News Continuous Bureau | Mumbai
Goregaon Link Road Accident મુંબઈમાં ઇન્ફ્રાસ્ટ્રક્ચરના કામો દરમિયાન સુરક્ષાના નિયમો નેવે મૂકવામાં આવતા હોવાનું ફરી એકવાર સાબિત થયું છે. ગોરેગાંવ લિંક રોડ પર નિર્માણાધીન બ્રિજનો એક ભારેખમ લોખંડનો પિલર નીચેથી પસાર થઈ રહેલી કાર પર અચાનક તૂટી પડ્યો હતો. આ દુર્ઘટનામાં કાર સંપૂર્ણપણે કચડાઈ ગઈ હતી, પરંતુ કારમાં સવાર મુસાફરોનો આબાદ બચાવ થતા સૌએ રાહતનો શ્વાસ લીધો છે.ઘટના સમયે લિંક રોડ પર વાહનોની ભારે અવરજવર હતી. અચાનક પિલર પડતા આસપાસના વાહનચાલકોમાં નાસભાગ મચી ગઈ હતી. મુલુંડમાં મેટ્રો પિલરનો સ્લેબ પડવાની ઘટનાના હજુ ત્રણ દિવસ પણ નથી થયા ત્યાં આ બીજી ઘટનાએ તંત્રની પોલ ખોલી દીધી છે.
જરાક માટે રહી ગઈ મોટી જાનહાનિ
પ્રત્યક્ષદર્શીઓના જણાવ્યા અનુસાર, લોખંડનો પિલર સીધો કારની ઉપરના ભાગે પડ્યો હતો, જેના કારણે કારની છત દબાઈ ગઈ હતી. જો પિલર સહેજ પણ આગળ કે પાછળ પડ્યો હોત તો કારમાં સવાર લોકોના જીવ જઈ શક્યા હોત. સ્થાનિકોએ તાત્કાલિક દોડી આવીને કારમાં ફસાયેલા લોકોને સુરક્ષિત બહાર કાઢ્યા હતા.
સુરક્ષા જાળી કે બેરિકેડિંગનો અભાવ
અકસ્માત બાદ લોકોમાં ભારે રોષ જોવા મળી રહ્યો છે. સ્થાનિકોએ આક્ષેપ કર્યો છે કે બાંધકામ સ્થળ પર સુરક્ષા માટે કોઈ જાળી (Safety Net) કે પ્રોટેક્શન ગાર્ડ તૈનાત કરવામાં આવ્યા નથી. વ્યસ્ત રસ્તા પર કામ ચાલતું હોવા છતાં જરૂરી સાવચેતી રાખવામાં ન આવતા કોન્ટ્રાક્ટરની ગંભીર બેદરકારી સામે આવી છે.
આ સમાચાર પણ વાંચો : Dhurandhar 2 Film Shoot Controversy: ફિલ્મ ‘ધુરંધર ૨’ ના શૂટિંગમાં સુરક્ષા સાથે ચેડાં: B62 સ્ટુડિયોને બ્લેકલિસ્ટ કરવા BMCની ભલામણ; નિયમો તોડવા બદલ ભારે દંડ.
તંત્ર સામે ઉઠ્યા સવાલો
મુંબઈમાં ઠેર-ઠેર ચાલી રહેલા બાંધકામો હવે રાહદારીઓ અને વાહનચાલકો માટે ડરનું કારણ બની રહ્યા છે. વારંવાર બનતી આવી ઘટનાઓ છતાં તંત્ર દ્વારા કોન્ટ્રાક્ટરો સામે કોઈ કડક પગલાં લેવામાં આવતા નથી. આ મામલે હવે પોલીસ તપાસ કરી રહી છે કે પિલર કયા કારણોસર પડ્યો અને તે માટે કોણ જવાબદાર છે.
Join Our WhatsApp Community