News Continuous Bureau | Mumbai
Mira Bhayandar Dacoity Gang Busted મીરાભાઈંદર, વસઈવિરાર વિસ્તારમાં મોટી સશસ્ત્ર ધાડ પાડવાની તૈયારી કરી રહેલી ઉત્તર પ્રદેશના બુલંદશહેરની એક કુખ્યાત અને રીઢા ગુનેગારોની ગેંગને પોલીસે સંયુક્ત ઓપરેશન પાર પાડીને ઝડપી લીધી છે. પોલીસ ઘેરાબંધી દરમિયાન ભાગવા જતાં આરોપીઓની બેફામ કારે એક રાહદારીને અડફેટે પણ લીધો હતો, છતાં પોલીસે ફિલ્મી ઢબે પીછો કરીને તમામ ૫ આરોપીઓને દબોચી લીધા હતા. તલાશી દરમિયાન આરોપીઓ પાસેથી બે દેશી પિસ્તોલ, ચાર છરા, લોખંડની કટાવણી, વોકીટોકી અને ગુનામાં વપરાયેલી કાર સહિતનો મુદ્દામાલ જપ્ત કરવામાં આવ્યો છે.
Mira Bhayandar Dacoity Gang Busted – મુખ્ય આરોપી સામે ૩૩થી વધુ ગંભીર ગુના
પોલીસ તપાસમાં સામે આવ્યું છે કે ઝડપાયેલા મુખ્ય આરોપી સામે અગાઉ હત્યા, લૂંટ અને આર્મ્સ એક્ટ સહિતના ૩૩થી વધુ ગુના નોંધાયેલા છે. જ્યારે ગેંગના અન્ય સાગરીતો સામે ઉત્તર પ્રદેશ, હરિયાણા અને મહારાષ્ટ્રના વિવિધ પોલીસ સ્ટેશનોમાં ૧૫થી વધુ ગુના દાખલ થયેલા છે. આ આંતરરાજ્ય ગેંગ અત્યંત ચાલાકીથી દિવસ દરમિયાન પોશ સોસાયટીઓની રેકી કરતી હતી અને સિક્યોરિટી ગાર્ડની નજર ચૂકવી ફ્લેટના તાળાં તોડી ચોરીને અંજામ આપતી હતી.
Mira Bhayandar Dacoity Gang Busted – પકડાય તો CBI કે ED અધિકારી હોવાનો ઢોંગ
પૂછપરછ દરમિયાન આરોપીઓની ચોંકાવનારી મોડસ ઓપરેન્ડીનો પર્દાફાશ થયો છે. સોસાયટીમાં ચોરી કે ધાડ દરમિયાન જો કોઈ તેમને રોકે કે પકડી પાડે, તો તેઓ પોતાને સીબીઆઈ (CBI), સીઆઈડી (CID) કે ઇડી (ED) ના અધિકારી ગણાવીને બનાવટી ઓળખ બતાવી નાસી છૂટતા હતા. આ ટોળકીએ માત્ર મીરા-ભાઈંદર જ નહીં, પરંતુ મુંબઈ, થાણે, નવી મુંબઈ, પાલઘર અને ગુજરાતના વિવિધ વિસ્તારોમાં પણ રેકી કરી હોવાની કબૂલાત કરી છે.
Mira Bhayandar Dacoity Gang Busted – આર્મ્સ એક્ટ અને ધાડની કલમો હેઠળ ગુનો દાખલ
પોલીસે આરોપીઓ વિરુદ્ધ ધાડની પૂર્વતૈયારી, આર્મ્સ એક્ટ, જીવલેણ હુમલો અને મોટર વાહન અધિનિયમની વિવિધ ગંભીર કલમો હેઠળ ગુનો નોંધીને કાયદેસરની કાર્યવાહી હાથ ધરી છે. આ રીઢા ગુનેગારોની ધરપકડથી વસઈ-વિરાર અને મીરા-ભાઈંદર પંથકમાં બનનારી મોટી લૂંટની ઘટના ટળી ગઈ છે. હાલ પોલીસ રિમાન્ડ મેળવીને આ ગેંગ અન્ય કયા-કયા ગુનાઓમાં સંડોવાયેલી છે અને તેમને સ્થાનિક કક્ષાએ કોણે આશરો આપ્યો હતો તેની ઊંડાણપૂર્વક તપાસ કરી રહી છે.
👉 આ સમાચાર વાચો:
Saudi Aramco Halts Crude Supply હોર્મુઝની સામુદ્રધુની બ્લોક થતાં વૈશ્વિક તેલ બજાર અસ્તવ્યસ્ત ભારતીય રિફાઇનરીઓને મળતું સાઉદી ક્રૂડ ખોરવાયું..
