News Continuous Bureau | Mumbai
દક્ષિણ મુંબઈના સંવેદનશીલ ફોર્ટ વિસ્તારમાં ફિલ્મ ‘ધુરંધર ૨’ ના શૂટિંગ દરમિયાન સુરક્ષાના તમામ માપદંડો નેવે મૂકવામાં આવ્યા હોવાનું સામે આવ્યું છે. પ્રોડક્શન હાઉસ ‘B62 સ્ટુડિયો’ ની વારંવારની બેદરકારીને જોતા BMC ના એ-વોર્ડ ઓફિસે આ પ્રોડક્શન હાઉસને કાયમી ધોરણે બ્લેકલિસ્ટ કરવાની ભલામણ કરી છે.શૂટિંગ દરમિયાન કોઈપણ પ્રકારની પૂર્વ મંજૂરી વગર સળગતી મશાલોનો ઉપયોગ કરવામાં આવી રહ્યો હતો. મુંબઈ પોલીસે આ જોખમી સાધનો જપ્ત કર્યા છે. આ સાથે જ BMC એ પ્રોડક્શન હાઉસની ₹૨૫,૦૦૦ ની સિક્યોરિટી ડેપોઝિટ જપ્ત કરી લીધી છે અને વધારાના ₹૧ લાખનો દંડ વસૂલવાની કાર્યવાહી તેજ કરી છે.
નિયમોના ઉલ્લંઘનની લાંબી યાદી
પ્રોડક્શન ટીમ પર આરોપ છે કે તેમણે ૧ ફેબ્રુઆરીના રોજ પણ હાઈ-સિક્યોરિટી ઝોનમાં પરવાનગી વગર ડ્રોન ઉડાડ્યા હતા, જે બાબતે લોકેશન મેનેજર સામે પહેલેથી જ FIR નોંધાયેલી છે. આટલું જ નહીં, શૂટિંગ માટે બિલ્ડિંગના ટેરેસનો ગેરકાયદે ઉપયોગ અને પૂર્વનિર્ધારિત લોકેશનમાં મનસ્વી રીતે ફેરફાર કરવાના ગંભીર આક્ષેપો પણ સાચા સાબિત થયા છે.
સેટ પર ગેસ સિલિન્ડર અને જનરેટરનો જોખમી વપરાશ
BMC ની તપાસમાં બહાર આવ્યું છે કે શૂટિંગ સેટ પર રસોઈ બનાવવા માટે પરવાનગી વગર ગેસ સિલિન્ડરનો ઉપયોગ કરવામાં આવ્યો હતો. ફોર્ટ જેવા ગીચ અને સંવેદનશીલ વિસ્તારમાં કોઈપણ સુરક્ષા સાધન વિના આ પ્રકારે જનરેટર અને ગેસનો ઉપયોગ મોટી દુર્ઘટનાને નિમંત્રણ આપી રહ્યો હતો. આ બેદરકારીને કારણે BMC ના વોર્ડ ઓફિસર અત્યંત નારાજ છે.
આ સમાચાર પણ વાંચો : Mumbai Traffic Police: મુંબઈમાં રિક્ષાચાલકોની મનમાની પર પોલીસનો ‘સપાટો’: ૧૨ દિવસમાં ૩૬ હજાર કેસ અને ₹૯૭ લાખનો દંડ; ૮૧૫ રિક્ષાઓ કરાઈ જપ્ત
કાયમી બ્લેકલિસ્ટ કરવાની ભલામણ
વોર્ડ ઓફિસર દ્વારા ડેપ્યુટી મ્યુનિસિપલ કમિશનરને પત્ર લખીને એવી ભલામણ કરવામાં આવી છે કે, સુરક્ષાના માપદંડોની વારંવાર અવગણના કરવા બદલ B62 સ્ટુડિયોને ભવિષ્યમાં મુંબઈના કોઈપણ વિસ્તારમાં શૂટિંગની મંજૂરી ન આપવી જોઈએ. જો આ ભલામણ સ્વીકારવામાં આવશે તો આ પ્રોડક્શન હાઉસ મુંબઈમાં ક્યારેય શૂટિંગ નહીં કરી શકે.
