ન્યુઝ કન્ટિન્યુઝ બ્યુરો
મુંબઈ, ૨૧ જુલાઈ, ૨૦૨૧
બુધવાર
મહારાષ્ટ્રના કોલ્હાપુર જિલ્લામાં સોમવારે બપોરથી ભારે વરસાદ જોવા મળી રહ્યો છે. ગગનબાવાડા, પન્હલા, શાહુવાડી અને ભુદરગઢ તાલુકામાં ભારે વરસાદ વરસી રહ્યો છે. સાથે જ ડૅમ વિસ્તારમાં પણ ભારે વરસાદ પડી રહ્યો છે જેના પગલે વિવિધ નદીઓ પરના 17 ડૅમ પાણીમાં ડૂબી ગયા છે અને વાહનવ્યવહાર પણ ખોરવાયો છે.
કોલ્હાપુર જિલ્લામાં જોરદાર વરસાદ વરસતાં બુધવારે સવારે આઠ વાગ્યા સુધીમાં કોડે ડૅમ વિસ્તારમાં 172 મિમી, કુંભીમાં 150 મિમી અને પટગાંવમાં 119 મિમી વરસાદ નોંધાયો હતો. ભુદરગઢ તાલુકામાં સૌથી વધુ 28.4 મિમી વરસાદ નોંધાયો હતો.
ગત રવિવારે જિલ્લામાં દિવસભર વાતાવરણ વાદળછાયું રહ્યું હતું. જોકે સોમવારે સવારથી વાતાવરણમાં પલટો આવી ગયો હતો. મંગળવારની મધ્યરાત્રિ બાદ જિલ્લામાં અનેક સ્થળોએ વરસાદ વરસ્યો હતો. ડૅમ વિસ્તારમાં સારા વરસાદને કારણે નદીના પાણીનો સ્તર પણ વધી રહ્યો છે. પંચગંગાની સપાટી 23 ફૂટ સુધી પહોંચી ગઈ છે અને બાર ડૅમો પાણીની નીચે ડૂબી ગયા છે. રાધનગરી ડૅમમાંથી 1,350 ઘનફૂટ પાણી, વરાણાથી 1,110 ઘનફૂટ અને ઘાટપ્રભાથી 3,993 ઘનફૂટ પાણી છોડવામાં આવી રહ્યું છે.
