News Continuous Bureau | Mumbai
US Sanctions Russia Iran Oil| વૈશ્વિક રાજનીતિમાં આવેલા મોટા વળાંકમાં અમેરિકાએ રશિયા અને ઈરાન પાસેથી તેલની ખરીદી પર આપેલી છૂટછાટને આગળ ન વધારવાનો નિર્ણય લીધો છે. અમેરિકી નાણામંત્રી સ્કોટ બેસેન્ટે સ્પષ્ટ કર્યું છે કે રશિયન અને ઈરાની તેલ પરના લાયસન્સ રિન્યૂ કરવામાં આવશે નહીં. આ નિર્ણયથી ભારત માટે તેલની આયાતનો મોટો પડકાર ઉભો થયો છે, કારણ કે માર્ચ 2026માં ભારતની રશિયન તેલની આયાત રેકોર્ડ સ્તરે પહોંચી હતી. હવે ભારતે તેલ પુરવઠા માટે નવા વિકલ્પો શોધવા પડશે.
રશિયા અને ઈરાન પર પ્રતિબંધોની કડક અમલવારી
અમેરિકાના જણાવ્યા અનુસાર, રશિયન કાર્ગો માટે 30 દિવસનું સામાન્ય લાયસન્સ હવે સમાપ્ત થઈ ગયું છે, જ્યારે ઈરાની તેલ માટેની છૂટ 19 એપ્રિલ 2026ના રોજ ખતમ થઈ જશે. આ છૂટછાટ માત્ર એવા કાર્ગો માટે હતી જે 11 માર્ચ પહેલા સમુદ્રમાં હતા. ભારતીય તેલ કંપનીઓ (OMCs) એ ગત મહિનાઓમાં ડિસ્કાઉન્ટ પર રશિયન તેલની ખરીદીમાં 53 ટકાનો વધારો કર્યો હતો, પરંતુ હવે આ કાયદાકીય તક સમાપ્ત થતા ભારતે અન્ય દેશો તરફ વળવું પડશે.
ભારતના તેલ આયાત માટેના નવા વિકલ્પો
ભારત સરકારે પહેલેથી જ તેના તેલ આયાત પોર્ટફોલિયોમાં વિવિધતા લાવવા પર ભાર મૂક્યો છે. ભારત અત્યારે 40 થી વધુ દેશોમાંથી ઉર્જાનો આયાત કરી રહ્યું છે. હોર્મુઝ સ્ટ્રેટમાં ચાલી રહેલા તણાવ અને અમેરિકી પ્રતિબંધોને જોતા હવે ભારત લેટિન અમેરિકાના દેશો જેવા કે બ્રાઝિલ, કોલંબિયા અને ઈક્વાડોર પાસેથી ખરીદી વધારી શકે છે. આ ઉપરાંત ગુયાના પણ એક ઝડપથી ઉભરી રહેલા તેલ નિકાસકાર તરીકે ભારતની યાદીમાં ટોચ પર છે.
આફ્રિકા અને અમેરિકા સાથે વધશે ભાગીદારી
પશ્ચિમ આફ્રિકાના દેશો નાઈજીરિયા અને અંગોલા પણ ભારત માટે મહત્વના વિકલ્પો સાબિત થઈ શકે છે. આ દેશો પાસેથી મળતું કાચું તેલ ખાડી દેશોના વિકલ્પ તરીકે ઉપયોગી બનશે. આ ઉપરાંત ભારત અમેરિકા પાસેથી પણ કાચા તેલની ખરીદી વધારી શકે છે. જોકે, રશિયા પાસેથી મળતા સસ્તા તેલની સરખામણીએ આ વિકલ્પો મોંઘા પડી શકે છે, જેના કારણે ભારતનો આયાત ખર્ચ વધવાની શક્યતા છે. તેમ છતાં, ભારતની ‘ઈમરજન્સી પ્લાનિંગ’ ઉર્જા સુરક્ષા સુનિશ્ચિત કરવા માટે તૈયાર છે.
👉 આ સમાચાર વાચો:
Gold Price Today| અક્ષય તૃતીયા પહેલા સોનાના ભાવમાં મોટો ઉછાળો, જાણો મુંબઈ અને અમદાવાદમાં 10 ગ્રામ સોનાનો આજનો ભાવ
