સના રાષ્ટ્રપતિ ઈમેન્યુઅલ મેક્રોને સોશિયલ મીડિયા પર વડાપ્રધાન નરેન્દ્ર મોદી સાથેની એક અત્યંત પ્રભાવશાળી તસવીર પોસ્ટ કરી છે. આ ફોટોના કેપ્શનમાં તેમણે ‘જય હો’ લખીને ભારતીય સંસ્કૃતિ અને મિત્રતા પ્રત્યે સન્માન વ્યક્ત કર્યું છે. મુંબઈમાં આયોજિત ‘ઈન્ડિયા-ફ્રાન્સ ઈનોવેશન ફોરમ’માં સંબોધન કરતા મેક્રોને સ્પષ્ટ કર્યું કે ભારત અને ફ્રાન્સનો સંબંધ હવે માત્ર દ્વિપક્ષીય નથી, પરંતુ તે ભવિષ્યની ટેકનોલોજી અને વૈશ્વિક સુરક્ષા માટે અનિવાર્ય છે. મેક્રોને તેમના ભાષણમાં જણાવ્યું હતું કે હવે દુનિયામાં એ ચર્ચા નથી થતી કે ભારત ઈનોવેશન (નવીનતા) કરે છે કે નહીં, પરંતુ ચર્ચા એ વાતની છે કે કોણ ભારત સાથે મળીને ઈનોવેશન કરવા માંગે છે. તેમણે ભારપૂર્વક કહ્યું કે ફ્રાન્સ આ બાબતે ભારતની સાથે ખભેખભો મિલાવીને ઉભું છે.
પેરિસમાં ભારત-ફ્રાન્સ ઈનોવેશન ડેની ઉજવણી
વડાપ્રધાન મોદીના સૂચનનો સ્વીકાર કરતા મેક્રોને જાહેરાત કરી કે પેરિસમાં યોજાનારા G7 સંમેલનના એક દિવસ પહેલા ‘ઈનોવેશન ડે’ ઉજવવામાં આવશે. આ કાર્યક્રમ ‘ફ્રેન્કો-ઈન્ડિયન ઈનિશિએટિવ’ હેઠળ આયોજિત થશે, જેમાં બંને દેશોના તેજસ્વી વિદ્યાર્થીઓ અને સંશોધકો ભાગ લેશે. બંને નેતાઓએ સંયુક્ત રીતે ‘ઈન્ડિયા-ફ્રાન્સ યર ઓફ ઈનોવેશન ૨૦૨૬’ લોન્ચ કર્યું છે.
આ સમાચાર પણ વાંચો : US-Iran Conflict Update: ડોનાલ્ડ ટ્રમ્પની ચેતવણીને ઈરાને ઘોળીને પીધી, જિનેવા મંત્રણા બાદ જેડી વેન્સે યુદ્ધના સંકેત આપ્યા.
ભારતીય પ્રતિભાનો વિશ્વમાં ડંકો
મેક્રોને વૈશ્વિક ટેકનોલોજી કંપનીઓમાં ભારતીય મૂળના નેતૃત્વની મુક્ત કંઠે પ્રશંસા કરી હતી. તેમણે આલ્ફાબેટ, માઈક્રોસોફ્ટ, IBM અને એડોબ જેવી કંપનીઓના ભારતીય CEO નો ઉલ્લેખ કરતા કહ્યું કે ભારત માત્ર ગ્લોબલ ઈનોવેશનમાં ભાગ નથી લેતું, પરંતુ તે દુનિયાને લીડ કરી રહ્યું છે. તેમણે ઉમેર્યું કે ભારત-ફ્રાન્સની ભાગીદારી સામાન્ય નાગરિકોના જીવનને વધુ સુરક્ષિત અને સ્વસ્થ બનાવવા પર ધ્યાન કેન્દ્રિત કરશે.
વ્યૂહાત્મક ભાગીદારીની નવી ઉંચાઈ
આ મુલાકાત દરમિયાન સંરક્ષણ અને ટેકનોલોજીના ક્ષેત્રમાં અનેક મહત્વના નિર્ણયો લેવામાં આવ્યા છે. મેક્રોનનો ‘જય હો’ વાળો મેસેજ એ વાતનો સંકેત છે કે પશ્ચિમી દેશોમાં ફ્રાન્સ ભારતનો સૌથી વિશ્વાસુ મિત્ર બનીને ઉભર્યો છે. આ મજબૂત મિત્રતા જોઈને પડોશી દેશોમાં ચોક્કસપણે ફફડાટ જોવા મળી રહ્યો છે.
