News Continuous Bureau | Mumbai
Salim Dola| અંડરવર્લ્ડ અને ડ્રગ માફિયાઓ સામે ચાલી રહેલી ભારતીય તપાસ એજન્સીઓની કાર્યવાહીમાં આજે મોટી સફળતા મળી છે. દાઉદ ઈબ્રાહિમના નેટવર્ક સાથે જોડાયેલા અને ભારતની ‘મોસ્ટ વોન્ટેડ’ યાદીમાં સામેલ ડ્રગ માફિયા સલીમ ડોલાને તુર્કીથી ભારત ડિપોર્ટ કરીને લાવવામાં આવ્યો છે. આજે વહેલી સવારે તેને એક સ્પેશિયલ ફ્લાઈટ દ્વારા દિલ્હી લાવવામાં આવ્યો છે, જ્યાં હાલ સુરક્ષા એજન્સીઓ તેની કડક પૂછપરછ કરી રહી છે.
આંતરરાષ્ટ્રીય ઓપરેશન દ્વારા સફળતા
સલીમ ડોલા લાંબા સમયથી ઈસ્તંબુલ (તુર્કી) માં છુપાઈને પોતાનું ડ્રગ સિન્ડિકેટ ચલાવી રહ્યો હતો. ભારતીય ગુપ્તચર એજન્સીઓએ આંતરરાષ્ટ્રીય એજન્સીઓ સાથે મળીને એક સફળ ઓપરેશન પાર પાડ્યું હતું, જેના પરિણામે તુર્કી સુરક્ષા એજન્સીઓએ તેને અટકાયતમાં લીધો હતો. ભારત લાવ્યા બાદ હવે તેને મુંબઈ પોલીસ અથવા નાર્કોટિક્સ કંટ્રોલ બ્યુરો (NCB) ને સોંપવાની પ્રક્રિયા હાથ ધરવામાં આવશે.
૫૦૦૦ કરોડનું કાળું સામ્રાજ્ય
સલીમ ડોલાના તાર સીધા દાઉદ ઈબ્રાહિમની ગેંગ સાથે જોડાયેલા છે. તે વાર્ષિક ૫,૦૦૦ કરોડ રૂપિયાથી વધુનું ડ્રગ્સનું નેટવર્ક ચલાવતો હોવાનું મનાય છે. ભારતભરમાં અનેક સ્થળોએ તેની ડ્રગ ફેક્ટરીઓ અને લેબ પકડાઈ ચૂકી છે. તેના પર ૧ લાખ રૂપિયાનું ઈનામ જાહેર હતું અને તેની સામે રેડ કોર્નર નોટિસ પણ ઈશ્યુ કરવામાં આવી હતી. અગાઉ ઓક્ટોબર અને નવેમ્બર ૨૦૨૫માં પણ એજન્સીઓએ તેના નજીકના સાથીઓ અને પરિવારના સભ્યોને દુબઈથી પકડીને ભારત લાવવામાં સફળતા મેળવી હતી.
હવે આગળ શું?
દિલ્હીમાં પૂછપરછ દરમિયાન ડોલા પાસેથી ભારતના યુવાનો સુધી ડ્રગ્સ પહોંચાડવાના આખા નેટવર્ક, ફંડિંગ અને દાઉદ ગેંગ સાથેના તેના જોડાણ અંગે મહત્વની માહિતી મળી શકે તેવી શક્યતા છે. આ ધરપકડને ભારતની સુરક્ષા એજન્સીઓ માટે મોટી સિદ્ધિ માનવામાં આવે છે, કારણ કે ડોલા ડ્રગ્સ સપ્લાય કરવાના એક મોટા ‘ચેનલ’ ને હેન્ડલ કરતો હતો. આ કાર્યવાહીથી ડ્રગ માફિયાઓમાં ભારે ફફડાટ ફેલાયો છે.
👉 આ સમાચાર વાચો:
Marine Drive Tragedy। જન્મદિવસની ખુશી માતમમાં ફેરવાઈ મરીન ડ્રાઈવ પર બાઈક અકસ્માતમાં ૧૯ વર્ષના યુવાન અને રાહદારીનો જીવ ગયો.
