News Continuous Bureau | Mumbai
BJP શું તમે ક્યારેય કલ્પના કરી શકો કે દેશના બે વિરોધી ધ્રુવ સમાન ભાજપ અને કોંગ્રેસ એકસાથે આવીને સરકાર બનાવી શકે? મહારાષ્ટ્રના અંબરનાથ નગર પરિષદમાં આ કલ્પના હકીકત બની છે. મુખ્યમંત્રી એકનાથ શિંદેની આગેવાની હેઠળની શિવસેનાને સત્તાથી દૂર રાખવા માટે ભાજપ અને કોંગ્રેસે ગઠબંધન કરીને સૌને ચોંકાવી દીધા છે.
અંબરનાથ નગર પરિષદનું નવું ગણિત
અંબરનાથ નગર પરિષદની કુલ 59 બેઠકોમાંથી બહુમતી માટે 30 બેઠકોની જરૂર છે. તાજેતરની ચૂંટણીમાં શિંદેની શિવસેના 28 બેઠકો સાથે સૌથી મોટી પાર્ટી બની હતી. જ્યારે ભાજપ પાસે 15, કોંગ્રેસ પાસે 12 અને અજિત પવારની NCP પાસે 4 બેઠકો હતી. શિંદે જૂથને માત્ર 2 બેઠકો ખૂટતી હતી, પરંતુ રાજ્યમાં સાથી પક્ષ હોવા છતાં ભાજપે શિંદેને સાથ આપવાને બદલે કોંગ્રેસ અને NCP (AP) સાથે મળીને ‘અંબરનાથ વિકાસ આઘાડી’ બનાવી લીધી. આ ગઠબંધન પાસે હવે 31 સભ્યોનું સમર્થન છે અને ભાજપના તેજશ્રી કરંજુલે પ્રમુખ તરીકે વિજયી થયા છે.
“પીઠમાં છરો ભોંક્યો” – શિંદે જૂથનો ભાજપ પર પ્રહાર
આ અણધાર્યા ગઠબંધનથી શિંદે જૂથમાં ભારે નારાજગી જોવા મળી રહી છે. શિવસેના (શિંદે) ના ધારાસભ્ય ડો. બાલાજી કિનીકરે આને ‘અભદ્ર ગઠબંધન’ ગણાવ્યું છે. તેમણે કહ્યું કે, “કોંગ્રેસ મુક્ત ભારતની વાતો કરનાર ભાજપે સત્તા માટે કોંગ્રેસ સાથે હાથ મિલાવ્યા તે શિવસેનાની પીઠમાં છરો ભોંકવા સમાન છે.” શિંદે જૂથના નેતાઓ આને સાથી પક્ષ દ્વારા કરવામાં આવેલો મોટો વિશ્વાસઘાત ગણાવી રહ્યા છે.
આ સમાચાર પણ વાંચો : Gmail: કરી રહ્યું છે તમારી જાસૂસી? પ્રાઈવસી બચાવવા માટે તરત બંધ કરો આ 2 સેટિંગ્સ, નહીંતર AI વાંચી લેશે તમારા અંગત ઈમેલ
ભાજપનો પલટવાર: ભ્રષ્ટાચારના ગંભીર આક્ષેપો
બીજી તરફ ભાજપે શિંદે જૂથના આરોપોને ફગાવી દીધા છે. ભાજપના ઉપાધ્યક્ષ ગુલાબરાવ કરંજુલે પાટીલે કહ્યું કે, “છેલ્લા 25 વર્ષથી અંબરનાથમાં ભ્રષ્ટાચાર કરનારાઓ સાથે બેસવું એ ખરેખર અભદ્ર ગઠબંધન ગણાયું હોત.” તેમણે દાવો કર્યો કે મહાયુતિ માટે શિંદે જૂથ સાથે અનેકવાર વાતચીતનો પ્રયાસ કરાયો હતો, પરંતુ ત્યાંથી કોઈ સકારાત્મક પ્રતિસાદ મળ્યો ન હતો, જેના કારણે સ્થાનિક વિકાસ માટે આ નિર્ણય લેવો પડ્યો છે.
