News Continuous Bureau | Mumbai
Maharashtra Weather Update મહારાષ્ટ્રમાં ચોમાસાની વિદાય વચ્ચે વિચિત્ર હવામાન સર્જાયું છે; મુંબઈ અને થાણેમાં ઊંચા તાપમાન અને ભેજના કારણે લોકો અસહ્ય બફારાથી ત્રસ્ત બન્યા છે, જ્યારે બીજી તરફ પાલઘર જિલ્લામાં વાવાઝોડા સાથે વરસેલા વરસાદે ૧,૪૦૦થી વધુ ઘરોનાં છાપરાં ઉડાવી ભારે વિનાશ વેર્યો છે.
Maharashtra Weather Update – મુંબઈ અને થાણેમાં આકરા તાપ સાથે ભેજનું જોખમ
ભારતીય હવામાન વિભાગ (IMD) અનુસાર મુંબઈ, થાણે અને સમગ્ર કોંકણ પટ્ટામાં ઓક્ટોબરના પ્રથમ સપ્તાહથી જ આકરી ગરમીની શરૂઆત થઈ ગઈ છે. દક્ષિણ-પશ્ચિમ ચોમાસું પાછું ખેંચાવાના સમયે પવનોની દિશા બદલાવા અને મુંબઈ પર એન્ટિ-સાયક્લોનિક સર્ક્યુલેશન સર્જાવાથી ગરમી નીચેના વાતાવરણમાં કેદ થઈ ગઈ છે. કુલાબામાં મહત્તમ તાપમાન ૩૭.૪ ડિગ્રી અને સાંતાક્રુઝમાં ૩૬.૯ ડિગ્રી નોંધાયું છે, જે વર્ષ ૨૦૧૩ પછીનો મોટો રેકોર્ડ છે. વધુ પડતા ભેજને કારણે નાગરિકોને વાસ્તવિક તાપમાન કરતાં ૪૦ ડિગ્રીથી પણ વધુ ગરમીનો અહેસાસ થઈ રહ્યો છે, જેને પગલે હવામાન વિભાગે થાણેમાં ૪ ઓક્ટોબર સુધી ‘હોટ એન્ડ હ્યુમિડ’ વાતાવરણની ચેતવણી જારી કરી છે.
Maharashtra Weather Update – પાલઘર જિલ્લામાં વાવાઝોડા સાથે વરસાદનો કહેર
એક તરફ મુંબઈગરા બફારાથી હેરાન છે, તો બીજી તરફ નજીકના પાલઘર જિલ્લામાં વીજળીના કડાકા અને તોફાની પવનો સાથે ત્રાટકેલા વરસાદે તબાહી મચાવી છે. પાલઘરના મનોર, વિક્રમગડ, વાડા, જવાહર અને મોખાડા તાલુકાઓમાં કુદરતી આપત્તિથી વ્યાપક નુકસાન થયું છે. તોફાની વાવાઝોડાના કારણે સમગ્ર જિલ્લામાં ૧,૪૦૦થી વધુ કાચા-પાકા ઘરોના છાપરાં, નળિયાં અને પતરાં ઊડી ગયાં છે. આ ઉપરાંત ૨૦૦થી વધુ વીજળીના થાંભલા વાંકા વળી જવા કે તૂટી પડવાના કારણે અસંખ્ય ગામડાઓમાં વીજ પુરવઠો સંપૂર્ણપણે ખોરવાઈ ગયો છે.
Maharashtra Weather Update – વાડા તાલુકામાં સૌથી વધુ નુકસાન, સરકારી તંત્ર સર્વેમાં જોડાયું
સ્થાનિક વહીવટીતંત્રના જણાવ્યા મુજબ સૌથી વધુ અસર વાડા તાલુકામાં જોવા મળી છે, જ્યાં ૪૫ ગામોના આશરે ૧,૨૦૬ ઘરો ક્ષતિગ્રસ્ત થયા છે. જિલ્લા પરિષદની શાળાઓ, આંગણવાડી કેન્દ્રો અને પ્રાથમિક આરોગ્ય કેન્દ્રો સહિત સરકારી ઈમારતો પર વૃક્ષો પડવાથી નુકસાન પહોંચ્યું છે તેમજ મુખ્ય માર્ગો પર ઝાડ પડતાં વાહનવ્યવહાર પ્રભાવિત થયો હતો. તહસીલદાર અને મહેસૂલ વિભાગની ટીમો દ્વારા અસરગ્રસ્ત વિસ્તારોમાં તાત્કાલિક પંચનામા અને નુકસાનીનો સર્વે શરૂ કરવામાં આવ્યો છે જેથી ગ્રામજનોને વહેલી તકે સહાય પહોંચાડી શકાય.
👉 આ સમાચાર વાચો:
Jio IPO Issue Date રિલાયન્સ જિયોના મેગા આઈપીઓની તારીખ નક્કી? ₹37,700 કરોડનો ઐતિહાસિક પબ્લિક ઇશ્યૂ 21 ઓક્ટોબરે ખુલવાની શક્યતા
