News Continuous Bureau | Mumbai
Thane Fake Tantrik Arrest: અંધશ્રદ્ધાની માયાજાળ ફેલાવી ભોળા નાગરિકોને લૂંટતા તત્વો સામે થાણે ક્રાઈમ બ્રાન્ચે લાલ આંખ કરી છે. કાળા જાદુ અને તાંત્રિક વિધિ દ્વારા આર્થિક સમૃદ્ધિ અપાવવાનું વચન આપી એક મહિલા પાસેથી ₹2.5 કરોડની માતબર રકમ પડાવનાર નકલી તાંત્રિકને પોલીસે ગોવા રાજ્યમાંથી ઝડપી લીધો છે. આ હાઈ-પ્રોફાઈલ છેતરપિંડીના પર્દાફાશથી સમગ્ર શહેરમાં ચકચાર મચી ગઈ છે.
કાળા જાદુના જોરે સમૃદ્ધિના ખોટા દાવા કરી મહિલાને ફસાવી
મળેલી માહિતી અનુસાર, ભોગ બનનાર મહિલાને આરોપીએ પોતાની વાતોમાં ફસાવી હતી. આરોપીએ એવો દાવો કર્યો હતો કે તે તાંત્રિક વિધિ અને કાળા જાદુના જોરે મહિલાના જીવનમાં આર્થિક સમૃદ્ધિ લાવી દેશે અને તેના તમામ દુઃખો દૂર કરી દેશે. આ વાતોમાં આવીને મહિલાએ સમયાંતરે આરોપીને કુલ ₹2.5 કરોડ જેટલી રકમ આપી દીધી હતી. જોકે, લાંબો સમય વીતવા છતાં કોઈ જ ફાયદો ન થતા મહિલાને પોતાની સાથે થયેલી છેતરપિંડીનો અહેસાસ થયો હતો અને મામલો પોલીસ સ્ટેશને પહોંચ્યો હતો.
આ સમાચાર પણ વાંચો : Summer Bath Tips: પરસેવાની દુર્ગંધ અને ગરમીથી મળશે છુટકારો: નહાવાના પાણીમાં મિક્સ કરો આ ઘરેલુ વસ્તુઓ, અનુભવશો ગજબની તાજગી
ગોવામાં છુપાયેલા આરોપીને ક્રાઈમ બ્રાન્ચે દબોચ્યો
ફરિયાદ મળતા જ થાણે ક્રાઈમ બ્રાન્ચની ટીમે ટેકનિકલ તપાસ અને સર્વેલન્સ શરૂ કર્યું હતું. આરોપી ધરપકડથી બચવા માટે મહારાષ્ટ્ર છોડીને ગોવામાં છુપાયો હોવાની ચોક્કસ બાતમી પોલીસને મળી હતી. ક્રાઈમ બ્રાન્ચની એક વિશેષ ટીમે તાત્કાલિક ગોવા રવાના થઈ, ત્યાં છાપો મારીને આરોપીને દબોચી લીધો હતો. પોલીસ તપાસમાં બહાર આવ્યું છે કે આરોપીએ ખૂબ જ વ્યવસ્થિત રીતે મહિલાનો વિશ્વાસ જીતી આ મોટું કૌભાંડ આચર્યું હતું.
વધુ શિકાર અને સાથીદારોની શોધમાં પોલીસ
પોલીસ હવે એ દિશામાં તપાસ કરી રહી છે કે આ નકલી તાંત્રિકે અન્ય કેટલા લોકોને આ જ રીતે શિકાર બનાવ્યા છે. તેની સાથે આ ગુનામાં અન્ય કોઈ સાથીદારો સામેલ છે કે કેમ, તેની પણ કડક પૂછપરછ કરવામાં આવી રહી છે. આરોપીને હાલ કસ્ટડીમાં રાખવામાં આવ્યો છે અને તેની પાસેથી છેતરપિંડીની રકમ વસૂલવાની પ્રક્રિયા હાથ ધરવામાં આવી છે. પોલીસે નાગરિકોને અપીલ કરી છે કે આવી અંધશ્રદ્ધાની વાતોમાં આવીને પોતાની મહેનતની કમાણી ન ગુમાવે.
