News Continuous Bureau | Mumbai
Powai Elderly Fraud Case। મુંબઈના પવઈ વિસ્તારમાં માનવતા અને વિશ્વાસને શરમાવે તેવો કિસ્સો પ્રકાશમાં આવ્યો છે. ચાંદીવલી વિસ્તારમાં રહેતી એક 76 વર્ષીય વૃદ્ધાને તેના જ ઘરે રહેતા ભાડૂઆત દંપતીએ 1.71 કરોડનો ચૂનો લગાવ્યો હોવાની ફરિયાદ પવઈ પોલીસ મથકે નોંધાઈ છે. આરોપીઓએ વૃદ્ધાનો વિશ્વાસ જીતીને તેમના બેંક ખાતામાંથી મોટી રકમ પોતાના ખાતામાં ટ્રાન્સફર (Transfer) કરી લીધી હોવાનું બહાર આવ્યું છે.
રોકાણના બહાને વિશ્વાસ જીત્યો
પોલીસના જણાવ્યા અનુસાર, ફરિયાદી વૃદ્ધાએ પોતાનો ફ્લેટ આ દંપતીને ભાડે આપ્યો હતો. શરૂઆતના મહિનાઓમાં ભાડું નિયમિત આપીને દંપતીએ વૃદ્ધાનો વિશ્વાસ કેળવ્યો હતો. ત્યારબાદ તેમણે નકલી દસ્તાવેજો બનાવી વૃદ્ધાને ચોખાના જથ્થાબંધ વેપારમાં ભાગીદાર બનાવવાની લાલચ આપી 36.5 લાખનું રોકાણ કરાવ્યું હતું. જોકે, આ તો માત્ર છેતરપિંડીની શરૂઆત હતી.
ફ્લેટ વેચાણની રકમ પર નજર બગડી
તપાસમાં બહાર આવ્યું છે કે, જ્યારે દંપતીને જાણ થઈ કે વૃદ્ધાએ પોતાનો એક અન્ય ફ્લેટ વેચીને 1.90 કરોડ બેંકમાં જમા કર્યા છે, ત્યારે તેમની દાનત બગડી હતી. તેમણે વૃદ્ધાને ઈન્કમ ટેક્સ રિફંડ અપાવવાનું બહાનું કાઢી તેમની બેંક વિગતો અને પાસવર્ડ મેળવી લીધા હતા. ત્યારબાદ મોબાઈલ બેંકિંગ એપ દ્વારા વૃદ્ધાના ખાતામાંથી 1.71 કરોડ પોતાના અને પરિચિતોના ખાતામાં ટ્રાન્સફર કરી લીધા હતા.
બંદૂકની ધમકી આપી વૃદ્ધાને ડરાવ્યા
વૃદ્ધાએ પોલીસને જણાવ્યું હતું કે, આરોપીઓ પાસે લાયસન્સવાળી બંદૂક હોવાથી તેઓ ડરી ગયા હતા. વધુમાં, તેમના પતિ હૃદયરોગના દર્દી હોવાથી કોઈ અનિચ્છનીય ઘટના ન ઘટે તે ડરથી તેઓ લાંબો સમય મૌન રહ્યા હતા. પવઈ પોલીસે અત્યારે છેતરપિંડી અને ધાક-ધમકીનો ગુનો નોંધી આરોપી દંપતીની શોધખોળ શરૂ કરી છે. પોલીસ હાલમાં બેંક ટ્રાન્ઝેક્શન (Transactions) અને ડિજિટલ પુરાવાઓની સઘન તપાસ કરી રહી છે.
👉 આ સમાચાર વાચો:
Prakash Raj Controversy Ramayana| પ્રકાશ રાજે વટાવી હદ! રામલક્ષ્મણ વિશે એવું તે શું બોલ્યા કે મચ્યો ખળભળાટ
