News Continuous Bureau | Mumbai
Axis Bank New Cash Rules દેશની અગ્રણી ખાનગી બેન્કોમાં સામેલ એક્સિસ બેન્કે (Axis Bank) પોતાના કરોડો સેવિંગ્સ એકાઉન્ટ ધારકો માટે કેશ ટ્રાન્ઝેક્શન અને મિનિમમ બેલેન્સ સંબંધિત નિયમોમાં મહત્વના ફેરફારો કર્યા છે. બેન્કના નવા નોટિફિકેશન મુજબ, ૧ ડિસેમ્બર ૨૦૨૬થી ગ્રાહકો માટે મહિના દરમિયાન મળતા ફ્રી કેશ ટ્રાન્ઝેક્શનની (Free Cash Transactions) સંખ્યા ઘટાડી દેવામાં આવી છે. આ ઉપરાંત ખાતામાં લઘુત્તમ બેલેન્સ (Minimum Balance Penalty) ન જાળવવા બદલ વસૂલવામાં આવતા માસિક ચાર્જમાં પણ મોટો વધારો ઝીંકવામાં આવ્યો છે. આ નવા નિયમોની સીધી અસર ઇઝી એક્સેસ, ડોમેસ્ટિક, કૃષિ અને એનઆરઆઈ (NRI) સેવિંગ્સ એકાઉન્ટ્સ પર પડશે.
Axis Bank New Cash Rules – ફ્રી કેશ ટ્રાન્ઝેક્શનની મર્યાદા ૪ થી ઘટીને ૩ થઈ, ₹૧ લાખની વેલ્યુ લિમિટ યથાવત
હાલના નિયમ અનુસાર એક્સિસ બેન્કના ગ્રાહકો મહિનામાં ૪ વખત મફત રોકડ જમા કે ઉપાડ કરી શકે છે અથવા મહત્તમ ₹૧ લાખ સુધીનું કેશ ટ્રાન્ઝેક્શન વિનામૂલ્યે કરી શકે છે. જોકે, ૧ ડિસેમ્બરથી ફ્રી ટ્રાન્ઝેક્શનની સંખ્યા ૪ થી ઘટાડીને માત્ર ૩ કરી દેવામાં આવી છે. જોકે કુલ ₹૧ લાખની કેશ લિમિટ યથાવત રાખવામાં આવી છે. આ બેમાંથી જે પણ મર્યાદા વહેલી પૂરી થશે, ત્યારબાદ ગ્રાહકે દરેક વધારાના રોકડ વ્યવહાર પર નિયત વધારાનો સર્વિસ ચાર્જ અને ટેક્સ ચૂકવવો પડશે. આથી સામાન્ય ગ્રાહકોએ હવે શાખા કે કેશ ડિપોઝિટ મશીન (CDM) મારફતે થતા રોકડ વ્યવહારો પર ખાસ ધ્યાન રાખવું પડશે.
Axis Bank New Cash Rules – મિનિમમ બેલેન્સ ન રાખવા બદલ માસિક દંડ ₹૬૦૦ સુધી વધારાયો
કેશ લિમિટ ઘટાડવા ઉપરાંત બેન્કે મિનિમમ એવરેજ બેલેન્સ (MAB) જાળવવામાં નિષ્ફળ રહેતા ગ્રાહકો પર આકરો દંડ લાદવાની જાહેરાત કરી છે. અર્ધ-શહેરી (Semi-Urban) શાખાઓમાં ઇઝી એક્સેસ ખાતાઓ માટે પેનલ્ટી ₹૩૦૦ થી વધારીને સીધી ₹૬૦૦ કરવામાં આવી છે. જ્યારે ગ્રામીણ (Rural) શાખાઓમાં આ ચાર્જ ₹૧૫૦ થી વધારીને ₹૬૦૦ કરી દેવાયો છે. NRI ઇઝી એક્સેસ ખાતાઓ માટે પણ સેમી-અર્બન અને રૂરલ શાખાઓમાં પેનલ્ટી ₹૩૦૦ થી વધારીને ₹૬૦૦ થઈ છે. મેટ્રો અને શહેરી શાખાઓમાં મહત્તમ પેનલ્ટી અગાઉની જેમ જ ₹૬૦૦ રહેશે, જ્યારે સેલેરી એકાઉન્ટ ધરાવતા ગ્રાહકોને આ દંડમાંથી મુક્તિ મળશે.
Axis Bank New Cash Rules – ડિજિટલ બેન્કિંગને પ્રોત્સાહન અને રોકડ વ્યવહારો પર અંકુશ
બેન્કિંગ વિશ્લેષકોના જણાવ્યા અનુસાર, ખાનગી બેન્કો દ્વારા રોકડ વ્યવહારો પર શુલ્ક વધારવાનો મુખ્ય ઉદ્દેશ્ય ગ્રાહકોને યુપીઆઈ (UPI), નેટ બેન્કિંગ અને ડેબિટ કાર્ડ જેવા ડિજિટલ પેમેન્ટ માધ્યમો તરફ વાળવાનો છે. શાખાઓમાં કેશ હેન્ડલિંગ કોસ્ટ ઘટાડવા અને ગ્રાહકો ડિજિટલ પ્લેટફોર્મનો મહત્તમ ઉપયોગ કરે તે માટે આ નિયમો કડક બનાવવામાં આવ્યા છે. એક્સિસ બેન્કના ગ્રાહકોએ હવે ૧ ડિસેમ્બરથી વધારાના ચાર્જીસથી બચવા માટે ખાતામાં જરૂરી મિનિમમ બેલેન્સ જાળવવું પડશે અને શાખામાં જઈને રોકડ જમા-ઉપાડ કરવાને બદલે ડિજિટલ ટ્રાન્ઝેક્શન્સને પ્રાથમિકતા આપવી પડશે.
👉 આ સમાચાર વાચો:
Stock Market PreDiwali Rally ધનતેરસ અને દિવાળી પહેલાં શેરબજારમાં રોકેટ ગતિએ તેજી માત્ર બે જ દિવસમાં રોકાણકારોની સંપત્તિમાં ₹૧૧ લાખ કરોડનો ઉછાળો
