News Continuous Bureau | Mumbai
મુંબઈના અંધેરી વિસ્તારમાં આવેલા સહાર એર કાર્ગો કોમ્પ્લેક્સ પાસે મંગળવારે એક હૃદયદ્રાવક હિટ-એન્ડ-રનની ઘટના બની હતી. એર કાર્ગોના ક્લિયરન્સ અને ડોક્યુમેન્ટેશનનું કામ કરતા ૪૬ વર્ષીય લોજિસ્ટિક્સ કર્મચારીને એક બેફામ ટ્રકે ટક્કર મારી હતી. આ અકસ્માતમાં ગંભીર ઈજાઓ થવાથી કર્મચારીનું કરુણ મોત નીપજ્યું છે. સહાર પોલીસે અજાણ્યા ટ્રક ચાલક વિરુદ્ધ ગુનો નોંધી તેને પકડવા ચક્રો ગતિમાન કર્યા છે.T મૃતક કર્મચારી નાલાસોપારા (પશ્ચિમ) ના રહેવાસી હતા અને લાંબા સમયથી લોજિસ્ટિક્સ ક્ષેત્રે કાર્યરત હતા. તેઓ જ્યારે ફાર્મા ઝોન સામે ડોક્યુમેન્ટ ક્લિયરન્સ માટે જઈ રહ્યા હતા ત્યારે કાળ બનીને આવેલા ટ્રકે તેમને અડફેટે લીધા હતા.
ટાયર શરીર પર ફરી વળતા ગંભીર ઈજા થઈ
પ્રત્યક્ષદર્શીઓના જણાવ્યા મુજબ, ટ્રકની ટક્કર એટલી જોરદાર હતી કે કર્મચારી જમીન પર પટકાયા હતા અને ટ્રકનું વજનદાર ટાયર તેમના શરીરના નીચેના ભાગ પરથી ફરી વળ્યું હતું. લોહીલુહાણ હાલતમાં તેમને તાત્કાલિક કૂપર હોસ્પિટલ લઈ જવામાં આવ્યા હતા, પરંતુ હોસ્પિટલ પહોંચતા પહેલા જ તેમણે અંતિમ શ્વાસ લીધા હતા. તબીબોએ તેમને ‘બ્રોટ ડેડ’ જાહેર કર્યા હતા.
આ સમાચાર પણ વાંચો : Ajit Pawar Plane Crash Investigation: અજિત પવાર પ્લેન દુર્ઘટનામાં નવો વળાંક! રોહિત પવારે વિમાનની સ્થિતિ પર ઉઠાવ્યા ગંભીર સવાલો; ‘ષડયંત્ર’ વાળા નિવેદનથી રાજકારણમાં ગરમાવો
ટ્રક ચાલક માનવતા ભૂલી વાહન સાથે ફરાર
અકસ્માત સર્જાયા બાદ ડ્રાઈવરે ઘાયલ વ્યક્તિને મદદ કરવાને બદલે વાહન ભગાવી મૂક્યું હતું. સહાર એરપોર્ટ જેવા હાઈ-સિક્યોરિટી ઝોનમાં બનેલી આ ઘટનાએ સુરક્ષા અને ટ્રાફિક મેનેજમેન્ટ પર સવાલો ઉભા કર્યા છે. અકસ્માત બાદ ઘટનાસ્થળે હાજર લોકોમાં ભારે રોષ જોવા મળ્યો હતો.
પોલીસ કાર્યવાહી અને સીસીટીવી તપાસ
સહાર પોલીસે આ મામલે ભારતીય ન્યાય સંહિતાની સંબંધિત કલમો હેઠળ FIR નોંધી છે. પોલીસ સૂત્રોના જણાવ્યા અનુસાર, અકસ્માત સર્જનાર ટ્રકનો નંબર ઓળખી લેવામાં આવ્યો છે. પોલીસ અત્યારે એરપોર્ટ અને કાર્ગો કોમ્પ્લેક્સના સીસીટીવી ફૂટેજ ચકાસી રહી છે જેથી ટ્રક કઈ દિશામાં ભાગ્યો છે તે જાણી શકાય અને આરોપી ડ્રાઈવરની ધરપકડ કરી શકાય.
