News Continuous Bureau | Mumbai
પશ્ચિમ એશિયામાં જારી જંગ બીજા મહિનામાં પ્રવેશી ચૂક્યો છે અને હવે તે વધુ હિંસક બન્યો છે. અમેરિકા અને ઈઝરાયેલ દ્વારા ઈરાનનો મહત્વનો બી-૧ (B1) પુલ તોડી પાડ્યા બાદ, બદલાની આગમાં સળગતા ઈરાને શુક્રવારે અમેરિકાના બે લડાકુ વિમાનો (F-15E અને A-10) તોડી પાડ્યા હોવાનો દાવો કર્યો છે. આ ઘટના બાદ આખા અખાતી દેશોમાં તણાવ ચરમસીમાએ પહોંચ્યો છે.
પાયલોટને પકડવા માટે ઈરાને ઈનામ જાહેર કર્યું
ઈરાની મીડિયાના અહેવાલ મુજબ, અમેરિકાના એ-૧૦ (A-10) વિમાનને હોર્મુઝ પાસે તોડી પાડવામાં આવ્યું છે. આ વિમાનના એક પાયલોટને બચાવી લેવાયો છે, પરંતુ બીજા પાયલોટની શોધ માટે અમેરિકા અને ઈઝરાયેલે મોટું અભિયાન શરૂ કર્યું છે. બીજી તરફ, ઈરાનના ગવર્નરે જાહેરાત કરી છે કે જે કોઈ આ પાયલોટને પકડી લેશે અથવા મારી નાખશે તેને ઈનામ આપવામાં આવશે. આ સર્ચ ઓપરેશન દરમિયાન અમેરિકાનું એક બ્લેક હોક હેલિકોપ્ટર પણ ક્રેશ થયું હોવાના અહેવાલ છે.
આ સમાચાર પણ વાંચો: Good News from Hormuz: ચિંતા છોડો! હોર્મુઝથી ૭મું LPG ટેન્કર ભારત આવવા રવાના, ૫૮ હજાર મેટ્રિક ટન ગેસનો જથ્થો ટૂંક સમયમાં પહોંચશે
કુવૈત અને બહેરીન પર હુમલા, રિફાયનરીમાં લાગી આગ
ઈરાને માત્ર અમેરિકા જ નહીં, પરંતુ તેના સાથી દેશો પર પણ હુમલા તેજ કર્યા છે. કુવૈતની મીના અલ-અહમદી તેલ રિફાયનરી પર ઈરાની હુમલા બાદ ભીષણ આગ લાગી છે. આ ઉપરાંત, બહેરીનમાં પણ હુમલાના સાયરન સંભળાયા છે. ઈરાને ચેતવણી આપી છે કે તે કુવૈત, યુએઈ (UAE) અને જોર્ડનના મુખ્ય પુલોને નિશાન બનાવશે. અમેરિકાએ રજૂ કરેલો ૪૮ કલાકનો યુદ્ધવિરામનો પ્રસ્તાવ પણ ઈરાને ઠુકરાવી દીધો છે.
ટ્રમ્પનો હુંકાર- ‘થોડા સમયમાં હોર્મુઝ સ્ટ્રેટ ખોલી નાખીશું’
આ ભયાનક સ્થિતિ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે ‘ટ્રુથ સોશિયલ’ પર દાવો કર્યો છે કે અમેરિકા ટૂંક સમયમાં જ હોર્મુઝ સ્ટ્રેટ ખોલવામાં સફળ થશે. તેમણે કહ્યું કે, “યુદ્ધ ચાલી રહ્યું છે અને વિમાન પડવા છતાં ઈરાન સાથેની વાટાઘાટો પર કોઈ અસર નહીં પડે.” ટ્રમ્પના મતે હોર્મુઝ ખુલવાથી વિશ્વ માટે તેલના ભંડાર ખુલી જશે. દરમિયાન, યમનના હૂતી બળવાખોરોએ પણ ઈરાન અને હિઝબુલ્લાહ સાથે મળીને ઈઝરાયેલ પર બેલેસ્ટિક મિસાઈલો છોડી હોવાનો દાવો કર્યો છે.
