News Continuous Bureau | Mumbai
South Mumbai International Fraud| દક્ષિણ મુંબઈના માલાબાર હિલ વિસ્તારમાં રહેતા એક મોટા ઉદ્યોગપતિ સાથે 2.71 લાખ યુએસ ડોલર (આશરે 2.55 કરોડ) ની અત્યંત સુનિયોજિત આંતરરાષ્ટ્રીય છેતરપિંડી થઈ છે. પોટેશિયમ આયોડાઈડના ઉત્પાદન સાથે સંકળાયેલા ઉદ્યોગપતિને અમેરિકાની એક પ્રતિષ્ઠિત મેડિકલ કંપનીના નામે નકલી ઓર્ડર આપીને છેતરવામાં આવ્યા છે. આરોપીઓએ અમેરિકાના એરપોર્ટ પરથી માલ હડપ કરી તેને આફ્રિકા મોકલી દીધો હોવાનું બહાર આવ્યું છે.
નકલી ઓર્ડર અને 14 ટન કેમિકલની હેરાફેરી
પીડિત ઉદ્યોગપતિની કંપનીને એક બ્રોકર મારફતે અમેરિકાના નોર્થ ડાકોટા સ્થિત મેડિકલ સેન્ટર માટે 14,000 કિલો કેમિકલ સપ્લાય કરવાનો ઓર્ડર મળ્યો હતો. મુંબઈ એરપોર્ટ પરથી આ જથ્થો એર કાર્ગો દ્વારા અમેરિકા રવાના કરવામાં આવ્યો હતો. નિયમ મુજબ, ઉદ્યોગપતિએ તમામ ઓરિજિનલ દસ્તાવેજો પેમેન્ટ માટે ‘બેંક ઓફ અમેરિકા’ને મોકલ્યા હતા. જોકે, પેમેન્ટ આવવામાં વિલંબ થતા જ્યારે તપાસ કરવામાં આવી ત્યારે આ મોટા કૌભાંડનો પર્દાફાશ થયો હતો.
અમેરિકાથી કેન્યા માલ કેવી રીતે પહોંચ્યો?
તપાસમાં ચોંકાવનારી વિગતો સામે આવી છે કે, ઓરિજિનલ દસ્તાવેજો હજુ પણ બેંકમાં જ હતા, તેમ છતાં અમેરિકાના ફાર્ગો એરપોર્ટ પર એક ટ્રાન્સપોર્ટ કંપનીએ નકલી ‘ડિલિવરી ઓર્ડર’ રજૂ કરીને 14 ટન માલનો કબજો મેળવી લીધો હતો. આટલું જ નહીં, આ કીમતી જથ્થાને ત્યાંથી હ્યુસ્ટન પોર્ટ પર લઈ જઈને દરિયાઈ માર્ગે કેન્યાના મોમ્બાસા પોર્ટ પર મોકલી દેવામાં આવ્યો હતો. આખી પ્રક્રિયા એટલી ઝડપથી કરવામાં આવી કે ઉદ્યોગપતિને શંકા જાય તે પહેલા માલ બીજા ખંડમાં પહોંચી ગયો હતો.
માલાબાર હિલ પોલીસ દ્વારા ગ્લોબલ તપાસની તૈયારી
માલાબાર હિલ પોલીસે આ મામલે છેતરપિંડી, વિશ્વાસઘાત અને બનાવટી દસ્તાવેજો બનાવવા બદલ બ્રોકર અને સંકળાયેલી એજન્સીઓ વિરુદ્ધ ગુનો નોંધ્યો છે. આ કૌભાંડમાં આંતરરાષ્ટ્રીય સ્તરની ગેંગ સંડોવાયેલી હોવાથી મુંબઈ પોલીસ હવે ઈન્ટરપોલ અને ગ્લોબલ એજન્સીઓની મદદ લેવાની દિશામાં વિચારી રહી છે. સાયબર અને આર્થિક ગુના શાખાની ટીમો પણ આ ટ્રાન્ઝેક્શન અને ડિજિટલ ફૂટપ્રિન્ટ્સની તપાસ કરી રહી છે.
👉 આ સમાચાર વાચો:
Mumbai Student Fraud Abroad Education| વિદેશમાં ભણવા જવાનું સપનું રોળાયું મુંબઈમાં વિદ્યાર્થીઓ સાથે લાખોની છેતરપિંડી કરનાર ટોળકીની સભ્ય ઝડપાઈ
