News Continuous Bureau | Mumbai
Mumbai Airport Drug Seizure DRI| મુંબઈ એરપોર્ટ પર ડાયરેક્ટોરેટ ઓફ રેવન્યુ ઈન્ટેલિજન્સ (DRI) એ આંતરરાષ્ટ્રીય ડ્રગ્સ સ્મગલિંગના એક મોટા નેટવર્કને તોડી પાડ્યું છે. ગુપ્ત બાતમીના આધારે હાથ ધરાયેલા ઓપરેશનમાં અધિકારીઓએ આશરે 7 કરોડની કિંમતનું 1,426 ગ્રામ શુદ્ધ કોકેઈન જપ્ત કર્યું છે. આ મામલે એક દક્ષિણ આફ્રિકન નાગરિક અને તેની પાસેથી ડિલિવરી લેવા આવેલા મુંબઈના એક શખ્સની ધરપકડ કરવામાં આવી છે.
નૈરોબીથી મુંબઈ ડ્રગ્સ લાવતા ઝડપાયો વિદેશી નાગરિક
DRI ના અધિકારીઓને ચોક્કસ માહિતી મળી હતી કે નૈરોબીથી મુંબઈ આવી રહેલી ફ્લાઈટમાં ડ્રગ્સની હેરાફેરી થઈ રહી છે. બાતમીના આધારે એરપોર્ટ પર વોચ ગોઠવવામાં આવી હતી અને દક્ષિણ આફ્રિકાના એક શખ્સની અટકાયત કરી તેના સામાનની તપાસ કરવામાં આવી હતી. તલાશી દરમિયાન તેના સામાનમાંથી 1,426 ગ્રામ શુદ્ધ કોકેઈનનો જથ્થો મળી આવ્યો હતો, જેની આંતરરાષ્ટ્રીય બજારમાં કિંમત કરોડોમાં આંકવામાં આવી રહી છે.
નળ બજારમાં ડિલિવરી આપવાનું હતું આયોજન
ઝડપાયેલા વિદેશી નાગરિકની કડક પૂછપરછમાં ચોંકાવનારો ખુલાસો થયો હતો. તેણે કબૂલાત કરી હતી કે આ જથ્થો તેને જોહાનિસબર્ગથી લાવવા માટે નૈરોબીમાં સોંપવામાં આવ્યો હતો. આ ડ્રગ્સ મુંબઈના નળ બજાર વિસ્તારમાં રહેતા એક શખ્સને આપવાનું હતું. આ માહિતી મળતા જ DRI એ સાવચેતીપૂર્વક છટકું ગોઠવ્યું હતું અને ડ્રગ્સ લેવા આવેલા મુંબઈના સ્થાનિક શખ્સને પણ એરપોર્ટની બહારથી જ દબોચી લીધો હતો.
ડ્રગ્સ સિન્ડિકેટના મૂળ સુધી પહોંચવા તપાસ તેજ
DRI હવે એ દિશામાં તપાસ કરી રહી છે કે મુંબઈમાં આ ડ્રગ્સ કોને સપ્લાય કરવાનું હતું અને આ આંતરરાષ્ટ્રીય સિન્ડિકેટના મૂળ ક્યાં સુધી ફેલાયેલા છે. એરપોર્ટ પર કસ્ટમ્સ અને DRI દ્વારા સર્વેલન્સ વધારી દેવામાં આવ્યું છે. આ કાર્યવાહીને કારણે મુંબઈમાં ડ્રગ્સ માફિયાઓ વચ્ચે ફફડાટ વ્યાપી ગયો છે. બંને આરોપીઓને કોર્ટમાં રજૂ કરી વધુ રિમાન્ડ મેળવવાની તજવીજ હાથ ધરવામાં આવી છે.
👉 આ સમાચાર વાચો:
Mumbai JVLR Hit and Run| મુંબઈના JVLR રોડ પર બેફામ કારે ત્રણ પદયાત્રીઓને કચડ્યા પવઈ પોલીસે હિટ એન્ડ રનનો ગુનો નોંધી આરોપીની કરી ધરપકડ
