News Continuous Bureau | Mumbai
Mumbai Weather Update: મુંબઈ સહિત સમગ્ર મહારાષ્ટ્રમાં હવે ઠંડીનું જોર ઘટવા લાગ્યું છે. ફેબ્રુઆરીની શરૂઆત સાથે જ કોંકણ કિનારાના વિસ્તારોમાં ભેજનું પ્રમાણ વધતા વાતાવરણમાં ગરમી વર્તાઈ રહી છે. હવામાન વિભાગના જણાવ્યા મુજબ, મુંબઈમાં આજે દિવસ દરમિયાન તાપમાનનો પારો 34 ડિગ્રી સેલ્સિયસ સુધી પહોંચવાની શક્યતા છે, જે આ વર્ષનું અત્યાર સુધીનું સૌથી ઊંચું તાપમાન હોઈ શકે છે.સાંતાક્રુઝ અને દક્ષિણ મુંબઈના અનેક વિસ્તારોમાં ગરમી વધવાની સાથે વહેલી સવારે ધુમ્મસની ચાદર પણ જોવા મળી રહી છે, જેના કારણે વિઝિબિલિટીમાં ઘટાડો થયો છે. આવનારા કેટલાક દિવસો સુધી તાપમાનમાં આ રીતે જ વધ-ઘટ ચાલુ રહેશે અને ઉકળાટ વધવાને કારણે મુંબઈગરાઓને મુશ્કેલી પડી શકે છે.
રાજ્યના કેટલાક ભાગોમાં વાદળછાયું વાતાવરણ
એક તરફ મુંબઈમાં ગરમી વધી રહી છે, ત્યારે બીજી તરફ ઉત્તર મહારાષ્ટ્ર અને કોંકણના કેટલાક ભાગોમાં વાદળછાયું વાતાવરણ રહેવાની શક્યતા છે. કેટલાક જિલ્લાઓમાં હળવા વરસાદની આગાહી સાથે ‘યલો એલર્ટ’ પણ આપવામાં આવ્યું છે. હવામાન વિભાગના મતે આગામી 24 કલાકમાં વાતાવરણ સ્થિર રહેશે પરંતુ ઉકળાટમાં સતત વધારો થશે.
આ સમાચાર પણ વાંચો : Ajit Pawar’s Last Words: ન ક્રેશના 8 મિનિટ પહેલાનો એ ફોન: અજિત પવારે છેલ્લે કોની સાથે કરી હતી વાત? સામે આવી અંતિમ વાતચીતની વિગતો
મુંબઈની હવાની ગુણવત્તામાં ઘટાડો
તાપમાનની સાથે મુંબઈમાં પ્રદૂષણની સમસ્યા પણ વકરી રહી છે. આજે સવારે મુંબઈનો એર ક્વોલિટી ઇન્ડેક્સ (AQI) 280 નોંધાયો હતો, જે સ્વાસ્થ્ય માટે હાનિકારક ગણાય છે. કથળતી હવાની ગુણવત્તાને કારણે નાગરિકોને શ્વાસ લેવામાં તકલીફ અને ગળામાં ઈન્ફેક્શન જેવી સમસ્યાઓ થઈ રહી છે. વધતા તાપમાન અને પવનની ગતિમાં ફેરફાર બાદ હવાની ગુણવત્તામાં સુધારો થવાની અપેક્ષા છે.
ઉત્તર ભારતમાં ઠંડી અને દક્ષિણમાં ગરમી
કેન્દ્રીય હવામાન વિભાગના જણાવ્યા અનુસાર, ઉત્તર ભારતમાં હજુ પણ ઠંડીનો કડાકો યથાવત છે. હરિયાણા, પંજાબ અને દિલ્હીમાં તાપમાન નીચું રહેતા અનેક જગ્યાએ શાળાઓમાં રજા જાહેર કરવામાં આવી છે. તે જ સમયે દક્ષિણ ભારત અને મહારાષ્ટ્રમાં ગરમીનો પ્રભાવ વધવા લાગ્યો છે. વાતાવરણમાં આવતા આ અચાનક બદલાવને કારણે મોસમી બીમારીઓ વધવાનું જોખમ પણ વધી ગયું છે.
