News Continuous Bureau | Mumbai
Pune Child Rape Murder Case। મહારાષ્ટ્રના પુણે જિલ્લામાંથી એક હૃદયદ્રાવક સમાચાર સામે આવ્યા છે, જ્યાં એક 65 વર્ષના વૃદ્ધે ચાર વર્ષની નિર્દોષ બાળકી સાથે દુષ્કર્મ આચરી તેની નિર્મમ હત્યા કરી નાખી છે. આ ઘટનાને પગલે સમગ્ર વિસ્તારમાં ભારે રોષ અને તણાવનો માહોલ સર્જાયો છે. પુણે ગ્રામીણ પોલીસે આરોપીની ધરપકડ કરી લીધી છે અને મામલાની ગંભીરતાને જોતા 15 દિવસમાં ચાર્જશીટ દાખલ કરવાની ખાતરી આપી છે.
ચોકલેટ અને ખાવાની લાલચ આપી પશુઓના શેડમાં લઈ ગયો
પોલીસના જણાવ્યા અનુસાર, આ શરમજનક ઘટના પુણેની ભોર તહસીલમાં બની હતી. 65 વર્ષનો આરોપી માસૂમ બાળકીને ખાવાની વસ્તુની લાલચ આપી પોતાની સાથે પશુઓના વાડામાં બનેલા એક શેડમાં લઈ ગયો હતો. ત્યાં તેણે બાળકી સાથે દુષ્કર્મ આચર્યું અને ત્યારબાદ પકડાઈ જવાના ડરથી તેની ક્રૂરતાપૂર્વક હત્યા કરી નાખી. બાળકી ગુમ થતા પરિવારજનોએ તેની શોધખોળ શરૂ કરી હતી, જેના અંતે બાળકીનો મૃતદેહ મળી આવતા અરેરાટી વ્યાપી ગઈ હતી.
CCTV ફૂટેજની મદદથી નરાધમ આરોપીની થઈ ધરપકડ
જ્યારે બાળકી મળી ન હતી, ત્યારે પરિવારજનોએ આસપાસના વિસ્તારના સીસીટીવી ચેક કર્યા હતા. એક ઘરના સીસીટીવી ફૂટેજમાં આરોપી બાળકીને પોતાની સાથે લઈ જતો સ્પષ્ટ દેખાયો હતો. આ પુરાવાના આધારે પોલીસે ત્વરિત કાર્યવાહી કરી આરોપીને દબોચી લીધો હતો. જોકે, આ ઘટનાની જાણ થતા જ સેંકડો ગ્રામજનો પોલીસ ચોકીએ ઉમટી પડ્યા હતા અને આરોપીને કડકમાં કડક સજા કરવાની માંગ સાથે સૂત્રોચ્ચાર કર્યા હતા.
મુંબઈ-બેંગલુરુ હાઈવે જામ અને પોલીસની ખાતરી
લોકોનો આક્રોશ એટલો વધી ગયો હતો કે ગ્રામજનોએ મુંબઈ-બેંગલુરુ હાઈવે પર ચક્કાજામ કરી દીધો હતો, જેના કારણે વાહનોની લાંબી કતારો લાગી ગઈ હતી. પુણે ગ્રામીણ પોલીસ અધિક્ષક સંદીપ સિંહ ગીલે ઘટનાસ્થળે પહોંચી લોકોને શાંત પાડ્યા હતા. તેમણે ભરોસો આપ્યો હતો કે આ કેસને ફાસ્ટ ટ્રેક પર ચલાવવામાં આવશે અને 15 દિવસની અંદર કોર્ટમાં મજબૂત આરોપનામું (ચાર્જશીટ) રજૂ કરવામાં આવશે જેથી આરોપીને ફાંસીની સજા અપાવી શકાય.
👉 આ સમાચાર વાચો:
Kerala Hotel Restaurant Strike। શું ૬ મેના રોજ કેરળમાં ખાવાપીવાની તકલીફ પડશે? ગેસના ભાવ વધતા હોટલ માલિકોનું મોટું એલાન, આખા રાજ્યમાં હડતાળ
