News Continuous Bureau | Mumbai
US Iran War Bandar Abbas 2026| અમેરિકા અને ઈરાન વચ્ચે ચાલી રહેલો ભયાનક તણાવ એકવાર ફરી અત્યંત ખતરનાક વળાંક પર પહોંચી ગયો છે. હોર્મુઝ સ્ટ્રેટ (Strait of Hormuz) ની નજીક આવેલા ઈરાનના વ્યૂહાત્મક વિસ્તાર બંદર અબ્બાસ પર અમેરિકા દ્વારા કરવામાં આવેલી નવી એરસ્ટ્રાઈક બાદ તેહરાને આકરી પ્રતિક્રિયા આપી છે. ઈરાને આરોપ લગાવ્યો છે કે અમેરિકાએ છેલ્લા સાત અઠવાડિયાથી ચાલી રહેલા યુદ્ધવિરામ (Ceasefire) નો ભંગ કર્યો છે, જેના કારણે આ વિસ્તારમાં શાંતિ સ્થાપવાના વૈશ્વિક પ્રયાસોને બહુ મોટો ઝટકો લાગ્યો છે. આ નવા સૈન્ય સંઘર્ષને કારણે સમગ્ર પશ્ચિમ એશિયામાં યુદ્ધની સ્થિતિ વધુ વણસી ગઈ છે.
અમેરિકાએ હુમલાને ‘રક્ષણાત્મક કાર્યવાહી’ ગણાવી
ઈરાની મીડિયાના અહેવાલો અનુસાર, મંગળવારે વહેલી સવારે હોરમોઝગાન પ્રાંતમાં શ્રેણીબદ્ધ પ્રચંડ ધડાકાઓ સંભળાયા હતા. બીજી તરફ, અમેરિકી સંરક્ષણ મંત્રાલયે આ હુમલાને ન્યાયી ઠેરવતા તેને “રક્ષણાત્મક કાર્યવાહી” ગણાવી છે. અમેરિકાએ દાવો કર્યો છે કે તેણે ઈરાનની એ મિસાઈલ પોઝિશન્સ અને સૈન્ય નૌકાઓને નિશાન બનાવી છે, જે કથિત રીતે હોર્મુઝ સ્ટ્રેટના આંતરરાષ્ટ્રીય દરિયાઈ માર્ગમાં નૌકાઓ માટે ખતરનાક બારૂદી સુરંગો (Marines Mines) બિછાવવાની તૈયારી કરી રહી હતી.
ઈરાનનો વળતો મોટો દાવો
આ હુમલાની વચ્ચે ઈરાને અમેરિકાને મોટું સૈન્ય નુકસાન પહોંચાડવાનો દાવો કર્યો છે. ભારતમાં આવેલી ઈરાની એમ્બેસીએ સત્તાવાર નિવેદન જારી કરતા દાવો કર્યો છે કે, “અમે સચોટ નિશાન લગાવીને અમેરિકાનું અદભુત MQ-9 ડ્રોન તોડી પાડ્યું છે, જ્યારે અમેરિકાના અત્યાધુનિક F-35 ફાઇટર જેટ અને RQ-4 ડ્રોનને અમારી મિસાઈલ ડિફેન્સ સિસ્ટમ જોઈને પાછા ભાગવું પડ્યું છે. હવે એ સમય પૂરો થઈ ગયો છે જ્યારે પશ્ચિમ એશિયા પશ્ચિમી દેશોથી ડરીને શાંત બેસી રહેતું હતું.” જો કે, અમેરિકાએ હજુ સુધી પોતાના કોઈ ફાઇટર જેટ કે ડ્રોનને નુકસાન થયું હોવાની સત્તાવાર પુષ્ટિ કરી નથી.
૨૪ અબજ ડોલરના ફ્રીઝ ફંડ પર અટકી પીસ ડીલ
આ ગંભીર તણાવની વચ્ચે અમેરિકી વિદેશ મંત્રી માર્કો રુબિયોએ જણાવ્યું છે કે મોટી પીસ ડીલ (શાંતિ કરાર) માટે વાતચીત હજુ પણ ચાલુ છે. બંને દેશો વચ્ચે ૩૦ દિવસના ફ્રેમવર્ક હેઠળ હોર્મુઝ સ્ટ્રેટમાં જહાજોની અવરજવર સામાન્ય કરવા ચર્ચા ચાલી રહી છે, પરંતુ ઈરાનની ૨૪ અબજ ડોલરની ફ્રીઝ (જપ્ત) કરાયેલી સંપત્તિને મુક્ત કરવાની માંગના કારણે આ કરાર અટકી પડ્યો છે. ઉલ્લેખનીય છે કે વિશ્વના ૨૦ ટકા તેલ અને એલએનજી (LNG) નો વેપાર આ જ દરિયાઈ માર્ગેથી થાય છે. આ યુદ્ધના કારણે વૈશ્વિક બજારમાં બ્રેન્ટ ક્રૂડ ઓઈલની કિંમત ઉછળીને ૧૦૦ ડોલર પ્રતિ બેરલની નજીક પહોંચી ગઈ છે, જેનાથી સમગ્ર વિશ્વમાં મોંઘવારી વધવાનો ખતરો ઊભો થયો છે.
👉 આ સમાચાર વાચો:
Today’s Horoscope : આજનો દિવસ:૨૭ મે ૨૦૨૬, બુધવાર, જાણો આપનું રાશિફળ
