News Continuous Bureau | Mumbai

Raj Thackeray  મહારાષ્ટ્રમાં ફરી એકવાર શહેરોના નામ અને મરાઠી ઓળખને લઈને રાજનીતિ તેજ બની છે. આ વખતે વિવાદ હિન્દી-મરાઠીનો નથી, પરંતુ મુંબઈ શહેરના જૂના નામ ‘બોમ્બે’નો છે. ભિવંડીમાં મુંબઈ-નાસિક નેશનલ હાઈવે પર આવેલા ‘બોમ્બે ઢાબા’ના નામ સામે મનસે પ્રમુખ રાજ ઠાકરેએ સખત વાંધો ઉઠાવ્યો છે.

રાજ ઠાકરેએ કેમ અટકાવી ગાડી?

રાજ ઠાકરે ચૂંટણી પ્રચાર માટે કલ્યાણથી ભિવંડી તરફ જઈ રહ્યા હતા. આ દરમિયાન તેમની નજર હાઈવે પર આવેલા ‘બોમ્બે ઢાબા’ પર પડી. મુંબઈનું નામ વર્ષો પહેલા બદલીને મુંબઈ કરી દેવામાં આવ્યું હોવા છતાં ‘બોમ્બે’ નામનો ઉપયોગ થતો જોઈ રાજ ઠાકરે નારાજ થયા હતા. તેમણે તાત્કાલિક કાર્યકરોને આ અંગે સૂચના આપી હતી.

મનસે કાર્યકરોની આકરી કાર્યવાહી

રાજ ઠાકરેના આદેશ બાદ મનસે કાર્યકરોએ તાત્કાલિક ઢાબા પર પહોંચીને ‘બોમ્બે ઢાબા’ લખેલું બોર્ડ ફાડી નાખ્યું હતું. કાર્યકરોએ આક્રોશ વ્યક્ત કરતા કહ્યું કે, ‘બોમ્બે’ નામ મહારાષ્ટ્ર અને મુંબઈની ઓળખની વિરુદ્ધ છે. વિવાદ વધતા ઢાબા માલિકે નમતું જોખ્યું છે અને આગામી ૮ દિવસમાં ઢાબાનું નામ બદલી નાખવાનું વચન આપ્યું છે.

મરાઠી અસ્મિતા અને ચૂંટણી જંગ

મહાનગરપાલિકાની ચૂંટણીમાં રાજ ઠાકરે સતત ‘મરાઠી અસ્મિતા’નો મુદ્દો ઉઠાવી રહ્યા છે. તેમણે આક્ષેપ કર્યો છે કે ભાજપના કારણે મરાઠી ઓળખ જોખમમાં છે. રાજ ઠાકરેના મતે જો મુંબઈ, ઠાણે, પુણે અને નાસિક જેવી મહાનગરપાલિકાઓ પર મરાઠી માણસનું નિયંત્રણ નહીં રહે, તો ભવિષ્યમાં મુંબઈને મહારાષ્ટ્રથી અલગ કરવાના પ્રયાસો સફળ થઈ શકે છે.

આ સમાચાર પણ વાંચો : Shashi Tharoor: જવાહરલાલ નહેરુ વિશે શશિ થરૂરનું મોટું નિવેદન, 1962ના ચીન યુદ્ધમાં હાર માટે નિર્ણયોને ગણાવ્યા જવાબદાર

ગુજરાત સાથે તુલના અને કટાક્ષ

રાજ ઠાકરેએ પ્રચાર દરમિયાન દાવો કર્યો હતો કે જે રીતે ભૂતકાળમાં મુંબઈને ગુજરાતનો હિસ્સો બનાવવાની કોશિશ થઈ હતી, તેવા જ હાલ અત્યારે ઉભા કરવામાં આવી રહ્યા છે. તેથી આપણે આપણી સીમાઓ નક્કી કરવી જરૂરી છે. ‘બોમ્બે ઢાબા’ની આ ઘટનાને મનસે દ્વારા પોતાની શક્તિના પ્રદર્શન તરીકે જોવામાં આવી રહી છે.