News Continuous Bureau | Mumbai

Private jet crash કેરેબિયન દેશ ડોમિનિકન રિપબ્લિકમાં રવિવારે એક મોટી દુર્ઘટના સર્જાઈ હતી. લા રોમાના ઈન્ટરનેશનલ એરપોર્ટ પર એક અમેરિકન રજિસ્ટર્ડ બિઝનેસ જેટ દુર્ઘટનાગ્રસ્ત થયું હતું. આ દુર્ઘટનામાં વિમાનના પાયલટ અને કોપાયલટ એમ કુલ બે ક્રૂ મેમ્બર્સના મોત થયા છે. સદનસીબે વિમાનમાં અન્ય કોઈ મુસાફરો સવાર નહોતા. અધિકારીઓના જણાવ્યા અનુસાર, વિમાન ટેક્સાસના ઓસ્ટિન તરફ જઈ રહ્યું હતું ત્યારે આ ગોઝારી ઘટના બની હતી.

Private jet crash: ટેકનિકલ ખામી અને ઈમરજન્સી લેન્ડિંગ

પ્રારંભિક તપાસમાં બહાર આવ્યું છે કે, ગલ્ફસ્ટ્રીમ G200 જેટ વિમાન ઉડાન ભર્યા બાદ લગભગ 16 નોટિકલ માઈલ દૂર હતું ત્યારે તેમાં ગંભીર ટેકનિકલ ખામી સર્જાઈ હતી. ત્યારબાદ ક્રૂ મેમ્બર્સે ઈમરજન્સી જાહેર કરીને વિમાનને લા રોમાના એરપોર્ટ પર પરત લાવવાનો નિર્ણય કર્યો હતો. એરપોર્ટ પર પાછા ફરતી વખતે રનવે પર લેન્ડિંગ કરવાનો પ્રયાસ નિષ્ફળ રહ્યો હતો અને વિમાન ક્રેશ થઈને આગના ગોળામાં ફેરવાઈ ગયું હતું.

Private jet crash: દુર્ઘટના અને બચાવ કામગીરી

સોશિયલ મીડિયા પર વાયરલ થયેલા વીડિયોમાં સ્પષ્ટ જોઈ શકાય છે કે લેન્ડિંગ દરમિયાન વિમાન રનવે પરથી લપસી ગયું હતું અને ત્યારબાદ તેમાં ભીષણ વિસ્ફોટ થયો હતો. એરપોર્ટ પર હાજર ફાયર ફાઈટરની ટીમોએ તાત્કાલિક આગ પર કાબૂ મેળવવાના પ્રયાસો કર્યા હતા, પરંતુ દુર્ઘટના એટલી ભયાનક હતી કે પાયલટ અને કો-પાયલટને બચાવી શકાયા નહોતા. અધિકારીઓએ દુર્ઘટનાના કારણોની તપાસ માટે ઉચ્ચ સ્તરીય કમિશનની રચના કરી છે.

Private jet crash: તપાસના આદેશ અને સ્થિતિ

ડોમિનિકન ઇન્સ્ટિટ્યૂટ ઓફ સિવિલ એવિએશન (IDAC) અને એવિએશન એક્સિડન્ટ ઇન્વેસ્ટિગેશન કમિશન (CIAA) આ સમગ્ર મામલે તપાસ કરી રહ્યા છે. હાલમાં એરપોર્ટ પર સુરક્ષા પ્રોટોકોલ સક્રિય કરવામાં આવ્યા છે. નિષ્ણાતો ફ્લાઇટ ડેટા અને બ્લેક બોક્સની મદદથી જાણી રહ્યા છે કે આખરે વિમાનમાં કઈ પ્રકારની ટેકનિકલ સમસ્યા આવી હતી. આ દુર્ઘટના બાદ સમગ્ર વિસ્તારમાં ખળભળાટ મચી ગયો છે.

👉 આ સમાચાર વાચો:
BEST Accident મુંબઈમાં અકસ્માતનો સિલસિલો દાદરમાં BEST બસ બની ‘યમદૂત’, એકસાથે અનેક વાહનોને લીધા અડફેટમાં!