News Continuous Bureau | Mumbai
અમેરિકા અને ઈરાન વચ્ચે ચાલી રહેલા ભીષણ યુદ્ધમાં હવે રશિયાએ પણ ઝંપલાવ્યું છે. અત્યાર સુધી આ જંગથી અંતર જાળવી રાખનાર રશિયા હવે પોતાના મિત્ર ઈરાનની મદદ માટે આગળ આવ્યું છે. ન્યૂઝ એજન્સી ના અહેવાલ મુજબ, મોસ્કોએ તેહરાનને એવી અત્યંત સંવેદનશીલ ગુપ્ત માહિતી પૂરી પાડી છે, જેનાથી ઈરાનને આ વિસ્તારમાં તૈનાત અમેરિકન યુદ્ધજહાજો, વિમાનો અને અન્ય સૈન્ય સંપત્તિઓ પર સચોટ હુમલો કરવામાં મદદ મળી શકે છે.
રશિયા અને ઈરાન વચ્ચે વધતી નિકટતા
રશિયાએ યુક્રેન સામેના ચાર વર્ષ જૂના યુદ્ધમાં ઈરાન પાસેથી મિસાઈલ અને ડ્રોન મેળવ્યા હોવાથી બંને દેશોના સંબંધો વધુ મજબૂત બન્યા છે. બીજી તરફ, પરમાણુ કાર્યક્રમ અને હમાસ-હિઝબુલ્લાહ જેવા જૂથોને ટેકો આપવા બદલ વર્ષોથી અલગ-અલગ પડેલા ઈરાન માટે રશિયાનો આ સહયોગ અત્યંત મહત્વનો સાબિત થશે. રશિયાના આ પગલાથી મિડલ ઈસ્ટમાં ચાલી રહેલો સંઘર્ષ હવે વૈશ્વિક સ્તરે વિસ્તરે તેવી શક્યતા છે.
આ સમાચાર પણ વાંચો : Amitabh Bachchan Ayodhya Property: અમિતાભ બચ્ચને અયોધ્યામાં ૨.૬૭ એકર જમીન ખરીદી, રામ મંદિરથી છે આટલી નજીક; જાણો કિંમત અને લોકેશન
પુતિને ઈરાની રાષ્ટ્રપતિ સાથે કરી વાત
રશિયન પ્રેસિડેન્ટ વ્લાદિમીર પુતિને ઈરાનના રાષ્ટ્રપતિ મસૂદ પેઝેશ્કિયન સાથે ફોન પર વાતચીત કરી હતી. પુતિને સુપ્રીમ લીડર આયાતુલ્લા અલી ખામેનેઈના મૃત્યુ અને હુમલામાં માર્યા ગયેલા સામાન્ય નાગરિકો પ્રત્યે દુઃખ વ્યક્ત કર્યું હતું. પુતિને હિંસા તુરંત રોકવા અને રાજદ્વારી માર્ગ અપનાવવા પર ભાર મૂક્યો હતો. યુદ્ધ શરૂ થયા બાદ ક્રેમલિન તરફથી ઈરાનને કરવામાં આવેલો આ પ્રથમ સત્તાવાર કોલ હતો.
અમેરિકાનો વળતો પ્રહાર અને નિવેદન
રશિયા દ્વારા ઈરાનને માહિતી આપવા મુદ્દે અમેરિકાએ કડક વલણ અપનાવ્યું છે. વ્હાઇટ હાઉસે જણાવ્યું કે, રશિયાની મદદ છતાં ઈરાનમાં ચાલી રહેલા તેમના સૈન્ય ઓપરેશન્સ પર કોઈ અસર નહીં પડે. અમેરિકા અને ઈઝરાયેલ અત્યારે ઈરાનની સૈન્ય તાકાતને નેસ્તનાબૂદ કરવા માટે સતત હુમલા કરી રહ્યા છે. બીજી તરફ, ઈરાને પણ ઈઝરાયેલ સહિત મિડલ ઈસ્ટના ૧૨ દેશોમાં આવેલા અમેરિકી સૈન્ય ઠેકાણાઓ પર બેલેસ્ટિક મિસાઈલોથી હુમલા તેજ કર્યા છે. ટ્રમ્પની ધમકી છતાં ઈરાન અત્યારે ઝૂકવા તૈયાર હોય તેમ લાગતું નથી.
