News Continuous Bureau | Mumbai
Zohran Mamdani અમેરિકાના સૌથી મોટા મહાનગરોમાંના એક ન્યૂયોર્કમાં ભારતીય મૂળના ડેમોક્રેટિક પાર્ટીના ઉમેદવાર ઝોહરાન મમદાની મેયર તરીકે ચૂંટાયા છે. તેમણે મેયરની ચૂંટણીમાં શાનદાર પ્રદર્શન કરીને જીત મેળવી છે. મમદાની છેલ્લા 100 વર્ષમાં ન્યૂયોર્કના મેયર બનનારા સૌથી યુવા, પહેલા ભારતવંશી મુસ્લિમ મેયર હશે. આ જીત અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ માટે મોટો ઝટકો છે, કારણ કે તેઓ ખુલ્લેઆમ મમદાનીની હાર ઈચ્છતા હતા. મમદાનીની આ જીત ડેમોક્રેટિક પાર્ટીની અંદર વિચારધારા અને પેઢીના સંઘર્ષનું પણ પ્રતીક છે.
ન્યૂયોર્કના ઇતિહાસમાં ઝોહરાન મમદાનીનો વિજય અને વિશેષતા
માત્ર 34 વર્ષની વયે ઝોહરાન મમદાની ન્યૂયોર્ક સિટીના મેયર બન્યા છે. તેમનો વિજય એટલા માટે પણ ઐતિહાસિક છે, કારણ કે તેઓ આ પદ સંભાળનારા પ્રથમ ભારતીય-અમેરિકન અને પ્રથમ મુસ્લિમ મેયર હશે. આ ઉપરાંત, તેઓ દક્ષિણ એશિયન મૂળના પણ પહેલા મેયર બનશે. ચૂંટણી સર્વેક્ષણોમાં પણ તેઓ આ પદ માટે સૌથી વધુ પસંદગીના ઉમેદવાર તરીકે ઉભરી આવ્યા હતા. મમદાનીએ પોતાના ચૂંટણી પ્રચારમાં વધતી મોંઘવારી ઘટાડવા અને આવાસ કટોકટીનો અંત લાવવાનું વચન આપ્યું હતું, જે યુવા મતદારોમાં ખૂબ જ લોકપ્રિય બન્યું હતું.
આ સમાચાર પણ વાંચો : KSBKBT 2 Spoiler: કયુંકી માં આવશે મોટો ટ્વીસ્ટ, અંગદ ને થશે વૃંદા માટે પ્રેમનો એહસાસ, તુલસી ની સામે નોયોના કરશે આવી હરકત, જાણો શો ના આવનાર એપિસોડ વિશે
ઝોહરાન મમદાનીનું બેકગ્રાઉન્ડ અને સ્પર્ધા
ઝોહરાન મમદાનીનું જોડાણ ભારત અને આફ્રિકા બંને સાથે છે. તેમનો જન્મ 1991માં યુગાન્ડાના કંપાલામાં થયો હતો. તેમની માતા પ્રખ્યાત ફિલ્મમેકર મીરા નાયર છે, જ્યારે તેમના પિતા મહમૂદ મમદાની ગુજરાત મૂળના ભારતીય મુસ્લિમ છે અને કોલંબિયા યુનિવર્સિટીમાં પ્રોફેસર છે. મમદાની સાત વર્ષની ઉંમરે ન્યૂયોર્ક આવ્યા અને અહીંના નાગરિક બન્યા. રાજકારણમાં આવતા પહેલા, મમદાની રેપર અને મ્યુઝિકલ આર્ટિસ્ટ પણ રહી ચૂક્યા છે. ન્યૂયોર્ક મેયરની ચૂંટણીમાં તેમનો મુકાબલો પૂર્વ ગવર્નર એન્ડ્રૂ કુઓમો (સ્વતંત્ર ઉમેદવાર) અને રિપબ્લિકન પાર્ટીના કર્ટીસ સ્લિવા સાથે હતો, પરંતુ ત્રિકોણીય મુકાબલામાં મમદાનીએ શાનદાર જીત મેળવી.
રાજકીય વિવાદો અને પૂર્વ રાષ્ટ્રપતિ ઓબામાના અભિનંદન
ઝોહરાન મમદાની તેમના નિવેદનોને કારણે ચર્ચામાં રહ્યા છે. તેઓ પોતાની જાતને “ડેમોક્રેટિક સોશિયાલિસ્ટ” તરીકે ઓળખાવે છે. આ ઉપરાંત, તેઓ ભારત વિરુદ્ધના વિવાદાસ્પદ નિવેદનો અને ખાસ કરીને વડાપ્રધાન નરેન્દ્ર મોદી વિરુદ્ધની ટિપ્પણીઓને કારણે પણ વિવાદમાં રહ્યા હતા. જોકે, તેમની જીત પર પૂર્વ અમેરિકી રાષ્ટ્રપતિ બરાક ઓબામા એ તેમને અભિનંદન પાઠવ્યા છે. ઓબામાએ સોશિયલ મીડિયા પર પોસ્ટ કરીને કહ્યું કે આ જીત એ વાત સાબિત કરે છે કે જ્યારે આપણે મજબૂત અને દૂરંદેશી નેતાઓ સાથે હોઈએ છીએ, જેઓ લોકોના મુદ્દાઓની પરવાહ કરે છે, તો આપણે જીતી શકીએ છીએ.
