News Continuous Bureau | Mumbai
JJ Hospital Resident Doctor Suicide। મુંબઈની પ્રતિષ્ઠિત સર જે.જે. હોસ્પિટલમાં ફરજ બજાવતા પ્રથમ વર્ષના એક રેસિડેન્ટ ડોક્ટરે હોસ્ટેલના રૂમમાં ગળે ફાંસો ખાઈને આપઘાત કરી લેતા ચકચાર મચી ગઈ છે. આ ઘટનાએ ફરી એકવાર મેડિકલ ક્ષેત્રમાં રેસિડેન્ટ ડોક્ટરો પર રહેલા માનસિક કામના ભાર અને તણાવના ગંભીર મુદ્દાને સપાટી પર લાવી દીધો છે. જે.જે. હોસ્પિટલના તબીબી આલમમાં આ દુર્ઘટનાને પગલે શોકનું મોજું ફરી વળ્યું છે.
હોસ્ટેલના રૂમમાં મૃત હાલતમાં મળી આવ્યા
મૃતક ૨૬ વર્ષીય ડોક્ટર મૂળ ધારાશિવ (ઉસ્માનાબાદ) જિલ્લાના વતની હતા. તેમણે ચાલુ વર્ષે ફેબ્રુઆરી મહિનામાં જ જે.જે. હોસ્પિટલના રેડિયોલોજી વિભાગમાં રેસિડેન્ટ ડોક્ટર તરીકે પદભાર સંભાળ્યો હતો. તેઓ હોસ્પિટલ પરિસરમાં આવેલી નર્સિંગ હોસ્ટેલના છઠ્ઠા માળે રહેતા હતા. બુધવારે બપોરે જ્યારે તેઓ ફરજ પર હાજર ન થયા ત્યારે સાથી તબીબોએ હોસ્ટેલ જઈ તપાસ કરી હતી, જ્યાં તેઓ રૂમમાં મૃત હાલતમાં મળી આવ્યા હતા.
માનસિક તણાવ અને ડિપ્રેશનની ચાલતી હતી સારવાર
પોલીસ સૂત્રો પાસેથી મળતી માહિતી મુજબ, યુવાન ડોક્ટર છેલ્લા કેટલાક મહિનાઓથી માનસિક તણાવ અને ડિપ્રેશનનો સામનો કરી રહ્યા હતા. એવી વિગતો પણ સામે આવી છે કે તેઓ આ અંગે મનોચિકિત્સક (Psychiatrist) પાસે નિયમિત સારવાર પણ લઈ રહ્યા હતા. તબીબી વર્તુળોમાં એવી ચર્ચા છે કે હોસ્પિટલમાં કામના અતિશય ભાર અને અંગત માનસિક સમસ્યાઓના કારણે તેમણે આ અંતિમ ડગલું ભર્યું હોઈ શકે છે.
પોલીસે ADR નોંધી તપાસ હાથ ધરી
ઘટનાની જાણ થતા જ હોસ્પિટલ પ્રશાસન અને જે.જે. માર્ગ પોલીસ સ્ટેશનના અધિકારીઓ ઘટનાસ્થળે પહોંચી ગયા હતા. પોલીસે મૃતદેહનો કબજો મેળવી પોસ્ટમોર્ટમ માટે મોકલી આપ્યો છે. હાલમાં પોલીસે આ મામલે એક્સિડેન્ટલ ડેથ રિપોર્ટ (ADR) નોંધીને વધુ તપાસ શરૂ કરી છે. મૃતક ડોક્ટરના પરિવારજનોને આ અંગે જાણ કરી દેવામાં આવી છે અને તેમના નિવેદન લેવાની પ્રક્રિયા હાથ ધરાશે.
👉 આ સમાચાર વાચો:
Mumbai Cyber Fraud News। બાંદ્રામાં મહિલા પોલીસ અધિકારી સાથે ઓનલાઇન ઠગાઈ; એક PDF ફાઈલ ખોલતા જ બેંક ખાતામાંથી ૪૫ હજાર ગાયબ
