News Continuous Bureau | Mumbai
Maharashtra Politics: મહારાષ્ટ્રના રાજકારણમાં અત્યારે તેજ ગતિએ હિલચાલ થઈ રહી છે. બારામતી અને રાહુરી વિધાનસભા બેઠકની પેટાચૂંટણી જાહેર થતા જ ગરમાવો આવી ગયો છે. ખાસ કરીને અજિત પવારના અકાળે અવસાન બાદ ખાલી પડેલી બારામતી બેઠક પર નાયબ મુખ્યમંત્રી સુનેત્રા પવાર (Sunetra Pawar) ચૂંટણી લડવાની તૈયારીમાં છે. આ દરમિયાન તેમણે ઉદ્ધવ ઠાકરેને (Uddhav Thackeray) ફોન કરીને સમર્થન માંગતા અનેક તર્ક-વિતર્ક શરૂ થયા છે.
સુનેત્રા પવારે ઉદ્ધવ ઠાકરે પાસે માંગ્યો ટેકો
મળતી માહિતી મુજબ, નાયબ મુખ્યમંત્રી સુનેત્રા પવારે ઉદ્ધવ ઠાકરેને ફોન કરીને બારામતી પેટાચૂંટણીમાં શિવસેના (UBT) નો ટેકો માંગ્યો છે. સુનેત્રા પવાર અગાઉ રાજ્યસભાના સાંસદ હતા, પરંતુ હવે તેમણે રાજીનામું આપીને નાયબ મુખ્યમંત્રી તરીકે શપથ લીધા છે. મંત્રીપદ જાળવી રાખવા માટે તેમને ધારાસભ્ય બનવું અનિવાર્ય છે. સુનેત્રા પવાર ઈચ્છે છે કે આ ચૂંટણી બિનહરીફ થાય, જેથી તેમણે ઉદ્ધવ ઠાકરેને મહાવિકાસ આઘાડીમાં આ અંગે ચર્ચા કરવા વિનંતી કરી છે.
આ સમાચાર પણ વાંચો: DC vs MI Pitch Report:દિલ્હી અને મુંબઈ વચ્ચે આજે ‘કેપિટલ ક્લેશ’, પિચ રિપોર્ટ સાથે જાણો કેવું રહેશે હવામાન
કોંગ્રેસે ઉમેદવાર જાહેર કરી ખેલ બગાડ્યો?
મહાવિકાસ આઘાડીના મુખ્ય ઘટક પક્ષ કોંગ્રેસે બારામતી અને રાહુરી બંને બેઠકો પર ઉમેદવાર ઉભા કરવાની જાહેરાત કરી દીધી છે. કોંગ્રેસ પ્રદેશ અધ્યક્ષ હર્ષવર્ધન સપકાળે સ્પષ્ટ કર્યું છે કે જો શરદ પવારની રાષ્ટ્રવાદી કોંગ્રેસ ચૂંટણી નહીં લડે, તો કોંગ્રેસ લડવા માટે તૈયાર છે. બારામતી માટે ૬ અને રાહુરી માટે ૪ ઈચ્છુકોએ ટિકિટ માંગી છે. કોંગ્રેસને આ મામલે વંચિત બહુજન આઘાડી અને રાષ્ટ્રીય સમાજ પક્ષનું સમર્થન મળતા હવે જંગ રસાકસીભર્યો બનવાની શક્યતા છે.
ઉદ્ધવ ઠાકરેની ભૂમિકા નિર્ણાયક સાબિત થશે
હવે સૌની નજર ઉદ્ધવ ઠાકરે પર ટકેલી છે. શું તેઓ સુનેત્રા પવારની વિનંતીને માન આપીને કોંગ્રેસ સાથે આ મુદ્દે વાતચીત કરશે? શરદ પવાર જૂથ તરફથી પણ હજુ સુધી કોઈ સત્તાવાર પ્રતિક્રિયા આવી નથી. જો ઉદ્ધવ ઠાકરે અને શરદ પવાર કોંગ્રેસને ઉમેદવાર ઉભા ન રાખવા સમજાવશે, તો સુનેત્રા પવાર માટે જીતનો રસ્તો સરળ બની જશે. પરંતુ જો કોંગ્રેસ મક્કમ રહેશે, તો બારામતીના ગઢમાં સુનેત્રા પવાર વિરુદ્ધ કોંગ્રેસનો મોટો મુકાબલો જોવા મળી શકે છે.
