News Continuous Bureau | Mumbai
Siddhivinayak Temple Renovation। મુંબઈના વિશ્વપ્રસિદ્ધ અને કરોડો શ્રદ્ધાળુઓની આસ્થાના કેન્દ્ર સમાન શ્રી સિદ્ધિવિનાયક મંદિર પરિસરને લઈને એક ખુશીના સમાચાર સામે આવ્યા છે. ટૂંક સમયમાં જ શ્રી સિદ્ધિવિનાયક મંદિર પરિસરનો જીર્ણોદ્ધાર અને નવીનીકરણ (રિનોવેશન) કરવામાં આવશે. મહારાષ્ટ્રના મુખ્યમંત્રી દેવેન્દ્ર ફડણવીસે સોશિયલ મીડિયા પ્લેટફોર્મ એક્સ (X) પર આ પ્રોજેક્ટના ભવ્ય મોડલની તસવીરો શેર કરીને આ અંગે સત્તાવાર માહિતી આપી છે. મુખ્યમંત્રીએ જણાવ્યું કે પ્રોજેક્ટના નિર્માણ કાર્ય માટે વિધિવત ભૂમિપૂજન પણ કરી દેવામાં આવ્યું છે.
મુખ્યમંત્રી દેવેન્દ્ર ફડણવીસે કર્યું ભૂમિપૂજન
મુખ્યમંત્રી દેવેન્દ્ર ફડણવીસે ભૂમિપૂજનની તસવીરો પોસ્ટ કરીને કેપ્શનમાં લખ્યું કે, “આપણા શ્રી સિદ્ધિવિનાયક મંદિર પરિસરનો જીર્ણોદ્ધાર અને નવીનીકરણ થવા જઈ રહ્યું છે. આજે અમે આ પવિત્ર કાર્ય માટે ભૂમિપૂજન કર્યું છે. ગણપતિ બાપ્પા મોરિયા.” નોંધનીય છે કે આ મંદિરમાં માત્ર મુંબઈ કે મહારાષ્ટ્ર જ નહીં, પરંતુ સમગ્ર દેશ અને વિદેશમાંથી દરરોજ હજારો શ્રદ્ધાળુઓ દર્શન માટે આવે છે. તહેવારો અને ખાસ દિવસોમાં અહીં ભક્તોની ભારે ભીડ ઉમટે છે, જેને જોતાં આ નવીનીકરણથી ભક્તોને દર્શન કરવામાં ખૂબ જ સરળતા રહેશે અને મંદિર પરિસર વધુ ભવ્ય દેખાશે.
મોટા નેતાઓ, બોલિવૂડ સેલેબ્સ અને અંબાણી પરિવારની આસ્થાનું કેન્દ્ર
શ્રી સિદ્ધિવિનાયક મંદિરની ખ્યાતિ એટલી છે કે અહીં દેશના મોટા-મોટા રાજનેતાઓ, બોલિવૂડ સેલિબ્રિટીઓ અને અંબાણી પરિવાર સહિતના અગ્રણી ઉદ્યોગપતિઓ નિયમિતપણે બાપ્પાના ચરણોમાં શીશ ઝુકાવવા આવે છે. આ ભગવાન ગણેશનું એક અત્યંત જાગૃત સ્વરૂપ માનવામાં આવે છે, જે ભક્તોની તમામ મનોકામનાઓ પૂર્ણ કરે છે. હાલના મંદિર પરિસરમાં એક મુખ્ય હોલ, ગર્ભગૃહ, પૂજા પ્લેટફોર્મ, પ્રસાદ રસોઈ (જે સીધી ગર્ભગૃહ સાથે જોડાયેલી છે), વહીવટી કચેરીઓ, બોર્ડ રૂમ, આરામ ખંડ અને ૮૦૦૦ થી વધુ પુસ્તકો ધરાવતી વિશાળ લાઇબ્રેરી આવેલી છે. મંદિરનો સુવર્ણ ગુંબજ બાપ્પાની દૈવી શક્તિનું પ્રતીક છે.
ઈંટોના સામાન્ય માળખામાંથી વૈશ્વિક સ્તરે પ્રસિદ્ધ બન્યું મંદિર
જો આ મંદિરના ઈતિહાસ પર નજર કરીએ તો, મૂળ શ્રી સિદ્ધિવિનાયક મંદિર શરૂઆતમાં ઈંટોથી બનેલું એક સામાન્ય માળખું હતું. ત્યારબાદ વર્ષ ૧૯૯૦ ના દાયકામાં મહારાષ્ટ્ર સરકાર દ્વારા મંદિરના વિસ્તરણ અને ભવ્ય નિર્માણ માટે અસરકારક પગલાં લેવામાં આવ્યા હતા, જેના કારણે વર્તમાન ભવ્ય સંકુલ અસ્તિત્વમાં આવ્યું હતું. સામાન્ય દિવસો કરતા મંગળવાર અને ગણેશ ચતુર્થીના તહેવાર પર અહીં લાખો ભક્તોની લાઈનો લાગે છે. ઘણીવાર ભીડ એટલી વધી જાય છે કે લોકોને ઉભા રહેવાની પણ જગ્યા મળતી નથી. આ નવા અપગ્રેડેશન પ્લાનથી ભીડના વ્યવસ્થાપનમાં મોટો ફાયદો થશે અને બાપ્પાના ભક્તોમાં પણ આ સમાચારને લઈને ભારે ઉત્સાહ છે.
👉 આ સમાચાર વાચો:
US Iran Airstrikes 2026| અમેરિકાના મિસાઇલ એટેકથી ધ્રુજ્યું ઈરાનનું બંદર અબ્બાસ, દરિયાઈ માર્ગે માઇન્સ બિછાવતી આખી સિન્ડિકેટ ખતમ
