News Continuous Bureau | Mumbai
Dahisar Minor Girl Assault Case મુંબઈના દહિસર વિસ્તારમાં એક રુંવાડા ઉભા કરી દે તેવી ઘટના સામે આવી છે, જેમાં દોઢ વર્ષની માસૂમ બાળકીનું તેના જ પિતાના ૨૫ વર્ષીય સંબંધીએ અપહરણ કરી જાતીય પજવણી કરી હોવાનું બહાર આવ્યું છે. MHB કોલોની પોલીસે સતર્કતા દાખવી ગણતરીના કલાકોમાં આરોપીને ઝડપી લીધો છે, જ્યારે બાળકી હાલમાં હોસ્પિટલમાં રિકવરી પર છે.ઘટનાની વિગત મુજબ, સવારે જ્યારે પરિવાર જાગ્યો ત્યારે તેમની ૧૮ મહિનાની દીકરી ગુમ જણાતા અફરાતફરી મચી ગઈ હતી. પોલીસે અપહરણનો ગુનો નોંધી તપાસ શરૂ કરી ત્યારે સીસીટીવીમાં એક યુવક બાળકીને ઉઠાવીને નિર્જન વિસ્તાર તરફ જતો દેખાયો હતો. આ યુવક બીજું કોઈ નહીં પણ પરિવારનો પરિચિત સંબંધી જ હતો જે તે વિસ્તારમાં મજૂર તરીકે કામ કરતો હતો.
નાળા પાસે ગંભીર હાલતમાં મળી બાળકી
આરોપીની ધરપકડ બાદ તેની પૂછપરછમાં ચોંકાવનારો ખુલાસો થયો હતો. પોલીસે દહિસરના એક નાળા પાસેના અવાવરૂ વિસ્તારમાંથી બાળકીને લોહીલુહાણ હાલતમાં શોધી કાઢી હતી. બાળકીને તાત્કાલિક મધ્ય મુંબઈની સરકારી હોસ્પિટલમાં દાખલ કરવામાં આવી હતી, જ્યાં તબીબોની ટીમે તેની જટિલ સર્જરી કરી હતી. સદનસીબે બાળકી અત્યારે ખતરાની બહાર છે અને તબીબોની દેખરેખ હેઠળ છે.
POCSO એક્ટ હેઠળ કડક કાર્યવાહી
પોલીસે ૨૫ વર્ષીય નરાધમ આરોપી વિરુદ્ધ ભારતીય ન્યાય સંહિતા (BNS) અને પોક્સો (POCSO) એક્ટની વિવિધ કલમો હેઠળ ગુનો નોંધી તેને જેલભેગો કર્યો છે. આરોપી પરિવારનો વિશ્વાસ જીતીને જ આ જઘન્ય કૃત્ય આચરવામાં સફળ રહ્યો હતો. પોલીસે તમામ પુરાવાઓ એકત્ર કરીને આ કેસમાં ફાસ્ટ ટ્રેક ટ્રાયલ ચલાવવાની તૈયારી કરી છે જેથી આરોપીને કડકમાં કડક સજા અપાવી શકાય.
આ સમાચાર પણ વાંચો : Andheri West Burglary Case: અંધેરીમાં વેપારીના બંધ ઘરને તસ્કરોએ નિશાન બનાવ્યું: ₹૫૦ લાખની ચોરીનો ભેદ ઉકેલાયો, ૩ રીઢા ગુનેગારોની ધરપકડ.
વિસ્તારમાં આક્રોશનો માહોલ
આ ઘટનાને પગલે દહિસર અને MHB કોલોની વિસ્તારના રહીશોમાં ભારે આક્રોશ જોવા મળી રહ્યો છે. લોકો માસૂમ બાળકી પરના આ અત્યાચાર બદલ આરોપીને ફાંસીની સજા આપવાની માંગ કરી રહ્યા છે. આ કિસ્સાએ ફરી એકવાર સાબિત કર્યું છે કે બાળકોની સુરક્ષા માટે પરિચિતો અને સંબંધીઓ પર પણ આંધળો વિશ્વાસ મૂકવો જોખમી સાબિત થઈ શકે છે.
