News Continuous Bureau | Mumbai
ઈરાન અને અમેરિકા વચ્ચે જારી યુદ્ધમાં સોમવારે તેહરાનની એક પ્રતિષ્ઠિત યુનિવર્સિટી પર હવાઈ હુમલા કરવામાં આવ્યા છે. ઈરાની મીડિયાના અહેવાલ મુજબ, તેહરાનના દક્ષિણ-પશ્ચિમમાં આવેલી ‘શરીફ યુનિવર્સિટી ઓફ ટેકનોલોજી’ પર થયેલા હુમલામાં ઓછામાં ઓછા 13 લોકોના મોત થયા છે. આ હુમલા બાદ સમગ્ર વિસ્તારમાં કુદરતી ગેસ નો સપ્લાય પણ ખોરવાઈ ગયો છે. રાતભર તેહરાનમાં વિસ્ફોટોના અવાજ સંભળાતા રહ્યા અને નીચી ઊંચાઈએ ઉડતા લડાયક વિમાનોના ગુંજારવથી લોકોમાં ફફડાટ ફેલાયો હતો.
મિસાઈલ પ્રોગ્રામમાં યુનિવર્સિટીની ભૂમિકા હોવાની શંકા
હુમલામાં નિશાન બનેલી શરીફ યુનિવર્સિટી પર ઈરાનના બેલિસ્ટિક મિસાઈલ પ્રોગ્રામમાં સામેલ હોવાનો આરોપ છે. આ કાર્યક્રમ ઈરાની અર્ધલશ્કરી દળ ‘રિવોલ્યુશનરી ગાર્ડ’ દ્વારા નિયંત્રિત થાય છે. ભૂતકાળમાં પણ અનેક દેશોએ આ યુનિવર્સિટી પર સેના સાથે મળીને કામ કરવાના આરોપમાં પ્રતિબંધો લાદ્યા છે. જોકે, યુદ્ધને કારણે શાળાઓમાં ઓનલાઈન ક્લાસ ચાલતા હોવાથી હુમલા સમયે યુનિવર્સિટીમાં કોઈ વિદ્યાર્થીઓ હાજર નહોતા, જે મોટી હોનારત ટાળવામાં મદદરૂપ નીવડ્યું છે.
આ સમાચાર પણ વાંચો : Terror Plan EXPOSED: આતંકીઓના મોબાઈલે ખોલી પોલ! ATSને મળી ભયાનક તબાહીની બ્લૂપ્રિન્ટ, પૂછપરછમાં અનેક મોટા માથાઓના નામ ખૂલવાની શક્યતા
પવિત્ર શહેર કોમમાં પણ હુમલો, 5 લોકોના મોત
તેહરાન ઉપરાંત શિયા સમુદાયના પવિત્ર ધાર્મિક શહેર કોમ (Qom) માં પણ રહેણાંક વિસ્તારમાં હવાઈ હુમલો થયો છે.મીડિયા રિપોર્ટ મુજબ, આ હુમલામાં ઓછામાં ઓછા 5 લોકોના મોત થયા છે. ઈરાન સરકાર દ્વારા છેલ્લા ઘણા દિવસોથી જાન-માલના નુકસાનના સત્તાવાર આંકડા જાહેર કરવામાં આવ્યા નથી, જેના કારણે વાસ્તવિક નુકસાન ઘણું વધારે હોવાની આશંકા સેવાઈ રહી છે.
ગેસ સપ્લાય ખોરવાતા તેહરાનમાં હાલાકી
સરકારી પ્રસારક ના જણાવ્યા અનુસાર, હુમલામાં શરીફ યુનિવર્સિટી પાસે આવેલા નેચરલ ગેસ ડિસ્ટ્રિબ્યુશન સેન્ટરને પણ ભારે નુકસાન પહોંચ્યું છે. આ હુમલાને કારણે તેહરાનના ‘ડિસ્ટ્રિક્ટ 9’ વિસ્તારમાં ગેસ પુરવઠો સંપૂર્ણપણે બંધ થઈ ગયો છે. યુદ્ધની સ્થિતિમાં ઉર્જા સ્ત્રોતો પરના હુમલાએ ઈરાની જનતાની મુશ્કેલીઓમાં વધારો કર્યો છે. ઈરાને હજુ સુધી તેના લશ્કરી સાધનોને થયેલા નુકસાન વિશે કોઈ વિગતો આપી નથી.
