News Continuous Bureau | Mumbai
Iphone Privacy Features। આજના ડિજિટલ યુગમાં સ્માર્ટફોન યુઝર્સ માટે પર્સનલ ડેટા અને પ્રાઇવસીની સુરક્ષા સૌથી મોટો પડકાર બની ગઈ છે. જો તમે પણ એપલનો આઇફોન (iPhone) વાપરતા હોવ, તો તમે ક્યારેક ને ક્યારેક સ્ક્રીનની ટોચ પર દેખાતા નાના લીલા (Green) અથવા નારંગી (Orange) રંગના ટપકાં (ડોટ્સ) જરૂર જોયા હશે. મોટાભાગના યુઝર્સ આ સંકેતોને સામાન્ય સમજીને નજરઅંદાજ કરી દે છે, પરંતુ વાસ્તવમાં આ એપલના સૌથી શક્તિશાળી પ્રાઇવસી ફીચર્સમાંથી (Privacy Features) એક છે. ટેકનોલોજી અહેવાલો અનુસાર, આ બંને ડોટ્સ તમને રિયલ ટાઈમમાં એલર્ટ કરે છે કે તમારા ફોનનો કેમેરો કે માઇક્રોફોન અત્યારે ચાલુ છે કે નહીં, જેથી કોઈ તમારા પર જાસૂસી ન કરી શકે.
ગ્રીન ડોટનો મતલબ કેમેરો ઓન છે, બંને ફીચર સાથે ચાલુ હોય તો પણ લીલો જ રંગ દેખાશે
જો તમારા આઇફોનની સ્ક્રીન પર ઉપરના ભાગમાં લીલા રંગનું ટપકું (Green Dot) દેખાય, તો તેનો સીધો મતલબ એ છે કે બેકગ્રાઉન્ડમાં અથવા સ્ક્રીન પર કોઈ એપ્લિકેશન (App) તમારા ફોનના કેમેરાનો ઉપયોગ કરી રહી છે. જ્યારે તમે સામાન્ય રીતે ફોટો પાડતા હોવ, વીડિયો શૂટ કરતા હોવ, ફેસટાઇમ (FaceTime) કોલ પર હોવ અથવા કોઈ વીડિયો મીટિંગમાં જોડાયેલા હોવ ત્યારે આ ડોટ દેખાવો સામાન્ય બાબત છે. પરંતુ અહીં એક ટેકનિકલ ખાસિયત એ છે કે, જો કોઈ એપ તમારા ફોનનો કેમેરો અને માઇક્રોફોન બંને એકસાથે વાપરી રહી હશે, તો પણ આઇફોનની સ્ક્રીન પર માત્ર ગ્રીન ડોટ જ પ્રદર્શિત થશે.
ઓરેન્જ ડોટ એટલે માઇક્રોફોન એક્ટિવ છે, વગર કારણે ડોટ દેખાય તો સાવધાન થઈ જાવ
બીજી તરફ, સ્ક્રીન પર દેખાતું નારંગી રંગનું ટપકું (Orange Dot) એ વાતનો સ્પષ્ટ સંકેત છે કે તમારા આઇફોનનું માઇક્રોફોન કોઈ એપ દ્વારા એક્સેસ કરવામાં આવી રહ્યું છે. સામાન્ય રીતે ફોન કોલ દરમિયાન, વોઇસ નોટ રેકોર્ડિંગ કરતી વખતે, એપલની વોઇસ આસિસ્ટન્ટ સિરી (Siri) નો ઉપયોગ કરતી વખતે કે કોઈને વોઇસ મેસેજ મોકલતી વખતે આ ઓરેન્જ ડોટ સ્ક્રીન પર એક્ટિવ થાય છે. તેનો સીધો અર્થ એ છે કે તમારો આઇફોન આ સમયે તમારી વાતો સાંભળી રહ્યો છે. જો તમે કોઈ ઓડિયો કે વીડિયો ફીચરનો ઉપયોગ ન કરી રહ્યા હોવ અને છતાં પણ આ બંનેમાંથી કોઈ ડોટ સ્ક્રીન પર દેખાય, તો સમજી લેવું કે કોઈ થર્ડ-પાર્ટી એપ તમારી ચોરીછૂપીથી જાસૂસી કરી રહી હોઈ શકે છે.
કંટ્રોલ સેન્ટરથી શોધો જાસૂસી કરનારી એપ, સેટિંગ્સમાં જઈને આ રીતે પરમિશન કરો બંધ
જો તમને શંકા જાય કે કોઈ એપ વગર કારણે કેમેરો કે માઇક્રોફોન વાપરી રહી છે, તો તે કઈ એપ છે તે જાણવા માટે આઇફોનની સ્ક્રીન પર ઉપર જમણી બાજુથી નીચેની તરફ સ્વાઇપ કરીને કંટ્રોલ સેન્ટર ખોલો. અહીં સ્ક્રીનની ટોચ પર એપલ તમને તે ચોક્કસ એપનું સત્તાવાર નામ બતાવી દેશે જેણે તાજેતરમાં જ કેમેરા કે માઇક્રોફોનનો ઉપયોગ કર્યો હતો. નોંધનીય છે કે, એપલ યુઝર્સને આ ગ્રીન અને ઓરેન્જ ડોટ બંધ કરવાનો કોઈ કાનૂની વિકલ્પ આપતું નથી, કારણ કે આ આઇઓએસ (iOS) નું કાયમી સુરક્ષા ફીચર છે. જો તમારે કોઈ એપની પરમિશન કાયમ માટે બંધ કરવી હોય, તો આ સરળ સ્ટેપ્સ ફોલો કરો: સૌથી પહેલાં આઇફોનની સેટિંગ્સ (Settings) ખોલો, ત્યારબાદ ‘પ્રાઇવસી એન્ડ સિક્યુરિટી’ (Privacy & Security) ઓપ્શન પર ટેપ કરો. હવે કેમેરા અથવા માઇક્રોફોનમાંથી જેની પરમિશન ચેક કરવી હોય તે વિકલ્પ પસંદ કરો. અહીં તમને બધી એપ્સનું લિસ્ટ દેખાશે, જેમાંથી અજાણી કે અવિશ્વસનીય એપ્સની પરમિશન તરત જ બંધ (ડિસેબલ) કરી દો.
👉 આ સમાચાર વાચો:
Jill Biden Memoir। PM મોદીએ આપેલી ‘તે’ કિંમતી ભેટ જીલ બાઈડનના દિલમાં વસી ગઈ! વર્ષો પછી અમેરિકાના ફર્સ્ટ લેડીએ પુસ્તકમાં ખોલ્યા રાઝ
