News Continuous Bureau | Mumbai
World Cancer Day 2026: દરેક વર્ષે 4 ફેબ્રુઆરીને વિશ્વભરમાં ‘વર્લ્ડ કેન્સર ડે’ (World Cancer Day) તરીકે ઉજવવામાં આવે છે. આ દિવસનો મુખ્ય હેતુ લોકોને આ ભયાનક બીમારી પ્રત્યે જાગૃત કરવાનો છે. ભારતમાં કેન્સરના દર્દીઓની સંખ્યા ચિંતાજનક રીતે વધી રહી છે. આરોગ્ય નિષ્ણાતોના મતે, ઘણા લોકો શરૂઆતના લક્ષણોને સામાન્ય બીમારી સમજીને અવગણના (Ignore) કરે છે, જે પાછળથી ગંભીર સ્વરૂપ ધારણ કરે છે.નિષ્ણાતો જણાવે છે કે જો કેન્સરનું નિદાન શરૂઆતના તબક્કામાં થઈ જાય, તો યોગ્ય સારવાર દ્વારા દર્દીનો જીવ બચાવી શકાય છે. ભારતમાં ખાસ કરીને 5 પ્રકારના કેન્સર સૌથી વધુ જોવા મળે છે. આજના દિવસે આપણે આ કેન્સરના લક્ષણો અને તેનાથી બચવાના ઉપાયો વિશે વિગતવાર માહિતી મેળવીશું.
સ્તન કેન્સર અને મોઢાનું કેન્સર
ભારતીય મહિલાઓમાં સ્તન કેન્સર (Breast Cancer) ના કેસ સૌથી વધુ છે. હવે આ બીમારી નાની ઉંમરની મહિલાઓમાં પણ જોવા મળે છે. સ્તનમાં ગાંઠ અનુભવાય, આકારમાં ફેરફાર થાય અથવા અસામાન્ય ડિસ્ચાર્જ થાય તો તે સ્તન કેન્સરના લક્ષણો હોઈ શકે છે. બીજી તરફ, પુરુષોમાં મોઢાનું કેન્સર સૌથી વધુ ફેલાઈ રહ્યું છે. તમાકુ, ગુટખા અને ખૈનીના સેવનથી મોઢામાં લાંબા સમય સુધી ન રુઝાતા ચાંદા, સફેદ કે લાલ ડાઘા અને ગળવામાં તકલીફ એ તેના મુખ્ય લક્ષણો છે.
સર્વાઇકલ અને ફેફસાનું કેન્સર
મહિલાઓમાં મૃત્યુનું બીજું મોટું કારણ સર્વાઇકલ કેન્સર (Cervical Cancer) છે. માસિક ચક્ર વચ્ચે બ્લીડિંગ થવું કે પીઠના નીચેના ભાગમાં સતત દુખાવો થવો તેના સંકેતો છે. જોકે, વેક્સિન દ્વારા તેને રોકી શકાય છે. ફેફસાનું કેન્સર હવે ધૂમ્રપાન ન કરતા લોકોમાં પણ પ્રદૂષણને કારણે વધી રહ્યું છે. સતત ખાંસી, ગળફામાં લોહી પડવું અને શ્વાસ લેવામાં તકલીફ એ ફેફસાના કેન્સરના શરૂઆતના ચિહ્નો હોઈ શકે છે.
આ સમાચાર પણ વાંચો : Ghaziabad Sister: ઓનલાઇન ગેમના ચક્કરમાં 3 બહેનોએ મોતની છલાંગ લગાવી, માતા-પિતા માટે છોડતી ગઈ કરુણ ચીઠ્ઠી.
કોલોરેક્ટલ કેન્સર: જંક ફૂડની અસર
ખરાબ ખાનપાન અને જંક ફૂડ ને કારણે યુવા પેઢીમાં કોલોરેક્ટલ (કોલન) કેન્સરના કેસ વધી રહ્યા છે. પેટમાં સતત ગેસ કે કબજિયાત રહેવી, મળમાં લોહી આવવું અને ભૂખ ન લાગવી એ આ કેન્સરના લક્ષણો છે. લોકો ઘણીવાર તેને સામાન્ય પેટની સમસ્યા સમજીને ભૂલ કરે છે. ડાયેટમાં ફાઈબરયુક્ત ખોરાક લેવો અને નિયમિત કસરત કરવી તેનાથી બચવા માટે અનિવાર્ય છે.
