ન્યુઝ કન્ટિન્યુઝ બ્યુરો
મુંબઈ, ૨૧ જુલાઈ, ૨૦૨૧
બુધવાર
જંગલી ડુક્કર આ પૃથ્વી પરની સૌથી હાનિકારક અને આક્રમક પ્રજાતિ હોવાની બાતમી એક સંશોધનમાં સામે આવી છે. જંગલી ડુક્કર કૃષિ અને મૂળ વન્યપ્રાણીઓને નુકસાન પહોંચાડવા માટે કુખ્યાત છે. આ પ્રજાતિ હાનિકારક છે એનું એક મોટું કારણ એ છે કે એ જમીનને મોટા પાયે ખોદી નાખે છે, જેમ ટ્રૅક્ટર ખેતરમાં ખેડાણ કરે છે. આ નવું પ્રકાશિત સંશોધન જે આ પ્રકારનું પ્રથમ સંશોધન છે. વૈશ્વિક સ્તરે આ પ્રાણીઓના વસવાટ અને કાર્બન ઉત્સર્જન માટે એના પ્રભાવની ગણતરી કરે છે.
આ પ્રથમ સંશોધનનાં તારણો ચોંકાવનારાં હતાં. જંગલી ડુક્કર દ્વારા ખોદવામાં આવેલા માટીનો સંચિત વિસ્તાર લગભગ તાઇવાન જેટલો હોય છે. એ દર વર્ષે ૪૯ લાખ ટન કાર્બન ડાયોક્સાઇડનું ઉત્સર્જન કરે છે. જે લગભગ ૧૦ દસ લાખ ગાડીઓનાં પ્રદૂષણ બરાબર છે. પૃથ્વીના કાર્બનનો મોટો ભાગ જમીનમાં સંગ્રહિત થાય છે, તો એક નાનો ભાગ વાતાવરણમાં પણ ઉત્સર્જિત થાય છે અને જળવાયુ પરિવર્તન પર ભારે અસર પડે છે.
ઉલ્લેખનીય છે કે જંગલી ડુક્કર (સુસ સ્ક્રોફા) સમગ્ર યુરોપ અને એશિયામાં વસવાટ કરે છે, પરંતુ આજે તેઓ એન્ટાર્કટિકા સિવાય દરેક ખંડો પર રહે છે, જે તેમને ગ્રહ પરના સૌથી પ્રચંડ આક્રમક સસ્તન પ્રાણીઓમાંના એક બનાવે છે. એક અંદાજ મુજબ ત્રીસ લાખ જંગલી ડુક્કર ઑસ્ટ્રેલિયામાં રહે છે. આ જંગલી ડુક્કર ઑસ્ટ્રેલિયામાં દર વર્ષે ૧૦ કરોડ ઑસ્ટ્રેલિયાઈ કરતાં વધુના પાકને નુકસાન પહોંચાડે છે.
