News Continuous Bureau | Mumbai
Gold-Silver Price Drop: વૈશ્વિક બજારમાં ચાલી રહેલી અસ્થિરતાને કારણે સોના અને ચાંદીના ભાવમાં સતત ઉતાર-ચઢાવ જોવા મળી રહ્યો છે. બુધવારે અમેરિકા અને ઈરાન વચ્ચે યુદ્ધવિરામની આશાએ તેજી બતાવ્યા બાદ, ગુરુવાર 9 એપ્રિલના રોજ બજાર ખુલતાની સાથે જ કિંમતોમાં મોટો ઘટાડો નોંધાયો છે. ખાસ કરીને ચાંદીના ભાવમાં પ્રતિ કિલો ₹4,700 થી વધુનો કડાકો જોવા મળ્યો છે, જેનાથી રોકાણકારો ચક્રાવા ચઢ્યા છે.ઈરાને અમેરિકા પર સીઝફાયરની શરતોના ઉલ્લંઘનનો આરોપ લગાવ્યા બાદ બજારમાં અનિશ્ચિતતાનો માહોલ છે. MCX પર સવારના સત્રમાં સોના અને ચાંદી બંને લાલ નિશાનમાં ટ્રેડ થઈ રહ્યા છે. મધ્ય-પૂર્વમાં વધતા તણાવ અને હોર્મુઝની સામુદ્રધૂની ફરી બંધ થવાના અહેવાલોની સીધી અસર કિંમતી ધાતુઓના ભાવ પર પડી છે.
ચાંદીમાં ₹4,700 થી વધુનો તોતિંગ ઘટાડો
ગુરુવારે સવારે MCX પર ચાંદીના ભાવમાં જોરદાર ઘટાડો જોવા મળ્યો હતો. ચાંદી વાયદો પ્રતિ કિલો ₹4,785 ગગડીને ₹2,35,133 ના સ્તર પર પહોંચી ગયો હતો, જે અગાઉ ₹2,39,918 પર બંધ થયો હતો. ચાંદીમાં આવેલો આ મોટો ઘટાડો ઔદ્યોગિક માંગમાં અનિશ્ચિતતા અને વૈશ્વિક બજારમાં ડોલરની વધઘટને આભારી છે.
આ સમાચાર પણ વાંચો : LPG Crisis Management: ગેસ સિલિન્ડર માટે હવે નહીં જોવી પડે રાહ! સરકારે લીધો મોટો નિર્ણય, આ ખાસ વર્ગના લોકોને મળશે પ્રાધાન્ય.
સોનાના ભાવમાં પણ ₹700 નો ઘટાડો
સોનાએ પણ પોતાની તેજી ગુમાવી છે અને કિંમતોમાં યુ-ટર્ન જોવા મળ્યો છે. MCX પર સોનું પ્રતિ 10 ગ્રામ ₹700 થી વધુ સસ્તું થયું છે. ibja ના આંકડા મુજબ, સોનાનો ભાવ હાલ ₹1.56 લાખ પ્રતિ 10 ગ્રામની આસપાસ છે. ઇઝરાયેલ દ્વારા લેબનોન પર કરવામાં આવેલા ભીષણ હુમલા બાદ રોકાણકારો સાવચેતીનું વલણ અપનાવી રહ્યા છે, જેના કારણે પ્રોફિટ બુકિંગ જોવા મળી રહ્યું છે.
યુદ્ધવિરામ પર જોખમ અને હોર્મુઝ સંકટ
અમેરિકા અને ઈરાન વચ્ચે બે અઠવાડિયાના સીઝફાયર પર સહમતી થઈ હતી, પરંતુ ઇઝરાયેલ-લેબનોન સંઘર્ષે આ શાંતિ સમજૂતીને જોખમમાં મૂકી દીધી છે. ઇઝરાયેલે બેરૂતમાં રહેણાંક વિસ્તારો પર હુમલા કરતા ૧૮૨ થી વધુ લોકોના મોત થયા છે. આ ઘટનાથી ગુસ્સે ભરાયેલા ઈરાને હોર્મુઝનો માર્ગ ફરી બંધ કરવાની ધમકી આપી છે, જેના કારણે વૈશ્વિક બજારોમાં ફરી અફરાતફરી મચી છે.
