News Continuous Bureau | Mumbai
Iran New Supreme Leader પશ્ચિમ એશિયાના અશાંત વાતાવરણ વચ્ચે ઈરાનથી સૌથી મોટા સમાચાર સામે આવ્યા છે. અહેવાલો અનુસાર, ઈરાનના દિવંગત સર્વોચ્ચ નેતા અલી ખામેનેઈના પુત્ર મુજતબા ખામેનેઈને દેશના નવા સર્વોચ્ચ નેતા તરીકે ચૂંટવામાં આવ્યા છે. ઈરાન ઈન્ટરનેશનલના અહેવાલ મુજબ, નિષ્ણાતોની સભાએ વિશ્વસનીય સ્ત્રોતોને ટાંકીને આ માહિતી આપી છે. નોંધનીય છે કે અમેરિકા અને ઈઝરાયેલની સંયુક્ત કાર્યવાહીમાં અલી ખામેનેઈનું નિધન થયું હતું, ત્યારબાદ આ પદ ખાલી પડ્યું હતું.
કોણ છે મુજતબા ખામેનેઈ?
મુજતબા ખામેનેઈની ઉંમર 56 વર્ષ છે અને તેઓ એક શિયા ધર્મગુરુ છે. તેમણે ઈરાન-ઈરાક યુદ્ધ દરમિયાન ઈરાની સશસ્ત્ર દળોમાં સેવા આપી હતી. મુજતબા ક્યારેય કોઈ સત્તાવાર સરકારી પદ પર રહ્યા નથી, પરંતુ ઈસ્લામિક રિવોલ્યુશનરી ગાર્ડ કોર્પ્સ સાથેના તેમના ગાઢ સંબંધોને કારણે તેઓ પડદા પાછળથી હંમેશા શક્તિશાળી રહ્યા છે. વર્ષ 2019માં અમેરિકાએ તેમના પર પ્રતિબંધો પણ લગાવ્યા હતા, કારણ કે તેઓ સત્તાવાર હોદ્દા વગર પણ તેમના પિતા વતી મહત્વના નિર્ણયો લેતા હતા.
સર્વોચ્ચ નેતા પાસે કેટલી સત્તા હોય છે?
ઈરાનમાં સર્વોચ્ચ નેતાનું પદ સૌથી શક્તિશાળી માનવામાં આવે છે. દેશના સંરક્ષણ, યુદ્ધ, શાંતિ અને વિવાદાસ્પદ પરમાણુ કાર્યક્રમ સહિતના તમામ વ્યૂહાત્મક નિર્ણયો લેવાનો અંતિમ અધિકાર આ નેતા પાસે જ હોય છે. મુજતબાની વરણીમાં ઈરાની ક્રાંતિકારી ગાર્ડ કોર્પ્સ (IRGC) એ મોટું દબાણ ઊભું કર્યું હોવાનું કહેવાય છે, કારણ કે સેના ઈચ્છે છે કે સત્તા એવા વ્યક્તિ પાસે રહે જે તેમની વિચારધારાને મજબૂત રીતે આગળ વધારી શકે.
આ સમાચાર પણ વાંચો : Mumbai Jewellery Firm Theft: મુંબઈ: અંધેરીની જ્વેલરી ફર્મમાં કર્મચારીઓએ જ કરી ₹14.75 લાખના સોનાની ચોરી; CCTV કેમેરા ને કારણે ભાંડો ફૂટ્યો, બેની ધરપકડ.
વારસદારની યાદીમાંથી કેમ દૂર કરાયા હતા?
આશ્ચર્યની વાત એ છે કે, અલી ખામેનેઈએ ગત વર્ષે તૈયાર કરેલી સંભવિત વારસદારોની યાદીમાંથી પોતાના પુત્ર મુજતબાનું નામ બાકાત રાખ્યું હતું. ઈરાની શિયા ધાર્મિક સંસ્થાઓમાં પિતા પાસેથી પુત્રને સત્તા સોંપવાની પ્રથાને બહુ સારી નજરે જોવામાં આવતી નથી. જોકે, બદલાયેલી ભૌગોલિક-રાજકીય પરિસ્થિતિ અને કટોકટીના સમયે ઈરાને આખરે મુજતબા ખામેનેઈ પર પસંદગીનો કળશ ઢોળ્યો છે, જે હવે ઈરાનના ભવિષ્યની દિશા નક્કી કરશે.
