News Continuous Bureau | Mumbai
Saudi Oil Supply to India મિડલ ઈસ્ટમાં જારી જંગને કારણે દુનિયાના સૌથી મહત્વના તેલ માર્ગ ‘સ્ટ્રેટ ઓફ હોર્મુઝ’ પર જોખમ વધી ગયું છે. આ સ્થિતિમાં સાઉદી અરેબિયાએ ભારતને તેલનો પુરવઠો અવિરત રાખવા માટે લાલ સમુદ્ર (Red Sea) ના માર્ગનો આશરો લીધો છે. સાઉદીના યાનબુ પોર્ટથી તેલ ભરેલા અનેક ટેન્કરો ભારત માટે રવાના થઈ ચૂક્યા છે, જે હોર્મુઝના જોખમી રસ્તાને ટાળીને ભારત પહોંચશે.કેપ્લર (Kepler) ના રિપોર્ટ મુજબ, હાલમાં ૪ મોટા ટેન્કરો ભારત તરફ આવી રહ્યા છે, જેમાં અંદાજે ૬૦ લાખ બેરલ તેલ છે.
સાઉદીનો માસ્ટર પ્લાન અને વૈકલ્પિક રૂટ
સામાન્ય રીતે ભારત ખાડી દેશોમાંથી મોટાભાગનું તેલ હોર્મુઝના માર્ગે મંગાવે છે, જે અત્યારે ઈરાની મિસાઈલ હુમલાને કારણે અસુરક્ષિત છે. સાઉદી અરેબિયાએ આનો ઉકેલ લાવવા માટે ૧૨૦૦ કિલોમીટર લાંબી પાઇપલાઇન દ્વારા તેલને પશ્ચિમ કિનારે આવેલા યાનબુ પોર્ટ સુધી પહોંચાડ્યું છે. ત્યાંથી હવે ટેન્કરો મારફતે તેલ ભારત મોકલવામાં આવી રહ્યું છે. મહિનાના અંત સુધીમાં કુલ ૧ કરોડ બેરલ વધારાનું તેલ આવવાની અપેક્ષા છે.
લાલ સમુદ્રમાં પણ ‘હૂતી’નો ખતરો
જોકે, આ નવો રસ્તો પણ સંપૂર્ણ સુરક્ષિત નથી. બાબ અલ-મંડેબ પાસે હૂતી વિદ્રોહીઓ અગાઉ જહાજો પર હુમલા કરી ચૂક્યા છે. તેમ છતાં, હોર્મુઝની સરખામણીએ આ માર્ગ અત્યારે ભારત માટે ઉર્જા સુરક્ષા જાળવી રાખવા માટે વધુ યોગ્ય છે. સાઉદીના આ પગલાથી ભારતીય બજારમાં પેટ્રોલ-ડીઝલની અછત સર્જાય તેવી શક્યતા ઓછી થઈ ગઈ છે.
આ સમાચાર પણ વાંચો : Mumbai Local 15 Coach Train Update: મુંબઈગરાઓને પશ્ચિમ રેલ્વેની ‘ગુડી પડવા’ ગિફ્ટ: વિરાર-ચર્ચગેટ વચ્ચે ૧૫ ડબ્બાની લોકલના ફેરા વધશે, હવે મુસાફરી થશે વધુ આરામદાયક
અમેરિકાની સૈન્ય કાર્યવાહી
બીજી તરફ, અમેરિકાએ ૧૭ માર્ચ ૨૦૨૬ના રોજ હોર્મુઝ પર ઈરાનના એન્ટી-શિપ મિસાઈલ ઠેકાણાઓ પર બોમ્બમારો કર્યો છે. અમેરિકા આ માર્ગ પરથી ઈરાનનું નિયંત્રણ ઓછું કરવા માંગે છે જેથી વૈશ્વિક તેલ વ્યાપાર ફરીથી પાટા પર આવી શકે. ઈરાન-અમેરિકાના આ યુદ્ધમાં સાઉદી અરેબિયાનું ભારત તરફી વલણ કૂટનીતિક દ્રષ્ટિએ પણ મહત્વનું માનવામાં આવે છે.
